ជំរុញយន្តការទំនាក់ទំនងផ្ទៃក្នុងរវាងមន្ត្រីពាក់ព័ន្ធ និងជំរុញការផ្តល់សេវាជូនពលរដ្ឋ
- ភ្នំពេញ
រាជធានីភ្នំពេញ ៖ នៅសាលារាជធានីភ្នំពេញ កាលពីរសៀលថ្ងៃទី២៤ ខែមិថុនា ឆ្នាំ២០២៦កន្លងទៅ មានបើកកិច្ចប្រជុំពិភាក្សាលើការជំរុញការផ្តល់សេវាសាធារណៈ ជាពិសេស សេវាសុរិយោដីជូនប្រជាពលរដ្ឋក្នុងមូលដ្ឋានរាជធានីភ្នំពេញ ក្រោមអធិបតីភាពឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ និងឯកឧត្តម ឃួង ស្រេង អភិបាលរាជធានីភ្នំពេញ ។
ឯកឧត្តម ឃួង ស្រេង បានផ្តល់ជាយោបល់ក្នុងអង្គប្រជុំថា គួរមានយន្តការទំនាក់ទំនងផ្ទៃក្នុងរវាងមន្ត្រីផ្តល់សេវា ទាំងភាគីអគ្គនាយកដ្ឋានពន្ធដារ អង្គភាពច្រកចេញចូលតែមួយ និងមន្ទីររៀបចំដែនដី នគរូបនីយកម្ម សំណង់ និងសុរិយោដី ដើម្បីជំរុញនីតិវិធីផ្តល់សេវាជូនប្រជាពលរដ្ឋកាន់តែល្អប្រសើរ ។
ឯកឧត្តម ឃួង ស្រេង បានលើកឡើងថា មន្ត្រីពាក់ព័ន្ធគ្រប់ផ្នែកទាំងអស់ ត្រូវយកចិត្តទុកដាក់ពង្រឹងការផ្ដល់សេវាសាធារណ:ជូនប្រជាពលរដ្ឋ ជាពិសេស សេវាសុរិយោដីឲ្យមានប្រសិទ្ធភាពខ្ពស់ និងល្អប្រសើរជាងមុនថែមទៀត ។ លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញបានឱ្យដឹងថា បន្ទាប់ពីស្តាប់របាយការណ៍របស់លោកប្រធានមន្ទីររៀបចំដែនដី នគរូបនីយកម្ម សំណង់និងសុរិយោដី ស្តីពីវឌ្ឍនភាពនៃការផ្តល់សេវាសុរិយោដីរួចមក ឯកឧត្តម គង់ វិបុល អគ្គនាយកនៃអគ្គនាយកដ្ឋានដារថ្លែងថា កិច្ចប្រជុំថ្ងៃនេះ គឺជារឿងល្អបំផុត ធ្វើយ៉ាងណាឲ្យមន្ត្រីជំនាញពាក់ព័ន្ធអាចបន្ស៊ីការងាររបស់ខ្លូន និងពិភាក្សារកមធ្យោបាយ ដើម្បីជំរុញការផ្តល់សេវាជូនប្រជាពលរដ្ឋឲ្យបានកាន់តែល្អប្រសើរ ។
ជាមួយគ្នានេះ ឯកឧត្តមបានឱ្យអគ្គនាយករងធ្វើបទបង្ហាញខ្លី ស្តីពីយន្តការនៃការផ្តល់សេវាបង់ពន្ធប្រថាប់ត្រា និងការបង់ពន្ធនានាដែលអគ្គនាយកដ្ឋានបាននិងកំពុងអនុវត្ត ដោយប្រេប្រាស់ប្រព័ន្ធបច្ចេកវិទ្យា ហើយផ្តល់លទ្ធភាពជូនមន្ត្រី និងប្រជាពលរដ្ឋ អាចមើលឃើញពីលំហូរចរន្តរលិខិតស្នាមបានដោយងាយស្រួល ។
ឯកឧត្តម ឃួង ស្រេង បានណែនាំមន្ត្រីពាក់ព័ន្ធគ្រប់ផ្នែក ត្រូវពង្រឹងការផ្ដល់សេវាសា ធារណៈក្នុង ភូមិសាស្ត្ររាជធានីភ្នំពេញ ឱ្យកាន់តែល្អប្រសើរ ពិសេស ការផ្ដល់សេវាសុរិយោដី និងជំរុញផ្សព្វផ្សាយបន្ថែមពីការផ្តល់សេវារដ្ឋបាល តាមប្រព័ន្ធអនឡាញ(Online) នៅអង្គភាពច្រកចេញចូលតែមួយរាជធានីភ្នំពេញ ៕
ចែករំលែកព័តមាននេះ