រាជធានីភ្នំពេញ ៖ សមត្ថកិច្ចច្បារអំពៅទី២ បង្ក្រាបឃាត់ខ្លួនជនសង្ស័យ០៣នាក់ ក្នុងបន្ទប់ជួល ពាក់ព័ន្ធបទល្មើស ប្រើប្រាស់ និងជួញដូរគ្រឿងញៀន ។
ការឃាត់ខ្លួននេះដែរ បានធ្វើឡើងកាលពីវេលាម៉ោង១០និង ៣០នាទីព្រឹកថ្ងៃទី១៥ ខែមិថុនា ឆ្នាំ២០២៦ នៅចំណុចបន្ទប់ជួលគ្មានលេខ ផ្លូវបេតុង ភូមិដើមចាន់១ សង្កាច្បារអំពៅ២ ខណ្ឌច្បារអំពៅ រាជធានីភ្នំពេញ ។
ជនសង្ស័យទាំង០៣នាក់ រួមមាន ៖
ទី១.ឈ្មោះ អ៊ុក វណ្ណរ៉ូ ភេទប្រុស អាយុ ៣៨ ឆ្នាំ ជនជាតិខ្មែរ មុខរបរមិនពិតប្រាកដ
ទី២.ឈ្មោះ សុភាព ម៉ានិត ភេទប្រុស អាយុ ២៣ ឆ្នាំ ជនជាតិខ្មែរ មុខរបរមិនពិតប្រាកដ
និងទី៣.ឈ្មោះ សេង ស្រីនាងភេទស្រី អាយុ ២៣ ឆ្នាំ ជនជាតិខ្មែរ មុខរបរមិនពិតប្រាកដ ។
តាមការបញ្ជាក់ពីនគរបាលបានអោយដឹងថា ដោយអនុវត្តតាមបទបញ្ជាឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ លោកវរសេនីយ៍ឯក ម៉ៅ សឿត អធិការនគរបាលខណ្ឌច្បារអំពៅ បញ្ជាអោយលោកវរសេនីយ៍ត្រី អ៊ុ រតនា នាយប៉ុស្តិ៍នគរបាលច្បារអំពៅទី២ ចុះដឹកនាំមន្ត្រីប៉ុស្តិ៍ ដើម្បីបោសសម្អាតរាល់បទល្មើសគ្រឿងញៀនក្នុងមូលដ្ឋាន ដើម្បីការពារសុខសុវត្ថិភាពជូនពលរដ្ឋ ។
នគរបាលបន្តថា ការឃាត់ខ្លួនជនសង្ស័យទាំង០៣នាក់ (ស្រី០១នាក់)ខាងលើនេះផងដែរថា បន្ទាប់ពីទទួលបានការរាយការណ៍ ពីប្រជាពលរដ្ឋ នៅតំបន់ភូមិដើមចាន់ខាងលើ មានក្រុមជនសង្ស័យមួយក្រុមប្រមូលផ្តុំគ្នា ប្រើប្រាស់គ្រឿង និងថែមទាំងមានការជួញដូរក្នុងបន្ទប់ជួល។ ភ្លាមៗ កម្លាំងនគរបាលបានចុះទៅកាន់ទីតាំងខាងលើ ធ្វើការឡោមព័ទ្ធ បង្ក្រាបបានជាក់ស្តែង និងឃាត់ជនសង្ស័យទាំង០៣នាក់ ទៅកាន់ប៉ុស្តិ៍ច្បារអំពៅទី២ តែម្តង ។
ក្នុងនោះសមត្ថកិច្ច ដកហូតវត្ថុតាងរួមមាន ក្រាមពណ៌សថ្លា (សង្ស័យជាសារធាតុញៀន) ចំនួន ០១កញ្ចប់ថង់ធំល្មម, ឧបករណ៍សម្រាប់ប្រើប្រាស់គ្រឿងញៀន និងថង់សម្រាប់វិចខ្ចប់គ្រឿងញៀនមួយចំនួន។
បច្ចុប្បន្ន សមត្ថកិច្ចប៉ុស្តិ៍ បានបញ្ជូនជនសង្ស័យខាងលើ និងវត្ថុតាង ទៅកាន់អធិការដ្ឋាននគរបាលខណ្ឌច្បារអំពៅ ដើម្បីអនុវត្តន៍តាមនីតិវិធីច្បាប់ ៕
ចែករំលែកព័តមាននេះ