ទីក្រុងតូក្យូ៖ គ្រោះរញ្ជួយដីដ៏ធំមួយវាយប្រហារប្រទេសជប៉ុននៅថ្ងៃនេះ ប៉ុន្តែក្រុមភូមិសាស្ត្រប្រមើលឃើញថាមិនបង្កជារលកយក្សស៊ូណាមីទេ។ គ្រោះរញ្ជួយដីនេះមានកម្រិត៧,២រ៉ិចទ័រនៅតំបន់ឆ្នេរសមុទ្រអ៊ីវ៉ាតេ (Iwate) ដែលស្ថិតនៅភាគខាងកើតប្រទេសជប៉ុន។ កាលពីមុននេះ ក្រុមឧតុនិយមវាយតម្លៃថាគ្រោះរញ្ជួយដីមានកម្រិត៦,៩រ៉ិចទ័រ ក្រោយមកធ្វើបច្បុបន្នកម្មទៅ៧,២រ៉ិចទ័រ។ គ្រោះរញ្ជួយដីនេះមានចំណុចចាប់ផ្ដើមពីសម្បកផែនដីជម្រៅ៥០គីឡូម៉ែត្រចុះទៅក្រោម។ នេះបើយោងតាមការស្រាវជ្រាវរបស់ក្រុមភូគព្ភសាស្ត្រអាមេរិកដែលវាស់ឃើញថាការរញ្ជួយដីនេះមានកម្រិត៦,៩រ៉ិចទ័រផងដែរ។
គ្រោះរញ្ជួយដីលើកនេះកើតឡើងនៅលើទីតាំងដែលធ្លាប់មានករណីនេះកើតឡើងជាញឹកញាប់នៅក្នុងរយៈពេលប៉ុន្មានខែចុងក្រោយ។ ក្នុងនោះមានករណីរញ្ជួយដីធំគួរសម១កាលពីខែធ្នូ ឆ្នាំ២០២៥ ធ្វើឱ្យអាជ្ញាធរចេញសេចក្ដីប្រកាសឱ្យប្រជាជនប្រុងប្រយ័ត្នចំពោះហេតុការណ៍នេះដែលអាចបន្តកើតមានរយៈពេល១សប្ដាហ៍។ គ្រោះរញ្ជួយដីដែលវាយប្រហារប្រទេសជប៉ុនភាគខាងជើងកាលពីព្រឹកមិញក៏រញ្ជួយដល់ទីក្រុងតូក្យូផងដែរ។ ប៉ុន្តែមិនមានសេចក្ដីរាយការណ៍ថាមានករណីរងរបួស ឬខូចខាតទ្រព្យសម្បត្តិទេ។ នេះបើយោងតាមការបញ្ជាក់របស់អ្នកនាំពាក្យរដ្ឋាភិបាលជប៉ុន។
នាយករដ្ឋមន្ត្រីជប៉ុន លោកស្រីសាណាអិ តាកាអ៊ីឈិ ថ្លែងប្រាប់អ្នកសារព័ត៌មានថាក្រុមដោះស្រាយបញ្ហាលំបាកនៅក្នុងគ្រាអាសន្នរបស់រដ្ឋាភិបាលលោកស្រីផ្ដោតសំខាន់លើការថែរក្សាអាយុជីវិតរបស់មនុស្សឱ្យនៅគង់វង្ស។ ក្រុមការងារក៏កំពុងវាយតម្លៃព័ត៌មានដែលទទួលបាន និងត្រៀមដាក់ចេញប្រតិបត្តិការជួយដោះស្រាយបញ្ហានៅក្នុងគ្រាលំបាកប្រសិនបើមានការតម្រូវឱ្យធ្វើដូច្នេះ។ លោកស្រីបាអំពាវនាវឱ្យប្រជាជនដែលរស់នៅលើទីតាំងរងគ្រោះរក្សាអារម្មណ៍ឱ្យនឹងនប្រសិនបើមានការរញ្ជួយដីកម្រិតតូចៗ (aftershock) កើតឡើងជាខាងក្រោយទៀត។
នាយកសាលាបឋមសិក្សាប្រចាំទីក្រុងហាស៊ីកាមី (Hashikami) នៃខេត្តអាអូម៉ូរី (Aomori) ថ្លែងប្រាប់ទូរទស្សន៍អឹនអេចខេថា (NHK) លោកស្រីកំពុងធ្វើដំណើរនៅតាមផ្លូវសុខៗស្រាប់តែស្ដាប់ឮសំឡេងប្រកាសអាសន្នឱ្យប្រជាជនប្រុងប្រយ័ត្នចំពោះគ្រោះរញ្ជួយដី។ កូនសិស្សនៅក្នុងសាលារៀនរបស់លោកស្រីមានសុវត្ថិភាពគ្រប់ៗគ្នា។ ប៉ុន្តែសិស្សខ្លះស្រែកយំកងរំពងដោយសេចក្ដីភ័យខ្លាច។ សិស្សទាំងអស់ត្រូវផ្អាករៀនសូត្រសិននៅក្នុងស្ថានភាពបែបនេះ។ លោកស្រីបញ្ជាក់ថាពួកគេទាំងអស់វិលត្រឡប់ទៅផ្ទះវិញដោយសុវត្ថិភាព៕ ប្រភព៖ AP
ចែករំលែកព័តមាននេះ