ខេត្តស្ទឹងត្រែង ៖ រូបភាពមួយសន្លឹកបង្ហាញពីប៉ូលិសស្រីមួយរូបបីកូនតូចក្នុងដៃ និងបំប៉ៅដោះកូនផង នៅទីកន្លែងធ្វើការមួយ ព្រមជាមួយនឹងការស្លៀកឈុតឯកសណ្ឋានជាប៉ូលិសកំពុងទទួលការចាប់អារម្មណ៍ពីមហាជនលើបណ្តាញសង្គមយ៉ាងខ្លាំងក្លាប៉ុន្មានថ្ងៃកន្លងមកនេះ ដោយភាគច្រើនពោលសរសើរថា នាងពិតជាស្ត្រីគម្រូមួយរូបដែលខិតខំបំពេញការងារហើយ ខំប្រឹងមើលថែទាំកូនទៀត ។…
ខេត្តស្ទឹងត្រែង ៖ រូបភាពមួយសន្លឹកបង្ហាញពីប៉ូលិសស្រីមួយរូបបីកូនតូចក្នុងដៃ និងបំប៉ៅដោះកូនផង នៅទីកន្លែងធ្វើការមួយ ព្រមជាមួយនឹងការស្លៀកឈុតឯកសណ្ឋានជាប៉ូលិសកំពុងទទួលការចាប់អារម្មណ៍ពីមហាជនលើបណ្តាញសង្គមយ៉ាងខ្លាំងក្លាប៉ុន្មានថ្ងៃកន្លងមកនេះ ដោយភាគច្រើនពោលសរសើរថា នាងពិតជាស្ត្រីគម្រូមួយរូបដែលខិតខំបំពេញការងារហើយ ខំប្រឹងមើលថែទាំកូនទៀត ។
រូបភាពមួយសន្លឹកបង្ហាញពីស្ត្រីប៉ូលិសស្រីអង្គុយលើកៅអី ដៃម្ខាងបីកូនតូច និងបំប៉ៅកូន នៅចំណុចគោលដៅមួយកន្លែង កំពុងត្រូវបានអ្នកលេងបណ្តាញសង្គមជជែកដេញដោលយ៉ាងខ្លាំងនោះ គឺជារូបភាពនាងខ្ញុំអនុសេនីយ៍ទោ ស៊ីថុង សុខា ដែលស្ត្រីប៉ូលិសរូបនេះបានបង្ហោះលើបណ្តាញសង្គមហ្វេសប៊ុករបស់នាងកាលពីថ្ងៃទី២ ខែមីនា កន្លងទៅ អមជាមួយនឹងខ្លឹមសារសរសេរថា «ព្រោះតែពាក្យថាម្តាយ មិនថាក្នុងកាលៈទេសៈណាទេ ដើម្បីកូនភ្លេចអស់ភាពអៀនខ្មាស់ (នេះហើយជីវិតពិត)» ។
ក៏ប៉ុន្តែមិនដឹងថា ក្រោយការបង្ហោះរូបភាពខាងលើនេះហើយ អ្នកនាង អនុសេនីយ៍ទោ ស៊ីថុង សុខា ត្រូវរងការស្តីបន្ទោសពីខាងណានោះទេ ស្រាប់តែកាលពីរាត្រីថ្ងៃទី៦ មីនា នាងបានបង្ហោះសារថ្មីមួយទៀតលើគណនីហ្វេសប៊ុករបស់នាង ដោយពោលពាក្យថា «នាងខ្ញុំអនុសេនីយ៍ទោ ស៊ីថុង សុខា អត្តលេខ71655 សូមចេញមុខសុំទោសជាសារធារណៈក្នុង FACE BOOK ចំពោះការផុសរូបភាពបំបៅដោះកូននៅកន្លែងធ្វើការ និងស្លៀកឈុតឯកសណ្ឋានកាលពីថ្ងៃទី02/03/2021កន្លងមកនេះ» ។
អ្នកម្តាយរូបនេះបានបន្តថា «ការផុសទៅនេះ នាងខ្ញុំពុំមានគោលបំណងធ្វើអោយប៉ះពាល់ដល់កិត្តិយសអង្គភាពនគរបាល ព្រមទាំងប៉ះពាល់ដល់កិត្តិយសស្ត្រីខ្មែរទេ។ អាស្រ័យដូចនេះ សូមអង្គភាព និងថ្នាក់ដឹកនាំគ្រប់ជាន់ថ្នាក់មេត្តាដោយក្តីអនុគ្រោះ» ។
ជាមួយនឹងការបង្ហោះសារសុំការអភ័យទោសពីមហាជន ចំពោះការបង្ហោះរូបភាពខាងលើនេះ អ្នកម្តាយរូបនេះហាក់ទទួលបានការកោតសរសើរពីមហាជន ជាជាងរងនូវការស្តីបន្ទោស ព្រោះក្រោយពីការបង្ហោះរូបភាព និងសារសុំការអនុគ្រោះពីមហាជននោះ គឺឃើញមានបងប្អូនអ្នកលេងបណ្តាញសង្គមចែកចាយយ៉ាងផុសផុល និងចូលបញ្ចេញទស្សនៈគាំទ្ររូបនាងទៅវិញ ។
ជាក់ស្តែងម្ចាស់គណនីហ្វេសប៊ុកឈ្មោះ សុធារី បានពោលលើកទឹកចិត្តប្អូនស្រីប៉ូលិសថា «វាមិនមែនជាទង្វើខុសឆ្គងទេប្អូនស្រី សូមសរសើរដល់ប្អូនដែលនៅបំបៅដោះកូនដោយទឹកដោះម្តាយ» ។
ចំណែកអ្នកខ្លះទៀតបាននិយាយថា « ខ្ញុំមិនគិតថាខុសអីទេបង តួនាទីការងារក៏បងទទួលខុសត្រូវ ការងារមើលថែកូនក៏បងទទួលខុសត្រូវ មានតែគោរពនូវទឹកចិត្តបង» ។
ចំណែកបងប្រុសសុភា ក៏បានបង្ហាញនូវទឹកចិត្តរបស់លោកចំពោះរូបភាពស្ត្រីប៉ូលិសថា «សម្រាប់ខ្ញុំ គឺសូមគោរព និងកោតសសើរដល់គាត់ណាស់ ខំបំពេញការងារហើយ ខំប្រឹងមើលថែទាំកូនទៀត! ពិតជាស្ត្រីគម្រូណាស់!» ។
ចំណែកអ្នកខ្លះទៀតក៏គាំទ្រថា «អ្នកដែលស្តីបន្ទោសគាត់ គឺអ្នកដែលមិនធ្លាប់មានឱកាសជាម្តាយ និងមិនយល់ពីតម្លៃរបស់ស្ត្រីពិតប្រាកដ!» ។ ប្រាកដណាស់តួនាទីជាម្តាយដែលត្រូវបំប៉ៅដោះកូនតូចដែលកំពុងតែស្រែកឃ្លានវាមិនមែនជាកំហុសឡើយ ព្រោះនោះជាអ្វីដែលម្តាយគ្រប់រូបត្រូវបំពេញ ។ ហើយនេះ ក៏មិនមែនជាករណីដាច់ដោយឡែកអ្វីនោះដែរ ។
គេនៅចាំច្បាស់កាលពីអំឡុងខែឧសភា ឆ្នាំ២០១៧ រូបភាព សមាជិកព្រឹទ្ធសភាអូស្ត្រាលីអ្នកនាង Larissa Waters បានក្លាយជាអ្នកនយោបាយដំបូងគេបង្អស់ដែលបំបៅកូនដោយទឹកដោះនៅក្នុងរដ្ឋសភារបស់ប្រទេសអូស្ត្រាលី ។ លោកស្រី Waters មកពីគណបក្សឆ្វេងនិយម Greens បានបំប៉ៅដោះកូនស្រីអាយុ២ខែឈ្មោះ Alia Joy ក្នុងអំឡុងពេលប្រជុំព្រឹទ្ធសភា ត្រូវបានពិភពលោក និងសារព័ត៌មានល្បីចុះផ្សាយព្រោងព្រាត និងគាំទ្រដល់ការជម្រុញ និងលើកទឹកចិត្តនារីឲ្យបំប៉ៅដោះកូនជាមួយនឹងទឹកដោះម្តាយផងដែរ ។
ករណីមួយទៀត ដែលពិភពលោកចាប់អារម្មណ៍ដែរនោះ គឺលោក Trevor Mallard ក៏បានបញ្ចុកទឹកដោះកូនប្រុសរបស់លោកនៅពេលលោកទៅចូលរួមធ្វើជាវាលគ្មិននៅការជជែកដេញដោលនៅកិច្ចប្រជុំនៅរដ្ឋសភាប្រទេសនូវែលហ្សេឡង់ កាលពីខែសីហា ឆ្នាំ ២០១៩ ។
រូបភាពពេលនោះ គឺលោកបានចាប់បីកូនតូច និងបំប៉ៅទឹកដោះដល់កូនប្រុស ដែលកំពុងឃ្លានអាហារនោះ ។ ទារកនោះ គឺជាកូនរបស់លោក Trevor Mallard ជាមួយនឹងសមាជិកសភាការងាររបស់ Waiariki គឺលោក Tāmati Coffey ដោយអ្នកទាំងពីរបានប្រកាសកំណើតកូនប្រុសរបស់ពួកគេឈ្មោះ Tūtānekai Smith-Coffey ដែលទារកនេះបានកើតមកតាមរយៈការជួលម្តាយពពោះជំនួស ហើយបង្កើតបានជាកូនប្រុសមួយរូបសម្រាប់អ្នកទាំងពីរ ៕
ចែករំលែកព័តមាននេះ