រាជធានីភ្នំពេញ ៖ រឿងរ៉ាវចរាចរណ៍បន្តិចបន្តួច ដោយភាគីម្ខាងបើករថយន្តម៉ាកព្រូស ជិះហួសស្តុប(ភ្លើងក្រហម) ធ្វើអោយភាគីម្ខាងទៀត ដែលបើកបររថយន្តឡិចស៊ីស បានស៊ីប្លេរឲ្យចៀសបែបខឹង ធ្វើអោយមានការខឹងសម្បារគ្នា កើតជាជម្លោះពាក្យសម្តី…
រាជធានីភ្នំពេញ ៖ រឿងរ៉ាវចរាចរណ៍បន្តិចបន្តួច ដោយភាគីម្ខាងបើករថយន្តម៉ាកព្រូស ជិះហួសស្តុប(ភ្លើងក្រហម) ធ្វើអោយភាគីម្ខាងទៀត ដែលបើកបររថយន្តឡិចស៊ីស បានស៊ីប្លេរឲ្យចៀសបែបខឹង ធ្វើអោយមានការខឹងសម្បារគ្នា កើតជាជម្លោះពាក្យសម្តី ជេរប្រមាថគ្នាទៅវិញទៅមកទាញទូរស័ព្ទដៃថតរាងខ្លួន រហូតឈានដល់ប្រទូសរ៉ាយបណ្ដាលឲ្យរងរបួស កើតក្តីប្ដឹងផ្តល់នោះ សមត្ថកិច្ចខណ្ឌទួលគោក សម្រេចបញ្ជូនសំណុំរឿងទៅតុលាការ ដោយសារភាគីទាំង២ មិនឯកភាព សម្របសម្រួលគ្នាឡើយ ។
ហេតុការណ៍នេះ កើតឡើងកាលពីវេលាម៉ោង១០ និង១០នាទីយប់ថ្ងៃទី០៧ ខែកុម្ភៈ ឆ្នាំ២០២១ នៅស្តុបនាងគង្ហីញ សង្កាត់អូរឫស្សី២ ខណ្ឌ៧មករា ប៉ុន្តែរថយន្តទាំង២ បន្តបើកតាមឈ្លោះគ្នា រហូតដល់ទីតាំងកើតហេតុមុខផ្ទះលេខ២០១ ផ្លួវ១៨២ ភូមិ៧ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ ។
បើតាមប្រភពពីស្នងការដ្ឋាននគរបាលរាជធានីភ្នំពេញ បានអោយដឹងថា ក្រុមការងារព័ត៌មាន និងប្រតិកម្មរហ័ស បន្ទាប់ពីបានទទួលបានព័ត៌មានអំពីការផុសរបស់ម្ចាស់គណនីហ្វេសប៊ុកឈ្មោះ Bee Yinna ទាក់ទងទៅនឹងករណីហិង្សាមួយ សមត្ថកិច្ចជំនាញ នៃអធិការដ្ឋាននគរបាលខណ្ឌទួលគោក បានចុះស្រាវជ្រាវករណីនេះ ដល់កន្លែងកើតហេតុ និងបានទទួលពាក្យបណ្ដឹងរបស់ឈ្មោះ វ៉េន វិច្ឆិកា ភេទស្រី អាយុ២៤ឆ្នាំ ជនជាតិខ្មែរ (ជាម្ចាស់គណនី Facebook ឈ្មោះ Bee Yinna) ដែលជាជនរងគ្រោះ រួចកម្លាំងរបស់ប៉ុស្តិ៍នគរបាលរដ្ឋបាលផ្សារដេប៉ូទី១ បានធ្វើការសហការជាមួយកម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវលើករណីនេះ ដើម្បីស្វែងរកជនបង្ក រហូតដល់ថ្ងៃទី០៩ ខែកុម្ភ: ឆ្នាំ២០២១នេះ សមត្ថកិច្ចបានស្រាវជ្រាវស្គាល់អត្តសញ្ញាណជនបង្ក និងបានធ្វើការកោះអញ្ជើញភាគីជនរងគ្រោះឈ្មោះ វ៉េន វិច្ឆិកា និងភាគីបង្កហិង្សាឈ្មោះ ជាតិ ចំរ៉ុង ភេទស្រី អាយុ៣០ឆ្នាំ ជនជាតិខ្មែរ រួមនិងឈ្មោះ មាស សីហា ហៅទី អាយុ២៧ឆ្នាំ ជនជាតិខ្មែរ ភេទប្រុស ជាមិត្តភ័ក្ក្រ ។
ជនបង្កឈ្មោះ មាស សីហា ហៅទី បានចូលខ្លួនមកកាន់អធិការដ្ឋាននគរបាលខណ្ឌទួលគោក តាមការកោះហៅរបស់សមត្ថកិច្ច ដើម្បីធ្វើការបំភ្លឺ ប៉ុន្តែជនបង្កជាស្ត្រីឈ្មោះ ជាតិ ចំរ៉ុង មិនបានចូលខ្លួនមកដោយផ្ទាល់នោះទេ ដោយបានឲ្យមេធាវីជាតំណាង ដោយគាត់ផ្ទាល់កំពុងសម្រាកព្យាបាលនៅមន្ទីរពេទ្យ ។
បន្ទាប់ពីមានការជួបចរចារគ្នា អស់ពេលជាច្រើនម៉ោង នៅអធិការដ្ឋាននគរបាលខណ្ឌទួលគោក ទាំងភាគីជនរងគ្រោះ និងភាគីបង្កអំពើហិង្សា មិនបានឈានដល់ចំណុចព្រមព្រៀង ឬឯកភាព សម្របសម្រួលគ្នាឡើយ ដូច្នេះសមត្ថកិច្ចជំនាញ នៃអធិការដ្ឋាននគរបាលខណ្ឌទួលគោក បានរៀបចំសំណុំឯកសារដើម្បីបញ្ជូនទៅតុលាការ អនុវត្តបន្តតាមនីតិវិធីច្បាប់ នៅថ្ងៃទី១០ ខែកុម្ភ: ឆ្នាំ២០២១នេះ ។
សូមរម្លឹកដែរថា រឿងរ៉ាវចរាចរណ៍បន្តិចបន្តួច ក្លាយជាជម្លោះ បង្កហិង្សា កើតការប្ដឹងផ្តល់ ដោយភាគីម្ខាងបើករថយន្តម៉ាកព្រូស ជិះហួសស្តុប(ភ្លើងក្រហម) ធ្វើអោយភាគីម្ខាងទៀត បើកបររថយន្តឡិចស៊ីស ក៏បានស៊ីប្លេរឲ្យចៀស ធ្វើអោយមានការខឹងសម្បារ កើតជាជម្លោះពាក្យសម្តី ជេរប្រមាថគ្នាទៅវិញទៅមកទាញទូរស័ព្ទដៃថតគ្នាទៅវិញទៅមក រហូតឈានដល់ប្រទូសរ៉ាយបណ្ដាលឲ្យរងរបួស តែម្តង ។
ភាគី ដែលជិះហួសស្តុបក្រហម គឺបើកបរដោយស្ត្រី (មិនស្គាល់អត្តសញ្ញាណ) មានបុរសម្នាក់ជិះជាមួយក្នុងរថយន្តម៉ាកព្រូស ស្លាកលេខ ភ្នំពេញ 2AW 2984 ។ ចំណែកភាគីម្ខាងទៀតដែលស៊ីប្លេរដាក់បែបខឹង ជិះរថយន្តម៉ាកឡិចស៊ីស ស្លាកលេខ ភ្នំពេញ 2BB 0773 បើកបរដោយបុរសម្នាក់ និងអ្នកជិះអមដំណើរមានស្ត្រីម្នាក់ ដែលមានឈ្មោះនៅលើហ្វេសប៊ុក Bee Yinna ។
បើតាមភាគីឈ្មោះ Bee Yinna បានដំណើររឿងជាបឋមដល់អ្នកសារព័ត៌មានថា ភាគីរថយន្តឡិចស៊ីស ធ្វើដំណើរក្នុងទិសដៅពីផ្សារអូរឫស្សី ឆ្ពោះទៅផ្សារដេប៉ូ ពេលមកដល់ត្រង់ស្តុបនាងគង្ហីញ រថយន្តត្រូវឈប់រងចាំភ្លើងខៀវដើម្បីបន្តដំណើរទៅមុខ ។ នៅពេលភ្លើងចរាចរណ៍ពណ៌ខៀវរថន្តរបស់គាត់ក៏ចេញដំណើរ ស្រាប់តែមានរថយន្តម៉ាកព្រូស ធ្វើដំណើរលើមហាវិថីហ្សាដឺហ្គោល ឆ្លងកាត់ស្តុបនាងគង្ហីញដែរ ប៉ុន្តែស្តុបនៅភ្លើងក្រហមនៅឡើយ មិនដឹងថា រថយន្តព្រូស ប្រញាប់រឺយ៉ាងណា បានបើកកាត់មុខរថយន្តរបស់គាត់ ពេលនោះគ្រួសាររបស់គាតើជាអ្នកបើករថយន្ត ក៏បានចុចស៊ីប្លេរដាក់ បែបខឹងថា ហេតុអីជិះអត់ដឹងអីបែបនេះ (បើសិនចាប់ហ្វ្រាំងអត់ទាន់មិនមានបុកគ្នាទៅហើយ ? ) ។
ប្រភពពីភាគីឈ្មោះ Bee Yinna បានបន្តថា ពេលចុចស៊ីប្លេរខ្លាំងៗដាក់រួចហើយ ធ្វើអោយភាគីខាងរថយន្តព្រូស កើតការខឹងសម្បារផងដែរ ទើបបើករថយន្ត វ៉ាគ្នាទៅវ៉ាមក ក៏បានបើកកញ្ចក់សួរគ្នាទៅអ្នកបើករថយន្តឡិចស៊ីសថា អ្ហែងចង់ម៉េច ? ។ ស្ត្រីឈ្មោះ Bee Yinna ក៏បានឃាត់គ្រួសារថាកុំតប! ទុកអោយគាត់និយាយវិញ ព្រោះអីជាស្ត្រីនិងស្ត្រី ។ ហើយក៏មានជម្លោះពាក្យសម្តីជេរគ្នាទៅវិញ ទៅមក រហូតដល់ភាគីរថយន្តព្រូស ទូរស័ព្ទហៅបុរសម្នាក់ទៀត ជិះម៉ូតូកាក់មុខរថយន្តឡិចស៊ីសឲ្យឈប់ រហូតដល់កើតមានការប្រទូសរ៉ាយប្រវាប្រតប់ បណ្ដាលឲ្យរងរបួសលើរាងស្ត្រីឈ្មោះ Bee Yinna ។
ដោយឡែក បើយោងតាម គណនីហ្វេសប៊ុកឈ្មោះ Oudom Chheat អះអាងជាបងប្រុសរបស់ស្ត្រីនបើកបររថយន្តព្រូស បានបង្ហោះវីដេអូ និងសរសេរថា «បើមិនមានផ្សែង ក៏គ្មានភ្លើងដែរ សូមមើលវីដេអូទី១ ដល់ទី៤ ដើម្បីជួយរកយុត្តិធម៍ អោយជនរងគ្រោះពិតប្រាកដ ដែលពេលនេះប្អូនខ្ញុំត្រូវដេកពេទ្យ ព្រោះត្រូវគេវ៉ៃ មិនដឹងប៉ះពាល់អ្វីខ្លះ ។ ដំបូងឡើយ ជាជម្លោះតិចតួច ដោយពាក្យសំដី ក៏កើតចេញជាការប្រតាយប្រតប់ រហូតភាគីម្ខាងទៀត មកទះកំភ្លៀងប្អូនខ្ញុំ រួចហើយក៏ភាគីបង្ក បានបើករថយន្តចេញទៅ ធម្មតាទាំងយើង ទាំងគេ មិនមែនចិត្តព្រះឯណា តែងតែចង់តបត ជារឿងធម្មតា ចឹងហើយភាគីប្អូនស្រីខ្ញុំ ក៏បើកឡានតាមអោយភាគីម្ខាងទៀតឈប់ នឹងកាក់សួរនាំ ហេតុអ្វីបានជាទះកំភ្លៀងគាត់ ? តែបែរជាភាគីម្ខាងទៀត រៀបចំថតវីដេអូ សកម្មភាព ដែលប្អូនខ្ញុំតាមនោះ ហើយមិនតបត អ្វីឆ្លើយតបវិញទាំងអស់ ដើម្បីយកវីដេអូ ទី៤ យកទៅបង្ហោះមួលបង្កាច់បង្ខូចកិត្តិយសប្អូនស្រីខ្ញុំ ថាប្អូនខ្ញុំជាជនបង្ក ចំណែកខ្លួនគាត់ជាអ្នកថតវីដេអូ ជាជនរងគ្រោះទៅវិញ ។ សូមសមត្ថកិច្ច ពាក់ព័ន្ធ និងបងប្អូនក្នុងសង្គមហ្វេសប៊ុក មេត្តាជួយរកយុត្តិធម៍ អោយគ្រួសារខ្ញុំ ដែលជាជនរងគ្រោះពិតប្រាកដផង ! ព្រោះភាគីម្ខាងទៀត គាត់មានលុយ និងមានអំណាច វាអាចអោយសរ ទៅជាខ្មៅបាន ។ គ្រួសារខ្ញុំ សុំតែភាពយុត្តិធម៌ពិតប្រាកដ ដើម្បីលុបលាងនៅពាក្យចចាមអារ៉ាម ខូចកិត្តិយសគ្រួសារខ្ញុំទាំងមូល ដែលមើលតែម្ខាង ហើយមកដៀលគ្រួសារខ្ញុំ ដោយទាំងគ្នា ជាជនរងគ្រោះពិតប្រាកដ បែរជាក្លាយជាជនបង្កទៅវិញ ។ ដោយការគោរព នឹងសូមអរគុណ» ៕
វីដេអូ ប្រជាពលរដ្ឋធ្វើដំណើរតាមដងផ្លូវ ថតបានខាងក្រោមនេះ
ចែករំលែកព័តមាននេះ