មន្ទីរកសិកម្មខេត្តកំពង់ស្ពឺ (បង្កាត់-ភ្ញាស់) ប្រភេទត្រីឆ្ពិន ដើម្បីបំប៉នកូនត្រី សម្រាប់ផ្គត់ផ្គង់តម្រូវការទីផ្សារ
- កំពង់ស្ពឺ
ខេត្តកំពង់ស្ពឺ៖ ខណ្ឌរដ្ឋបាលជលផលកំពង់ស្ពឺ នៃមន្ទីរកសិកម្មរុក្ខាប្រមាញ់និងនេសាទខេត្តកំពង់ស្ពឺ បាននិងកំពុងដំណើរការផលិតពូជត្រី (បង្កាត់-ភ្ញាស់) ប្រភេទត្រីឆ្ពិន ដើម្បីបំប៉នកូនត្រី សម្រាប់ផ្គត់ផ្គង់តម្រូវការទីផ្សារ ជូនវារីវប្បករក្នុងខេត្តកំពង់ស្ពឺ និងតំបន់ផ្សេងៗ។
នៅថ្ងៃទី២៥ ខែឧសភា ឆ្នាំ២០២៦ ខណ្ឌរដ្ឋបាលជលផលកំពង់ស្ពឺ នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ បាននិងកំពុងអនុវត្តការងារផលិតពូជត្រី (បង្កាត់-ភ្ញាស់) ប្រភេទត្រីឆ្ពិន ស្របតាមលក្ខណៈបច្ចេកទេសវារីវប្បកម្ម ដើម្បីបង្កើនការផ្គត់ផ្គង់កូនត្រីមានគុណភាព ជូនដល់វារីវប្បករ និងប្រជាពលរដ្ឋដែលប្រកបមុខរបរចិញ្ចឹមត្រី ក្នុងខេត្តកំពង់ស្ពឺ ក៏ដូចជាបណ្តាខេត្តផ្សេងៗ។
ការផលិតពូជត្រីនេះ ត្រូវបានអនុវត្តចាប់ពីការជ្រើសរើសមេពូជដែលមានសុខភាពល្អ ការថែទាំមេពូជ ការបង្កាត់ ការភ្ញាស់ និងការបំប៉នកូនត្រី ដោយអនុវត្តតាមវិធានបច្ចេកទេសត្រឹមត្រូវ ដើម្បីធានាបាននូវអត្រារស់រាន និងគុណភាពកូនត្រីខ្ពស់ សមស្របសម្រាប់ការចិញ្ចឹមបន្ត និងឆ្លើយតបទៅនឹងតម្រូវការទីផ្សារ។
គួរបញ្ជាក់ផងដែរថា រដូវបង្កាត់ភ្ញាស់កូនត្រីបានចាប់ផ្តើមហើយ ដែលជាពេលវេលាសមស្របសម្រាប់បងប្អូនប្រជាពលរដ្ឋ និងវារីវប្បករ ត្រៀមរៀបចំស្រះ អាងចិញ្ចឹម ប្រព័ន្ធទឹក និងសម្ភារៈចាំបាច់នានា សម្រាប់ការចិញ្ចឹមត្រីឱ្យមានប្រសិទ្ធភាព។ ទន្ទឹមនឹងនេះ អ្នកចិញ្ចឹមគួរសិក្សាស្វែងយល់ និងជ្រើសរើសប្រភេទត្រីដែលមានតម្រូវការទីផ្សារខ្ពស់ ងាយស្រួលថែទាំ មានអត្រាលូតលាស់ល្អ និងប្រជាពលរដ្ឋនិយមបរិភោគ ដើម្បីកាត់បន្ថយហានិភ័យ និងបង្កើនប្រាក់ចំណូលគ្រួសារ។
ជាមួយគ្នានេះ ខណ្ឌរដ្ឋបាលជលផលកំពង់ស្ពឺ នឹងបន្តពង្រឹងការងារបច្ចេកទេសវារីវប្បកម្ម ការផលិតពូជត្រី និងការផ្តល់ការណែនាំបច្ចេកទេសជូនប្រជាពលរដ្ឋ ដើម្បីជំរុញការអភិវឌ្ឍវិស័យវារីវប្បកម្មឱ្យកាន់តែមានប្រសិទ្ធភាព និរន្តរភាព និងរួមចំណែកលើកកម្ពស់សេដ្ឋកិច្ចមូលដ្ឋាន ក៏ដូចជាសន្តិសុខស្បៀងក្នុងមូលដ្ឋានផងដែរ៕
ចែករំលែកព័តមាននេះ