ទីក្រុងការ៉ាកាស់៖ ចំនួនអ្នកស្លាប់ដោយសារគ្រោះរញ្ជួយដី២ដងនៅប្រទេសវេណេហ្ស៊ូអេឡាកាលពីយប់មិញ (ម្ដងមានកម្រិត៧,៥រ៉ិចទ័រ និងម្ដងទៀតមានកម្រិត៧,២រ៉ិចទ័រ) កើនឡើងដល់១៦៤នាក់ ។ ចំណែកអ្នករបួសកើនឡើងដល់៩៧១នាក់។ នេះបើយោងតាមការបញ្ជាក់របស់ប្រធានាធិបតីស្ដីទីវេណេហ្ស៊ូអេឡា លោកស្រីឌែលស៊ី រ៉ូឌ្រីហ្គេស (Delcy Rodríguez)។ លោកស្រីថ្លែងបន្តទៀតថាក្រុមអ្នកជួយសង្គ្រោះកំពុងធ្វើដំណើរជាប្រញាប់ទៅកាន់តំបន់រងគ្រោះខ្លាំងជាងគេដើម្បីជួយទាញយកមនុស្សដែលកប់នៅក្នុងគំនរបាក់បែក។
គ្រោះរញ្ជួយដីដែលកើតឡើងកាលពីយប់ថ្ងៃពុធនោះជាករណីធ្ងន់ធ្ងរបំផុតនៅក្នុងរយៈពេលជាងមួយសតវត្សចុងក្រោយ។ ប្រទេសនានានៅទូទាំងតំបន់អាមេរិកខាងត្បូងសុទ្ធតែទទួលរងការរញ្ជួយតិចៗគ្រប់ៗគ្នា។ ព្រលានយន្តហោះធំជាងគេរបស់ប្រទេសវេណេហ្ស៊ូអេឡាបានរងការខូចខាត ហើយត្រូវបិទទ្វារជាបណ្ដោះអាសន្ន។ អ្នករស់នៅក្នុងអគារត្រូវជម្លៀសខ្លួនចេញទៅខាងក្រៅ, ទៅសម្រាកតាមចិញ្ចើមផ្លូវ ឬកន្លែងសមគួរណាមួយ។ អ្នកដែលត្រូវជម្លៀសចេញពីអគារមានរហូតដល់តំបន់ព្រៃអាម៉ាហ្សូននៃប្រទេសប្រេស៊ីលដែលស្ថិតនៅចម្ងាយ១៧០០គីឡូម៉ែត្រពីរដ្ឋធានីការ៉ាកាស់របស់ប្រទេសវេណេហ្ស៊ូអេឡា។
យោងតាមការផ្សាយរបស់ទូរទស្សន៍នៅថ្ងៃនេះ គេឃើញថាក្រុមអ្នកជួយសង្គ្រោះប្រើប្រាស់គ្រឿងចក្រដ៏មានថាមពលខ្លាំងក្លាដើម្បីរើកកាយគំនរបេតុង។ គេឃើញប្រជាជនវេណេហ្ស៊ូអេឡាដែលមានអារម្មណ៍ភិតភ័យនៅទីក្រុងការ៉ាកាស់បានបង្ខំចិត្តចាកចេញពីអគារដើម្បីសម្រាកនៅតាមផ្លូវ។ អ្នកខ្លះខិតខំស្វែងរកសាច់ញាតិដែលបាត់ខ្លួន។ នៅក្នុងឈុតមួយដែលគេចាក់ផ្សាយតាមទូរទស្សន៍ គេឃើញកុមារបីនាក់មានធូលីហ៊ុមព័ទ្ធយ៉ាងជុំជិត។ ប៉ុន្តែសំណាងល្អ ពួកគេនៅមានជីវិតរស់នៅនៅឡើយទេ។ ពួកគេត្រូវក្រុមជួយសង្គ្រោះទាញចេញពីគំនរបាក់បែកនៅរដ្ឋឡាក្វាអ៊ីរ៉ា (La Guaira) ដែលលោកស្រីរ៉ូឌ្រីហ្គេសចាត់ទុកថាជា «តំបន់មហន្តរាយ» និងជាតំបន់ដែលរងការវាយប្រហារដ៏ខ្លាំងក្លាបំផុត។ នៅទីនេះ អគារបាក់រលំច្រើនណាស់។
លោកស្រីថ្លែងថាអាជ្ញាធរកៀរគរក្រុមអ្នកជួយសង្គ្រោះទូទាំងប្រទេសទៅរដ្ឋឡាក្វាអ៊ីរ៉ា។ ពួកគេកំពុងខិតខំឱ្យអស់ពីសមត្ថភាពទាន់ពេលមេឃនៅភ្លឺដើម្បីពន្លឿនការស្វែងរក និងជួយសង្គ្រោះមនុស្សដែលគេជឿជាក់ថាជាប់ផុងនៅក្នុងគំនរបាក់បែក។ លោកស្រីថ្លែងថាអគាររាប់សិបខ្នងបានបាក់រលំ, យើងកំពុងខិតខំជួយសង្គ្រោះអ្នកដែលអាចរស់រានមានជីវិត។ តាមរយៈវីឌីអូដែលគេចែករំលែកតគ្នាតាមអនឡាញ គេឃើញមនុស្សរាប់សិបនាក់សម្រាកព្យាបាលមុខរបួសនៅមន្ទីរពេទ្យមួយកន្លែងនៃរដ្ឋឡាក្វាអ៊ីរ៉ា។ អ្នកខ្លះដេកផ្ទាល់នឹងដី និងអ្នកខ្លះទៀតដេកនៅលើគ្រែពេទ្យ៕ ប្រភព៖ AP
ចែករំលែកព័តមាននេះ