ទីក្រុងគូឡាឡាំពួ ៖ «ស៊ូណាមិទុរេន» កំពុងតែកើតមានឡើងនៅក្នុងប្រទេសម៉ាឡេស៊ី ដោយសារតែការប្រមូលផលបានយ៉ាងច្រើនលើសលប់ និងផ្លែទុរេនសល់ច្រើនជាប់គាំងមិនអាចនាំចេញបាន។ កត្តានេះបានធ្វើឱ្យតម្លៃផ្លែទុរេនដាំក្បាលចុះយ៉ាងគំហុក ជំរុញឱ្យប្រជាជនម៉ាឡេស៊ីសម្រុកទៅទិញនៅតាមស្តង់លក់យ៉ាងច្រើនកុះករ។ នេះបើតាមប្រភពពី AFP បានចេញផ្សាយ។
កាលពីថ្ងៃទី២៤ ខែមិថុនា ឆ្នាំ២០២៦ ប្រជាជនចូលចិត្តទទួលទានទុរេនបានប្រមូលផ្តុំគ្នាណែនណាន់តាន់តាប់នៅក្នុងបណ្តាអាហារដ្ឋាន និងស្តង់លក់ដូរតាមដងផ្លូវជុំវិញទីក្រុងគូឡាឡាំពួ ដើម្បីទិញទុរេនតម្លៃថោកមិនធ្លាប់មាននេះ។ តម្លៃទុរេនពូជលេខ ១ មួយចំនួនបានធ្លាក់ថ្លៃដល់ ៩០%។ តួយ៉ាង ពូជទុរេនម៉ូសាំងឃីង (Musang King) ដែលជាពូជល្បីជាងគេរបស់ប្រទេសម៉ាឡេស៊ី ឥឡូវនេះមានតម្លៃត្រឹមតែ ៩ រីងហ្គីត ឬ ២,២ ដុល្លារអាមេរិកប៉ុណ្ណោះក្នុង១គីឡូក្រាមប៉ុណ្ណោះ។ ទុរេនម៉ូសាំងឃីង ជាពូជគេនិយមទទួលទាននៅក្នុងស្រុក និងនាំចេញទៅក្រៅប្រទេសជាចម្បង គឺប្រទេសចិន។
បច្ចុប្បន្ន ប្រទេសម៉ាឡេស៊ីកំពុងស្ថិតនៅក្នុងរដូវកាលប្រមូលផលខ្ពស់បំផុត ដោយប្រមូលផលបានច្រើនជាង៥៥ម៉ឺនតោនក្នុង១ឆ្នាំ។ របាយការណ៍បានឱ្យដឹងថា ទុរេនម៉ូសាំងឃីងបានធ្លាក់ថ្លៃពី ៩០ រីងហ្គីត ឬ ២២ ដុល្លារ មកនៅសល់ត្រឹមតែ ៩ រីងហ្គីតក្នុង១គីឡូក្រាម រីឯពូជល្បីៗផ្សេងទៀត ដូចជា ម្ជុលខ្មៅ ឬ Black Thorn ក៏ធ្លាក់ថ្លៃដូចគ្នាដែរ។ ចំណែកឯពូជដែលថោកជាងនេះ ត្រូវបានលក់បោះដុំនៅក្នុងតម្លៃ ១០០ រីងហ្គីត ឬ ២៤ ដុល្លារ សម្រាប់១កន្ត្រកដែលមាន ៧ ផ្លែ។
លោក Faisal Iswardi Ismail អនុប្រធានអាជ្ញាធរទីផ្សារកសិកម្មសហព័ន្ធរបស់ប្រទេសម៉ាឡេស៊ី បានប្រាប់អ្នកសារព័ត៌មានថា «យើងបានដឹងថា ឆ្នាំនេះ នឹងមានស៊ូណាមិទុរេនម៉ូសាំងឃីង ហើយវាកំពុងតែកើតឡើងពិតប្រាកដមែន។ យើងសង្ឃឹមថា តម្លៃនឹងអាចងើបឡើងវិញក្នុងរយៈពេលប៉ុន្មានសប្តាហ៍ខាងមុខនេះ»។
អ្នកគ្រប់គ្រងហាងលក់ទុរេនមួយកន្លែង នៅទីក្រុងប៉េតាលីង ចាយ៉ា (Petaling Jaya) រដ្ឋសេឡាំងហ្គ័រ (Selangor) បានប្រាប់ទីភ្នាក់ងារសារព័ត៌មាន AFP ថា «ទុរេនបានក្លាយជាផ្លែឈើដែលប្រជាជនទូទៅអាចមានលទ្ធភាពទិញញ៉ាំបាន ដោយមានតម្លៃដូចទៅនឹងទុរេនលក់តាមភូមិ កាលពីមុនអញ្ចឹង។ ទុរេនឆ្នាំនេះ បានក្លាយជាទុរេនថោកបំផុតមិនធ្លាប់មានពីមុន។ ដូច្នេះមអាជីវករមានការបារម្ភអំពីការធ្លាក់ចុះនេះ ដោយសារប្រាក់ចំណេញមិនសូវល្អ។ ប៉ុន្តែពួកគេត្រូវតែលក់ ហើយអាជីវកម្មត្រូវតែបន្តទៅមុខទៀត»៕
ចែករំលែកព័តមាននេះ