រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានរំលឹកថា ទោះបីជា ពុំមានកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) ប៉ុន្តែការអភិវឌ្ឍនៅតាមព្រំដែន ជាពិសេសតំបន់ឦសាន្ត នៅតែបន្តអភិវឌ្ឍន៍ដដែល ។
សម្តេចធិបតី ហ៊ុន ម៉ាណែត បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការសមិទ្ធផលនានា នៅក្រុងស្ទឹងត្រែង ខេត្តស្ទឹងត្រែង នៅថ្ងៃទី១២ ខែសីហា ឆ្នាំ២០២៦ថា កាលពីប្រមាណជា ២ឆ្នាំមុន មានបុគ្គលជ្រុលនិយម បានលើកឡើងក្នុងចេតនាបំផុសឱ្យប្រជាពលរដ្ឋមានកំហឹងថា រាជរដ្ឋាភិបាលបានយកទឹកដី ៤ខេត្តរបស់កម្ពុជា មានខេត្តរតនគិរី, ខេត្តមណ្ឌលគិរី, ខេត្តក្រចេះ និងខេត្តស្ទឹងត្រែង ទៅឱ្យប្រទេសក្បែរខាង ក្នុងហេតុផលដាក់បញ្ចូលក្នុងក្របខណ្ឌកិច្ចសហប្រតិបត្តិការ CLV-DTA ។ ប៉ុន្តែសម្តេចធិបតី ឆ្លើយតបថា អ្វីដែលលើកឡើងនេះ មិនពិតទាល់តែសោះ ព្រោះកិច្ចសហប្រតិបត្តិការនេះ មានតាំងពីឆ្នាំ១៩៩៩ មកម្ល៉េះ ដែលបង្កើតឡើងក្នុងគោលបំណងជំរុញការអភិវឌ្ឍសេដ្ឋកិច្ច និងសន្តិសុខតាមព្រំដែនរវាងប្រទេសកម្ពុជា ឡាវ និងវៀតណាម ។
សម្តេចធិបតី បានបន្តថា ប៉ុន្តែបែរជាក្រុមជ្រុលនិយម បានញុះញង់ខុសពីការពិតទៅវិញ ហើយដើម្បីកុំឱ្យប្រជាពលរដ្ឋ មានក្តីកង្វល់នោះ រាជរដ្ឋាភិបាល និងសម្តេចតេជោ ហ៊ុន សែន ដែលជាស្ថាបនិកផ្តួចផ្តើមតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ក៏បានប្រកាសដកខ្លួនចេញពីកាលពីអំឡុងឆ្នាំ២០២៤ ។
សម្តេចធិបតី បានគូសបញ្ជាក់ថា “អ៊ីចឹងអ្វី ដែលសំខាន់គឺការអភិវឌ្ឍរបស់យើង ទោះមានឬមិនមាន CLV-DTA ឬក្របខណ្ឌសហប្រតិបត្តិការ ប៉ុន្តែយើងមានមិនមែនបាត់អធិបតេយ្យភាពទេ ប៉ុន្តែខ្ញុំនិយាយថា ទោះមានមិនមានការអភិវឌ្ឍតំបន់ឦសាននេះ ក៏ស្ថិតនៅក្នុងគោលការណ៍អាទិភាពរបស់រាជរដ្ឋាភិបាល” ។
គួររំលឹកថា រាជរដ្ឋាភិបាលកម្ពុជា បានប្រកាសដកខ្លួនជាផ្លូវការចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) កាលពីថ្ងៃទី២០ ខែកញ្ញា ឆ្នាំ២០២៤។ ការសម្រេចចិត្តនេះ ត្រូវបានធ្វើឡើងបន្ទាប់ពីមានការវាយតម្លៃយ៉ាងល្អិតល្អន់ និងដើម្បីឆ្លើយតបទៅនឹងកង្វល់របស់ប្រជាពលរដ្ឋ ក៏ដូចជាការបង្ការកុំឱ្យក្រុមប្រឆាំងប្រើប្រាស់បញ្ហានេះជាឧបករណ៍នយោបាយញុះញង់ បំបែកបំបាក់សាមគ្គីភាពជាតិ ។
ទោះបីជាដកខ្លួនចេញពីក្របខណ្ឌ CLV-DTA ក៏ដោយ ក៏កម្ពុជានៅតែបន្តរក្សាកិច្ចសហប្រតិបត្តិការទ្វេភាគីជាធម្មតាជាមួយប្រទេសជិតខាងទាំងឡាវ និងវៀតណាម តាមរយៈអាស៊ាន (ASEAN) កិច្ចសហប្រតិបត្តិការតំបន់មេគង្គ និងក្របខណ្ឌអន្តរជាតិនានា ដើម្បីរក្សាសន្តិភាព ស្ថិរភាព និងការអភិវឌ្ឍសេដ្ឋកិច្ច ។
សូមជម្រាបផងដែរ កិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ត្រូវបានផ្តួចផ្តើមបង្កើតឡើងដំបូងនៅក្នុងឆ្នាំ ១៩៩៩ ដោយសម្តេចតេជោ ហ៊ុន សែន អតីតនាយករដ្ឋមន្ត្រី នៃកម្ពុជា ៕
ចែករំលែកព័តមាននេះ