FA ពិន័យ Dele Alli មួយប្រកួតជុំវិញការបង្ហោះវីដេអូពាក់ព័ន្ធកូវីដ-១៩
ប្រទេសអង់គ្លេស ៖ កីឡាករ Dele Alli របស់ក្រុម Tottenham Hotspur ត្រូវបានសមាគមកីឡាបាល់ទាត់អង់គ្លេស (FA)…
ប្រទេសអង់គ្លេស ៖ កីឡាករ Dele Alli របស់ក្រុម Tottenham Hotspur ត្រូវបានសមាគមកីឡាបាល់ទាត់អង់គ្លេស (FA) ពិន័យមួយប្រកួតនៅសប្តាហ៍ក្រោយ ។
សូមរំលឹកថា ខ្សែបម្រើអង់គ្លេសវ័យ ២៤ឆ្នាំខាងលើ បានធ្វើការបង្ហោះវីដេអូនៅលើ Snapchat របស់ខ្លួនកាលពីខែកុម្ភះកន្លងទៅ ដោយបាននិយាយបែបលេងសើច អំឡុងពេលមានការផ្ទុះឡើងនៃវីរុសកូវីដ-១៩ ព្រមទាំងបាននិយាយបែបលេងសើចដល់បុរសអាស៊ីម្នាក់ថែមទៀតផង។ បើទោះបីជាកីឡាកររូបនេះ បានលុបវីដេអូនោះចោល និងធ្វើការសុំទោសជាសាធារណៈយ៉ាងណាក្តី ក៏ FA បានសម្រេចពិន័យមួយប្រកួត រួមជាមួយទឹកប្រាក់ចំនួន ៥ម៉ឺនផោន និងត្រូវអនុវត្តវគ្គសិក្សាសិលធម៌ផងដែរ។
សូមជម្រាបថា Alli នឹងខកខានជំនួបដ៏សំខាន់ក្នុងផ្ទះរបស់ក្រុមខ្លួន ទល់នឹងក្រុម Manchester United នៅថ្ងៃទី១៩ ខែមិថុនា ដែលជាការប្រកួតសប្តាហ៍ទី៣០ នៃក្របខណ្ឌ Premier League។
Dele Alli បានដឹងយ៉ាងច្បាស់ថាវីដេអូនេះ នឹងបង្កឱ្យមានការខកចិត្តយ៉ាងខ្លាំងពីសំណាក់អ្នកគ្រប់គ្នា។
«ឆ្លើយតបទៅនឹងការសម្រេចចិត្តរបស់ FA ខ្ញុំសូមធ្វើការសុំទោសម្តងទៀត ចំពោះរាល់កំហុសដែលបង្កឡើងដោយអាកប្បកិរិយារបស់ខ្ញុំ។ ខ្ញុំក៏សូមអរគុណចំពោះ FA ដែលបានបញ្ជាក់ថា សកម្មភាពរបស់ខ្ញុំ មិនមែនជាការរើសអើងជាតិសាសន៍លើជនជាតិណាមួយទេ។ យើងទាំងអស់គ្នាត្រូវយកចិត្តទុកដាក់ ចំពោះពាក្យសម្តី និងសកម្មភាពរបស់យើង» នេះបើតាមការបញ្ជាក់ពីកីឡាកររូបនេះ៕ (ដកស្រង់ចេញពី៖ BBC)
អត្ថបទពាក់ព័ន្ធ ៖ Dele Alli ធ្វើការសុំទោស បន្ទាប់ពីបានបង្ហោះវីដេអូលេងសើចពីវីរុសកូរ៉ូណា
ចែករំលែកព័តមាននេះ