រឿងទិញស្រាបៀររំលងផ្ទះ! ផ្ទុះជម្លោះរវាងអ្នកលក់ចាប់ហួយ និងអ្នកទិញ ផ្អើលអ្នកភូមិដេកមិនបានប្តឹងឱ្យជួយអន្តរាគមន៍
- ភ្នំពេញ
រាជធានីភ្នំពេញ ៖ ព្រោះតែរឿងទិញស្រាបៀររំលងផ្ទះ ផ្ទុះជម្លោះរវាងអ្នកលក់ចាប់ហួយនិងអ្នកទិញ រហូតឈានដល់ហិង្សា បណ្តាលឱ្យបែកបាក់ខូចខាតទ្រព្យសម្បត្តិ ផ្អើលពេញភូមិកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី២៦ ខែឧសភា ឆ្នាំ២០២៦ នៅក្រោយវិហារអ្នកតាម្ចាស់ស្រុក ដើមពោធិ៍ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញភាគី «ក» អង្គុយផឹកស៊ីជុំគ្នា រួចដើរទៅទិញគ្រឿងស្រវឹងកំប៉ុង នៅផ្ទះលក់ចាប់ហួយមួយកន្លែង ដែលស្ថិតនៅហួសផ្ទះភាគី «ខ» ។
គួរបញ្ជាក់ថា ភាគី «ខ» ជាអ្នកលក់ចាប់ហួយដូចគ្នា ដោយកន្លងមក ភាគី «ក» តែងតែទៅទិញ និងជំពាក់កន្លែងគាត់រហូត ។
អ្នកឃើញហេតុការណ៍បានបន្តថា ដោយសារតែមិនទិញកន្លែងរបស់ខ្លួន ភាគី «ខ» បានបោះសម្តីផ្លែផ្កាទៅកាន់ភាគី «ក» ទើបធ្វើឲ្យភាគី «ក» ខឹងក៏កើតជាជម្លោះពាក្យសម្តីតែម្តង ។ លុះប្រកែកគ្នាទៅមក មិនឈ្នះមិនចាញ់ ភាគី «ខ» បានឌឺដងបន្ថែម ដោយធ្វើមាត់ពោលពាក្យថា «គ្រូក គ្រូក» ដូចហៅមាន់ ធ្វើឲ្យភាគី «ក» ខឹង កើតជាហិង្សាវាយគ្នាទៅមក រហូតបែកបាក់ទ្រព្យសម្បត្តិ បង្កការភ្ញាក់ផ្អើលពេញភូមិ ។
ការឈ្លោះប្រកែកគ្នានេះ បានធ្វើឱ្យអ្នកភូមិគេងមិនបាន ក៏ទាក់ទងហៅសមត្ថកិច្ច ទើបគេឃើញមានកម្លាំងអាវុធហត្ថ និងសមត្ថកិច្ចមូលដ្ឋាន ចុះមកដល់ទីតាំងកើតហេតុតែម្តង ។
ភាគីទាំងសងខាង ត្រូវបានកម្លាំងអាវុធហត្ថនាំខ្លួន ទៅកាន់មូលដ្ឋានកងរាជអាវុធហត្ថខណ្ឌមានជ័យ ដើម្បីធ្វើការអនុវត្តបន្តតាមនីតិវិធីនៅពេលក្រោយ ៕
ចែករំលែកព័តមាននេះ