ទីក្រុងតេអេរ៉ង់៖ ក្រោយព្រឹត្តិការណ៍វាយប្រហារពីសំណាក់ក្រុមហ៊ូទីទៅលើនាវាដឹកទំនិញខ្នាតតូចមួយគ្រឿងដែលដោតទង់ជាតិប្រទេសតង់ហ្សានីកាលពីម្សិលមិញ អាមេរិកចាត់វិធានការសងសឹកវិញដោយបាញ់កប៉ាល់ដឹកទូកុងតេណឺមួយគ្រឿងដែលចង់បើកបំពានបម្រាមរបស់ខ្លួនចូលទៅឈប់សំចតនៅកំពង់ផែអ៊ីរ៉ង់។ ក្រុមអ្នកជួយសង្គ្រោះជនជាតិយេម៉េន២នាក់ដែលជាក្រុមប្រឆាំងនឹងពួកឧទ្ទាមហ៊ូទីក៏បានស្លាប់ក្រោមស្នាដៃរបស់ក្រុមហ៊ូទីនៅច្រកសមុទ្របាប អែល មេនដេប (Bab el-Mandeb) ផងដែរ។ នេះបើយោងតាមការបង្ហើបឱ្យដឹងពីឆ្មាំល្បាតដែនសមុទ្រយេម៉េន។ ប្រសិនបើការវាយប្រហារនេះជាការពិតមែន វាជាលើកដំបូងដែលកប៉ាល់ឈ្មោះទីហាម៉ា (Tihamah) របស់ប្រទេសអេហ្ស៊ីបរងការវាយប្រហាររហូតដល់មានមនុស្សស្លាប់ចាប់តាំងពីសង្គ្រាមអ៊ីរ៉ង់ផ្ទុះឡើងដំបូង។
នៅថ្ងៃដដែលនោះ ក្រុមហ៊ូទីប្រកាសទទួលស្គាល់ថាខ្លួនបានវាយប្រហារកប៉ាល់មួយគ្រឿងនៅច្រកសមុទ្របាប អែល មេនដេបពិតមែន។ ហ៊ូទីអះអាងថាដោយសារកប៉ាល់នោះដឹកជញ្ជូនគ្រឿងបរិក្ខារយោធារបស់អារ៉ាប៊ីសាអូឌីត។ ប៉ុន្តែហ៊ូទីមិនបានបញ្ជាក់ថាតើកប៉ាល់ដែលខ្លួនវាយប្រហារនោះឈ្មោះអ្វីទេ។ អារ៉ាប៊ីសាអូឌីតមិនបានឆ្លើយតបទៅនឹងសាររបស់អ្នកសារព័ត៌មានដែលស្នើសុំការឆ្លើយបំភ្លឺអំពីបញ្ហានេះឡើយ។ ទីភ្នាក់ងារអង់គ្លេសដែលធ្វើការលើផ្នែកលំហសមុទ្រ (UKMTO) រាយការណ៍ថាមានហេតុការណ៍ផ្ទុះអាវុធទៅលើកប៉ាល់ដឹកទំនិញមួយករណីកាលពីម្សិលមិញ។ ពួកគេថ្លែងបន្តទៀតថាកប៉ាល់នោះរងការវាយប្រហារដោយមីស៊ីលមួយគ្រាប់ដែលគេមិនស្គាល់អត្តសញ្ញាណ។
របាយការណ៍តាមដានចរាចរណ៍ជើងទឹកបង្ហាញថាកប៉ាល់ដែលរងគ្រោះឈ្មោះទីហាម៉ានោះបើកក្បែរភូមិនេសាទមូរ៉ាត (Murad) កាលពីថ្ងៃទី១១ ខែសីហា។ ជនជាតិប៉ាគីស្ថានបីនាក់ដែលជានាវឹកនៅលើកប៉ាល់នោះបានស្លាប់។ នេះបើយោងតាមការបញ្ជាក់ពីក្រសួងការបរទេសប៉ាគីស្ថាន។ ក្រសួងការបរទេសយេម៉េនថ្លែងថាជនជាតិឥណ្ឌូណេស៊ីម្នាក់ក៏បានស្លាប់នៅក្នុងហេតុការណ៍នោះផងដែរ។ ឆ្មាំល្បាតដែនសមុទ្រយេម៉េនថ្លែងថាក្រោយការវាយប្រហារនោះ នាវឹកនៅលើកប៉ាល់បាត់បង់ម្ចាស់ការទាំងស្រុង។ មិនយូរប៉ុន្មានក្រុមអ្នកជួយសង្គ្រោះ២នាក់មកពីចលនាតស៊ូជាតិដែលប្រឆាំងនឹងក្រុមហ៊ូទីក៏បើកទូកទៅក្បែរកប៉ាល់នោះ ហើយក៏ត្រូវក្រុមហ៊ូទីវាយប្រហារថែមទៀតបណ្ដាលឱ្យពួកគេស្លាប់ទាំង២នាក់។ មនុស្សដប់នាក់រងរបួសនៅក្នុងហេតុការណ៍នោះ, ក្នុងនោះមាននាវឹក៧នាក់។ ហេតុការណ៍នេះកើតឡើងនៅពេលកប៉ាល់បោះយុថ្កាឈប់សំចតនៅភាគឦសានកោះផឺរីម (Perim) ប្រទេសយេម៉េន។
នៅក្នុងព្រឹត្តការណ៍មួយទៀត បញ្ជាការដ្ឋានកណ្ដាលយោធាអាមេរិកប្រកាសថាខ្លួនទើបតែបាញ់មីស៊ីលម៉ាកហឹលហ្វាយអឺ (Hellfire) ២គ្រាប់សំដៅទៅរកកប៉ាល់ដឹកទូកុងតេណឺមួយគ្រឿងដែលដោតទង់ជាតិប៉ាណាម៉ាឈ្មោះវេឡា ណូវ៉ា (Vela Nova)។ ពេលនោះ កប៉ាល់នេះបើកនៅលើឈូងសមុទ្រអូម៉ង់ ហើយប្រុងបើកបង្ហួសចូលកំពង់ផែអ៊ីរ៉ង់។ មិនទាន់ដល់កំពង់ផែផង អាមេរិកពន្លះមួយប្រាវតែម្ដង។ អាមេរិកអះអាងថាខ្លួនផ្ដល់សញ្ញាព្រមានទៅកប៉ាល់នោះរួចហើយដើម្បីកុំឱ្យបើកតម្រង់ទៅដែនសមុទ្រអ៊ីរ៉ង់ ប៉ុន្តែពួកគេមិនព្រមស្ដាប់។ នេះជាលើកទី១២ដែលអាមេរិកវាយប្រហារកប៉ាល់បើកបំពានបម្រាមរបស់ខ្លួនចាប់តាំងពីខ្លួនបិទខ្ទប់ដែនសមុទ្រអ៊ីរ៉ង់កាលពីខែមេសា។ កប៉ាល់នោះទើបតែចូលចតនៅកំពង់ផែទីក្រុងម៉ុមបៃ ប្រទេសឥណ្ឌា និងកំពង់ផែខ្លាំង (Klang) ប្រទេសម៉ាឡេស៊ី។ គេជឿជាក់ថាកប៉ាល់នោះត្រូវបានវាយប្រហារនៅពេលបើកដល់ចំណុចមួយចម្ងាយ១៣១គីឡូម៉ែត្រពីឆ្នេរសមុទ្រប៉ាគីស្ថាន។ ឥឡូវនេះ កប៉ាល់ដែលបើកកាត់ច្រកសមុទ្របាប អែល មេនដេប និងសមុទ្រក្រហមបានថយចុះជាង៥០%ចាប់តាំងពីក្រុមហ៊ុនហ៊ូទីចូលវ៉ាងទីទីនោះចន្លោះពីឆ្នាំ២០២៣ដល់២០២៥៕ ប្រភព៖ Reuters
ចែករំលែកព័តមាននេះ