រាជធានីភ្នំពេញ ៖ លោក ពេជ្រ ស្រស់ ប្រធានគណបក្សយុវជនកម្ពុជា បានលើកឡើងនៅលើគណនីហ្វេសប៊ុកនៅរសៀលថ្ងៃទី១០ កុម្ភៈនេះថា អ្នកប្រព្រឹត្តល្មើសច្បាប់ ហើយសុំទោសរួចខ្លួន…
រាជធានីភ្នំពេញ ៖ លោក ពេជ្រ ស្រស់ ប្រធានគណបក្សយុវជនកម្ពុជា បានលើកឡើងនៅលើគណនីហ្វេសប៊ុកនៅរសៀលថ្ងៃទី១០ កុម្ភៈនេះថា អ្នកប្រព្រឹត្តល្មើសច្បាប់ ហើយសុំទោសរួចខ្លួន គឺជាគំរូអាក្រក់ដល់អ្នកដទៃផ្សេងទៀត ។
លោក ពេជ្រ ស្រស់ លើកឡើងបែបនេះ បន្ទាប់ពីក្រុមអ្នកលក់ឡេ (អាជីនិងអាម៉ី) បានចូលខ្លួនទៅបំភ្លឺ ករណីសម្តែងរឿងទុំទាវ២០២១ នាព្រឹកមិញនេះ ដោយគ្រាន់តែសុំទោសជាសាធារណៈ និងធ្វើកិច្ចសន្យា ៨ចំណុច ហើយឲ្យត្រឡប់មកផ្ទះវិញ ។
លោក ពេជ្រ ស្រស់ បានសរសេរយ៉ាងដូច្នេះថា «អ្នកប្រព្រឹត្តល្មើសច្បាប់ ហើយសុំទោសរួចខ្លួន គឺជាគំរូអាក្រក់ដល់អ្នកដទៃ ផ្សេងទៀត គឺ Video បន្ទាបបន្ថោកបានចេញផ្សាយផ្អើលពិភពលោក ហើយអ្នកមិនដឹងពីវប្បធម៌ខ្មែរយើង និងសាសនាព្រះពុទ្ធ ក៏បានមើលងាយលើវប្បធម៌ និងសាសនា ហើយដែរ តើការសុំទោសរបស់ពួកនាងអាចសងកិត្តិយសដល់វប្បធម៌ខ្មែរ និងសាសនាព្រះពុទ្ធ បានវិញដែរទេ ? ច្បាប់គឺច្បាប់ហើយច្បាប់ ក៏បានចែងពីទម្ងន់ទោស ច្បាស់លាស់ហើយដែរ ដូច្នេះអនុវត្តច្បាប់ទៅ ដើម្បីតម្លាភាព និងផ្តល់យុត្តិធម៌ ដល់ចំប៉ីខ្មៅផងដែរ ម្យ៉ាងវិញទៀត លុបបំបាត់អ្នកជាន់ឈ្លី វប្បធម៌ខ្មែរយើង និងរឿងផ្សេងៗទៀត ។ ខ្សែចាប៉ី ធូរពេកមិនពីរោះ រឹតតឹងពេកដាច់ខ្សែ រឹតល្មម គឺមានតែអនុវត្តច្បាប់» ។
សូមជម្រាបថា ក្រុមសម្ដែងរឿងទុំទាវ២០២១ ព្រមធ្វើកិច្ចសន្យា ៨ចំណុច តាមវិធានការរបស់ក្រសួង ក្រោយពីប្រជុំបិទទ្វារអស់រយៈពេលជាង ៣ម៉ោង រួចមកក្រុមប្រឹក្សាពិន័យ និងលើកសរសើរនៃក្រសួងវប្បធម៌ និងវិចិត្រសិល្បៈ នៅព្រឹកថ្ងៃទី១០ ខែកុម្ភៈ ឆ្នាំ២០២១ បានសម្រេចដាក់ចេញនូវចំណាត់ការចំនួន ៨ចំណុច ដល់អ្នកពាក់ព័ន្ធទាំងនោះរួមមាន ៖
១. មិនត្រូវប្រព្រឹត្ត និងចូលរួមប្រព្រឹត្តនូវគ្រប់សកម្មភាព ឥរិយាបថ ព្រមទាំងពាក្យសម្តី ដែលបណ្តាលឱ្យប៉ះពាល់ចំពោះ វប្បធម៌ ប្រពៃណី សាសនា សីលធម៌ ព្រមទាំងសង្គមជាតិទៀតឡើយ ។
២. មិនបង្ហាញភាពស៊ិចស៊ីបែបអនាចារ ក្នុងបណ្តាញសង្គម ។
៣. ប្រើប្រាស់ចំណេះ ជំនាញ ដើម្បីចូលរួមលើកស្ទួយ វប្បធម៌ ប្រពៃណី សាសនា សីលធម៌ ព្រមទាំងកិត្យាសង្គមជាតិ។
៤. យល់ព្រមប្រគល់ Page account ឈ្មោះ Hokima និង Account Tik Tok ឈ្មោះ Gi Leader261 ដែលជាកម្មសិទ្ធិផ្ទាល់ខ្លួន ជូនក្រុមការងាររបស់ក្រសួងវប្បធម៌ និងវិចិត្រសិល្បៈ ដើម្បីគ្រប់គ្រង និងលុបចោលទាំងស្រុង។
៥. សន្យាមិនទាញយកទិន្នន័យក្នុង Page account ឈ្មោះ Hokima និង Account Tiktok ឈ្មោះ Gi Leader261 ដែលបានប្រគល់ជូនក្រុមការងាររបស់ក្រសួងទៅរក្សាទុក ឬប្រើប្រាស់ឡើយ។
៦. សន្យានឹងសហការជាមួយម្ចាស់ account Facebook ឬ/និង Page account ដែលជួលពីមិត្ត ជូនទៅសមត្ថកិច្ច ដើម្បីលុប account Facebook ឬ/និង Page accountទាំងអស់។
៧. ធ្វើការសុំទោសជាសាធារណៈ ចំពោះមុខអ្នកសារព័តមាន ។
៨. ប្រសិនបើនៅប្រព្រឹត្តនូវរាល់សកម្មភាព ឥរិយាបថ ព្រមទាំងពាក្យសម្តី ភាពស៊ិចស៊ីបែបអនាចារ បណ្តាលឱ្យមានផលប៉ះពាល់ចំពោះ វប្បធម៌ ប្រពៃណី សាសនា សីលធម៌ ព្រមទាំងសង្គមជាតិជាបន្តទៀត នឹងត្រូវទទួលខុសត្រូវចំពោះមុខច្បាប់ជាធរមាន ៕
ចែករំលែកព័តមាននេះ