ក្រុមជនសង្ស័យប្រើប្រាស់ឧបករណ៍ឆ.ក់ត្រីស៊េរីថ្មី និងអាវុ.ធកែច្នៃ រត់គេចខ្លួនបាត់ បន្ទាប់ពីកម្លាំងជំនាញឆ្មក់ចូលបង្ក្រា.បក្នុងតំបន់រ៉ាមសារ
- ស្ទឹងត្រែង
ខេត្តស្ទឹងត្រែង៖សកម្មភាពបំផ្លិចបំផ្លាញធនធានជលផល និងការគំរាមកំហែងដល់ប្រព័ន្ធអេកូឡូស៊ីនៅក្នុងតំបន់ដីសើម នៅតែបន្តកើតមាន ក្នុងខណៈដែលអាជ្ញាធរជំនាញកំពុងបង្កើនកម្តៅក្នុងការដេញបង្ក្រាបយ៉ាងក្តៅគគុក។
ជាក់ស្តែង កាលពីពាក់កណ្តាលអធ្រាត្រឈានចូលថ្ងៃទី២៥ ខែមិថុនា ឆ្នាំ២០២៦ នេះ មុខសញ្ញាសង្ស័យចំនួន ២នាក់ បានដោះដៃរត់គេចខ្លួនទាំងប្រថុយប្រថាន បន្ទាប់ពីកម្លាំងចម្រុះបានឆ្មក់ចូលទីតាំងជំរុំលាក់ខ្លួនខុសច្បាប់មួយកន្លែង។
ប្រតិបត្តិការចុះល្បាតនេះដឹកនាំដោយលោក ផេង នីតា ប្រធានស្នាក់ការរងកោះឫស្សី ដោយមានការចូលរួមពីមន្ត្រីឧទ្យានុរក្ស និងកម្លាំងសហគមន៍នេសាទមកពីកោះព្នៅ កោះឈើទាលតូច និងអូរស្វាយ។ ក្រុមការងារចល័តល្បាតចាប់ពីស្នាក់ការតំបន់រ៉ាមសារ រហូតដល់ចំណុចកោះតាថៅ (និយាមកា 603948-1537007) ដែលស្ថិតក្នុងភូមិកោះឈើទាលតូច ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង។
ជាលទ្ធផល នៅក្នុងរង្វង់ប្រតិបត្តិការនោះ ក្រុមជនសង្ស័យបានដឹងខ្លួនមុន និងបានបើកទូករត់គេចខ្លួនចេញពីជំរុំរកត្រីបាត់ស្រមោល។ ទោះជាយ៉ាងណា កម្លាំងបង្ក្រាបបានដកហូតវត្ថុតាងខុសច្បាប់ និងគ្រោះថ្នាក់មួយចំនួនធំ រួមមាន៖ឧបករណ៍ឆក់ត្រីសេរីថ្មី ចំនួន ២គ្រឿង (ឧបករណ៍ឆក់ក្តៅ ១គ្រឿង និងឆក់ត្រជាក់ ១គ្រឿង) ព្រមទាំងកន្ត្រង់ដងត្រី អាគុយ ៤០អំពែ ចំនួន ១គ្រឿង និងផ្ទាំងសូឡា (ទំហំ ៦០គុណ១០០) ចំនួន ១គ្រឿង ទូកស្មាច់ក្បាលស្រួច ពណ៌ត្រួយចេក ១គ្រឿង បំពាក់ ម៉ាស៊ីនម៉ាកហ៊ីណូតា (Hinota) ចំនួន ២គ្រឿង (កម្លាំង ៧សេះ ១គ្រឿង និង ២៥សេះ ១គ្រឿង)អាវុធ (កាំភ្លើងកែច្នៃ) ចំនួន ២ដើម។
យោងតាមការបកស្រាយរបស់ជំនាញថា៖ ការប្រើប្រាស់ឧបករណ៍ឆក់សេរីថ្មី(ទាំងប្រភេទក្តៅនិងត្រជាក់) មិនត្រឹមតែបំផ្លាញជីវៈចម្រុះ និងពូជត្រីកម្រៗក្នុងតំបន់ការពារប៉ុណ្ណោះទេ ប៉ុន្តែវាជាការបំផ្លាញខ្សែចង្វាក់អាហារ និងសក្តានុពលទេសចរណ៍ធម្មជាតិនៃតំបន់ដីសើមរ៉ាមសារទាំងមូលផងដែរ។ លើសពីនេះ ការរកឃើញអាវុធកែច្នៃនៅក្នុងជំរុំខុសច្បាប់នេះ បង្ហាញពីហានិភ័យខ្ពស់ផ្នែកសន្តិសុខ ដែលអាចបង្កគ្រោះថ្នាក់ដល់អាយុជីវិតរបស់មន្ត្រីឧទ្យានុរក្ស និងប្រជាសហគមន៍ដែលខិតខំការពារធនធានជលផល។
បច្ចុប្បន្ន វត្ថុតាងទាំងអស់ត្រូវបានកម្លាំងចម្រុះប្រមូល និងដឹកជញ្ជូនយកទៅរក្សាទុកជាបណ្តោះអាសន្ននៅស្នាក់ការតំបន់រ៉ាមសារ។ អាជ្ញាធរជំនាញបានអះអាងថា ទោះបីជាជនសង្ស័យទាំង ២នាក់ បានរត់គេចខ្លួនក្នុងពេលយប់ងងឹតក៏ដោយ ក៏កម្លាំងសមត្ថកិច្ចកំពុងតែបន្តស្រាវជ្រាវយ៉ាងយកចិត្តទុកដាក់ ដើម្បីកំណត់អត្តសញ្ញាណ និងនាំខ្លួនជនល្មើសមកអនុវត្តទណ្ឌកម្មតាមនីតិវិធីច្បាប់ជាធរមាន ដោយមិនមានការលើកលែងឡើយ ដើម្បីពង្រឹងច្បាបតំបន់ការពារធម្មជាតិ និងធានាសុវត្ថិភាពសង្គម៕
ចែករំលែកព័តមាននេះ