រាជធានីភ្នំពេញ៖ បុរសជនជាតិវៀតណាមម្នាក់ ខណៈចុះពីលើម៉ូតូកង់បី១គ្រឿង បានឈរបោយដៃហៅរថយន្តឈ្នួលដើម្បីជិះបន្ត ស្រាប់តែដួលសន្លប់នៅតាមផ្លូវ ដែលពុំដឹងថាត្រូវគេដាក់ថ្នាំសណ្ដំយកទ្រព្យសម្បត្តិឬបែបណានោះឡើយ ។ ពេលនោះត្រូវបានប្រជាពលរដ្ឋប្រទះឃើញ រួចរាយការណ៍ជូននគរបាលប៉ុស្តិ៍សំរោងក្រោមឲ្យចុះទៅពិនិត្យមើល និងហៅរថយន្តមន្ទីរពេទ្យបង្អែកពោធិ៍ចិនតុងដឹកយកទៅសង្គ្រោះបន្ទាន់នៅមន្ទីរពេទ្យជាតិតេជោសន្តិភាព ។
ហេតុការណ៍ខាងលើនោះបានកើតឡើងកាលពីវេលាម៉ោង២និង៣០នាទីរសៀលថ្ងៃទី១៥ ខែធ្នូ ឆ្នាំ២០២៥ នៅតាមមហាវិថីឈ្នះឈ្នះកែងផ្លូវបេតុង ស្ថិតនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
យោងតាមអត្តសញ្ញាណប័ណ្ណវៀតណាមដែលនៅក្នុងហោប៉ៅអាវរបស់ជនរងគ្រោះ ត្រូវបានបញ្ជាក់ថា បុរសនោះឈ្មោះNGUYEN DUY THANH ភេទប្រុស អាយុ៣២ឆ្នាំ ជនជាតិវៀតណាម ហើយក្រៅតែពីអត្តសញ្ញាណប័ណ្ណវៀតណាម១សន្លឹកនោះពុំមានអ្វីជាប់ខ្លួនទៀតឡើយ ។
ប្រជាពលរដ្ឋបាននិយាយថា នៅមុនពេលកើតហេតុពួកគាត់បានឃើញជនរងគ្រោះជិះម៉ូតូកង់បី១គ្រឿងតាមមហាវិថីឈ្នះឈ្នះក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុម៉ូតូកង់បីក៏ឈប់ហើយបុរសនេះក៏បានចុះឈរនៅលើចិញ្ចើមផ្លូវដោយអត់មានកាបូបខោអាវឡើយ ។ បន្ទាប់ពីម៉ូតូកង់បីចាកចេញទៅបាត់បុរសរងគ្រោះក៏បានឈរបោយដៃហៅរថយន្តឈ្នួលដើម្បីជិះបន្តដំណើរ ប៉ុន្តែពុំដឹងថាត្រូវទៅណានោះទេ ហើយខណៈកំពុងតែឈរសុខៗ ក៏ស្រាប់តែដួលសន្លប់តែម្ដង ។
ប្រជាពលរដ្ឋបាននិយាយប្រាប់ឲ្យដឹងបន្តទៀតថា ពេលនោះបានបង្កឲ្យមានការភ្ញាក់ផ្អើលយ៉ាងខ្លាំង ហើយបន្ទាប់ពីបានឃើញបែបនេះពួកគាត់(ប្រជាពលរដ្ឋ)ក៏បាននាំគ្នាជួយធ្វើចលនាសង្គ្រោះបឋម រួចរាយការណ៍ជូនសមត្ថកិច្ចនគរបាលប៉ុស្តិ៍សំរោងក្រោមឲ្យជួយអន្តរាគមន៍ ។ ក្រោយពេលទទួលបានដំណឹងនេះភ្លាម កម្លាំងនគរបាលប៉ុស្តិ៍សំរោងក្រោមបានចុះទៅពិនិត្យមើលភ្លាមៗដែរ បន្ទាប់មកក៏ហៅរថយន្តមន្ទីរពេទ្យបង្អែកពោធិ៍ចិនតុងឲ្យដឹកបុរសនោះយកទៅកាន់មន្ទីរពេទ្យជាតិតេជោសន្តិភាព ដើម្បីសង្គ្រោះបន្ទាន់ភ្លាមៗតែម្ដង៕
ចែករំលែកព័តមាននេះ