ទីក្រុងយេរូសាឡឹម៖ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ បានធ្លោយមាត់ប្រាប់មនុស្សជិតដិតរបស់គាត់ថាអ៊ីស្រាអែលនិយាយជាមួយលោកដូណាល់ត្រាំមិនសូវមានទឹកមាត់ប្រៃប៉ុន្មានទេពាក់ព័ន្ធនឹងបញ្ហាអ៊ីរ៉ង់។ លោកថ្លែងដូច្នេះនៅពេលអាមេរិក និងអ៊ីរ៉ង់កំពុងចរចាគ្នាដើម្បីឱ្យមានកិច្ចព្រមព្រៀងបញ្ចប់សង្គ្រាម។ នេះបើយោងតាមប្រភព២នាក់ដែលដឹងរឿងនេះច្បាស់ ហើយបានទម្លាយរឿងនេះប្រាប់អ្នកសារព័ត៌មាន។ ការថ្លែងរបស់លោកណឺតាន់យ៉ាហ៊ូដូចខាងលើនេះកើតមានឡើងស្របពេលដែលអ៊ីស្រាអែលហាក់ដូចជាត្រូវអាមេរិកទុកឱ្យនៅខាងក្រៅសង្វៀននៃការចរចា។ ពោលគឺដូចករណីអាមេរិកទុកអឺរ៉ុបឱ្យុនៅក្រៅសង្វៀននៅពេលចរចាជាមួយរុស្ស៊ីដើម្បីដោះស្រាយបញ្ហាអ៊ុយក្រែនដូច្នោះដែរ។
សព្វថ្ងៃនេះ អាមេរិក និងអ៊ីរ៉ង់និយាយមិនសូវត្រូវគ្នាប៉ុន្មានទេ ហើយភាគីទាំង២នៅមានចំណុចខ្វែងគំនិតគ្នាលើបញ្ហាធំៗដូចជា៖ កម្មវិធីនុយក្លេអ៊ែររបស់អ៊ីរ៉ង់, ការដែលអ៊ីរ៉ង់ទាមទារឱ្យអាមេរិកលុបចោលទណ្ឌកម្មសេដ្ឋកិច្ច និងយុទ្ធនាការយោធារបស់អ៊ីស្រាអែលដើម្បីវាយប្រហារមូលដ្ឋានរបស់ក្រុមហេសបូឡានៅប្រទេសលីបង់ជាដើម។ ណឺតាន់យ៉ាហ៊ូកំពុងទាមទារសិទ្ធិដើម្បីបន្តប្រតិបត្តិការសឹកប្រឆាំងនឹងអ្វីដែលលោកហៅថាជាការគំរាមកំហែងពីគ្រប់មុខព្រួញរួមទាំងពីប្រទេសលីបង់ផងដែរ។ ចំណុចនេះមិនមែនងាយស្រួលប៉ុន្មានឡើយ។ ស្រួលមិនស្រួល បើអ៊ីរ៉ង់ហ៊ានតែយកលេសបញ្ហានេះក៏អាចនឹងធ្វើឱ្យការចរចាបរាជ័យផងដែរ។
មន្ត្រីអ៊ីស្រាអែលដែលលួចបង្ហើបប្រាប់រឿងរ៉ាវអាថ៌កំបាំងទៅអ្នកសារព័ត៌មាននោះប្រាប់ថាលោកណឺតាន់យ៉ាហ៊ូកំពុងខ្វល់ចិត្តយ៉ាងខ្លាំងចំពោះការចរចាគ្នាដើម្បីបង្កើតអនុស្សារណៈយោគយល់គ្នារវាងអ៊ីរ៉ង់ និងអាមេរិក។ ប្រសិនបើកិច្ចព្រមព្រៀងនេះចរចាគ្នាបានសម្រេច អ៊ីរ៉ង់ត្រូវបើកដំណើរការច្រកសមុទ្រហ័រម៉ូសដើម្បីឱ្យនាវាដឹកទំនិញ និងដឹកថាមពលអាចបើកចេញចូលដូចធម្មតាឡើងវិញ។ ជាថ្នូរត្រឡប់មកវិញ អាមេរិកយល់ព្រមបិទបញ្ចប់ការបិទខ្ទប់ដែនសមុទ្ររបស់អ៊ីរ៉ង់។ នេះបើយោងតាមការបង្ហើបឱ្យដឹងពីមន្ត្រីរដ្ឋាភិបាលអាមេរិកម្នាក់៕ ប្រភព៖ Reuters និងប្រភពដទៃទៀត
ចែករំលែកព័តមាននេះ