ខេត្តកំពង់ចាម៖ កងកម្លាំងយុទ្ធពលខេមរៈភូមិន្ទ ដែលកំពុងតែរុករកបោះសំអាតគ្រាប់យុទ្ធភណ្ឌមិនទាន់ផ្ទុះនៅបាតទន្លេមេគង្គ ក្នុងឃុំមានជ័យ ស្រុកស្រីសន្ធរ បានស្នើឲ្យបន្តរុករកគ្រាប់មិនទាន់ផ្ទុះនៅទីតាំង៤កន្លែងផ្សេងទៀត តាមបណ្ដោយដងទន្លេមេគង្គ។ នេះជាប្រសាសន៍លើកឡើងរបស់សម្ដេចក្រឡាហោម ស ខេង…
ខេត្តកំពង់ចាម៖ កងកម្លាំងយុទ្ធពលខេមរៈភូមិន្ទ ដែលកំពុងតែរុករកបោះសំអាតគ្រាប់យុទ្ធភណ្ឌមិនទាន់ផ្ទុះនៅបាតទន្លេមេគង្គ ក្នុងឃុំមានជ័យ ស្រុកស្រីសន្ធរ បានស្នើឲ្យបន្តរុករកគ្រាប់មិនទាន់ផ្ទុះនៅទីតាំង៤កន្លែងផ្សេងទៀត តាមបណ្ដោយដងទន្លេមេគង្គ។ នេះជាប្រសាសន៍លើកឡើងរបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ក្នុងពិធីសំណេះសំណាល ជាមួយប្រជាពលរដ្ឋនាព្រឹកថ្ងៃទី១២ កុម្ភៈ ២០២១ បរិវេណវត្តមាន់ដប់ ក្នុងស្រុកស្រីសន្ធរ ។ ស្រង់គ្រាប់ពីខ្មោចម៉ារីនបានជាង៦តោនឯណោះ
នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសំអាតមីន និងកាកសំណល់សង្គ្រាម និងជាអនុប្រធានទី២ អាជ្ញាធរមីនកម្ពុជា មានប្រសាសន៍ដោយលើកឡើងថា មជ្ឈមណ្ឌលជាតិបានសហការជាមួយបញ្ជាការដ្ឋានកងទ័ពពិសេស បញ្ជាការដ្ឋានកងទ័ពជើងគោក បានចាប់ផ្ដើមអនុវត្តជាបន្ទាន់ក្រោយពីទទួលបានការណែនាំពីសម្ដេចក្រឡាហោមស ខេង ដោយកម្លាំងជំនាញបានចុះរាវរកគ្រាប់យុទ្ធភណ្ឌមិនទាន់ផ្ទុះក្នុងជំរៅទឹកពី២៥ ទៅ៣០ម៉ែត្រ ដែលកប់ទៅដោយដីកម្រាស់ជាង៥ម៉ែត្រ បានប្រទះឃើញគ្រាប់ជាច្រើនត្រូវបានរាយប៉ាយនៅបាតទន្លេ។ ជាមួយនោះ កម្លាំងបានអនុវត្តដោយល្បឿនយឺត ត្រូវធ្វើតាមកម្រិតស្តង់ដារសំខាន់បំផុតគឺដើម្បីសុវត្ថិភាពដល់អ្នករុករក។
លោកប្រសាសន៍បន្តថា ចំពោះប្រភេទគ្រាប់ដែលកម្លាំងបានមុជរាវរកឃើញមានប្រភេទ៦០ដល់១០៥ មីលីម៉ែត្រ មានចំនួន៧៧២ គ្រាប់និងប្រភេទគ្រាប់កាំភ្លើងនឹងកាំភ្លើងយន្ដចំនួន៥៤.៩២៥គ្រាប់សរុបមានចំនួន៥៥.៦៩៧គ្រាប់ដែលបានរករកឃើញនៅក្នុងឃ្លុបទីមួយ នៃនាវាដែលបានលិចនៅបាតទន្លេ និងកំពងរុករកឃ្លុបចំនួនបីទៀត។ ជាមួយនោះកម្លាំងជំនាញ ក៏បានចុះផ្សព្វផ្សាយដល់ប្រជាពលរដ្ឋក្នុងស្រុកស្រីសន្ធរ ដោយមានការយល់ដឹងខ្ពស់ប្រជាពលរដ្ឋមួយចំនួនបានយកគ្រាប់មិនទាន់ផ្ទុះមកប្រគល់ជូនកម្លាំងជំនាញសរុបមាន១៥៣គ្រាប់ ដែលនឹងត្រៀមយកកំទេចចោលក្នុងពេលខាងមុខ។
លើសពីនេះទៀត មជ្ឈមណ្ឌលជាតិក៏បានរួមចំណែកក្នុងការងារសង្គមដោយបានជួយដល់ប្រជាពលរដ្ឋក្រីក្រផ្ទះស្លឹកត្រូវបានរុះចេញ ដោយដាក់ប្រក់ស័ង្កសីជំនួស និងចែកថ្នាំសង្កូវជូនប្រជាពលរដ្ឋ។ចំពោះបេសកកម្មរុករកគ្រាប់មិនទាន់ផ្ទុះនៅបាតទន្លេក្នុងស្រុកស្រីសន្ធរ គ្រោងបញ្ចប់នៅក្នុងខែឧសភាខាងមុខនេះ។
សម្ដេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ឲ្យដឹងដែរថា ដំបូងមានសាឡង់បូមខ្សាច់នៅក្នុងស្រុកស្រីសន្ធរ ដោយបូមបានគ្រាប់ហើយអាជ្ញាធរមូលដ្ឋានក៏បានរាយការណ៍មកឯកឧត្តមអ៊ុន ចាន់ដា អភិបាលខេត្ត ហើយក៏បានរាយការណ៍បន្តមករដ្ឋមន្ត្រីក្រសួងមហាផ្ទៃ។
ជាមួយនោះក៏បានសុំគោលការណ៍ពីសម្ដេចតេជោ ហើយសម្ដេចបានអនុញ្ញាតឱ្យកម្លាំងរកគ្រាប់មិនទាន់ផ្ទុះនៅបាតទន្លេដោយមានរូបលោកផ្ទាល់(ស ខេង)ជាប្រធានអន្តរក្រសួង ឯកឧត្តមនាងផាត រដ្ឋលេខាធិការប្រចាំការក្រសួងការពារជាតិជាអនុប្រធានអចិន្ត្រៃយ៍រួមនឹងសហការីជាច្រើនរូបទៀត។
សម្ដេចក្រឡាហោមស ខេង មានប្រសាសន៍បន្តថា ចំពោះសកម្មភាពរុករកគ្រាប់ដោយកម្លាំងជំនាញនោះមិនត្រូវប្រើពេលវេលាឆាប់ពេកនោះទេ ព្រោះអាចប្រថុយប្រថាននឹងគ្រោះថ្នាក់ ហើយនឹងត្រូវខាតបង់ទៅវិញ។
ធ្វើយ៉ាងណាឱ្យមានការទទួលខុសត្រូវយកសុវត្ថិភាពជាកត្តាចម្បង ដល់កម្លាំងប្រតិបត្តិកររហូតមកដល់ពេលនេះ គ្រាប់តើភណ្ឌមិនទាន់ផ្ទុះដែលកប់នៅបាតទន្លេជិតកន្លះសតវត្ស គឺគ្រាប់ទាំងនោះនៅមានគុណភាពមានទម្ងន់សរុបជាង១០តោន ចំពោះគ្រាប់នៅក្នុងខ្លុបនាវាចំនួន៣ថតទៀត ដូច្នេះសរុបទាំងអស់អាចក្នុងរង្វង់ពី៤០ទៅ៥០តោន។
សម្ដេចក្រឡាហោមក៏បានអំពាវនាវដល់សមាជិកក្រុមគ្រួសារ ដែលបាត់បង់សមាជិកដែលមានឈ្មោះឈីម ឈាងលី ដែលបានស្លាប់បាត់បង់ជីវិត ដោយរកឃើញគ្រោងឆ្អឹងនៅបាតទន្លេមេគង្គ សូមមេត្តាទំនាក់ទំនងជាមួយ និងកម្លាំងរករកគ្រាប់មិនទាន់ផ្ទុះ ដើម្បីយកធាតុទៅធ្វើបុណ្យតាមប្រពៃណី ។
សូមបញ្ជាក់ថា រហូតមកដល់ពេលនេះ គ្រាប់មិនទាន់ផ្ទុះជាច្រើនប្រភេទត្រូវបានរាវរកឃើញមានទម្ងន់សរុបជាង១០តោនហើយ ។
ចែករំលែកព័តមាននេះ