រាជធានីភ្នំពេញ៖ បច្ចុប្បន្ននេះ យើងលែងនិយាយពីការអភិវឌ្ឍធនធានមនុស្សទៀតហើយ ប៉ុន្តែយើងផ្តោតសំខាន់ លើការអភិវឌ្ឍមូលធនមនុស្ស ដែលជាកិច្ចការដែលត្រូវធ្វើ និងយកចិត្តទុកដាក់ដើម្បីជួយជំរុញយុវជនកម្ពុជារបស់យើងឱ្យពួកគេមានសមត្ថភាពពេញលេញក្នុងការប្រកួតប្រជែង ក៏ដូចជាចូលរួមអភិវឌ្ឍជាតិ ។ នេះជាការលើកឡើងរបស់ឧកញ៉ា…
រាជធានីភ្នំពេញ៖ បច្ចុប្បន្ននេះ យើងលែងនិយាយពីការអភិវឌ្ឍធនធានមនុស្សទៀតហើយ ប៉ុន្តែយើងផ្តោតសំខាន់ លើការអភិវឌ្ឍមូលធនមនុស្ស ដែលជាកិច្ចការដែលត្រូវធ្វើ និងយកចិត្តទុកដាក់ដើម្បីជួយជំរុញយុវជនកម្ពុជារបស់យើងឱ្យពួកគេមានសមត្ថភាពពេញលេញក្នុងការប្រកួតប្រជែង ក៏ដូចជាចូលរួមអភិវឌ្ឍជាតិ ។ នេះជាការលើកឡើងរបស់ឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប និងជាប្រធានក្រុមហ៊ុន ហ្វ្រែងខ្លីន ខូវី អេឌ្យូខេសិន ប្រចាំនៅកម្ពុជា ក្នុងសិក្ខាអប់រំស្តីពី «ការកសាងអត្តចរិតជាវិជ្ជមានរបស់យុវជន ដើម្បីចូលរួមអភិវឌ្ឍសង្គមជាតិ» នាព្រឹកថ្ងៃទី២០ ខែតុលា ឆ្នាំ២០២៣ នៅសាកលវិទ្យាល័យ ខេមតិច ។
លោកឧកញ៉ា ប៉ិច បូឡែន មានប្រសាសន៍បន្តទៀតថា មូលធនមនុស្ស មិនមែនផ្តោតតែទៅលើចំណេះដឹង ជំនាញនោះទេ ប៉ុន្តែក៏ផ្តោតខ្លាំងទៅលើផ្នត់គំនិត អត្តចរិត សុខមាលភាព រួមជាមួយគំនិតស្នេហាជាតិជាគោលផងដែរ ។
លោកឧកញ៉ា ប៉ិច បូឡែន សង្កត់ធ្ងន់ថា៖ «យើងតែងនិយាយថា យុវជនជាទំពាំងស្នងឬស្សី ប៉ុន្តែបច្ចុប្បន្ន ឬស្សីត្រូវទ្រទម្ងន់ខ្លាំងជាងមុន ប្រទេសកម្ពុជាត្រូវតែមាំ ត្រូវតែខ្លាំងជាងមុន ព្រោះនៅឆ្នាំ២០៣០ ខាងមុខ កម្ពុជានឹងត្រូវចាកចេញ ពីប្រទេសដែលមានការអភិវឌ្ឍតិច ទៅជាប្រទេសដែលមានចំណូលមធ្យមកម្រិតខ្ពស់ ដែលទាមទារនូវសមត្ថភាពប្រកួតប្រជែងសេដ្ឋកិច្ច ដូច្នេះមូលធនមនុស្សមិនមែនត្រឹមតែមានចំណេះ មានជំនាញ ប៉ុន្តែត្រូវតែមានអត្តចរិតបូកផ្សំ ជាមួយសុខមាលភាព និងគំនិតស្នេហាជាតិ ចេះសាមគ្គីជាតិជាធំ» ។
ដើម្បីជាការជួយទៅដល់ការអភិវឌ្ឍមូលធនមនុស្ស ស្របទៅនឹងគោលនយោបាយយុទ្ធសាស្ត្រ របស់រាជរដ្ឋាភិបាលអាណត្តិទី ៧ នេះ លោកឧកញ៉ា ប៉ិច បូឡែន មានប្រសាសន៍ថា លោកនឹងមានគម្រោងជួយដល់សាលារៀនរដ្ឋ ចំនួន ៤ នៅឆ្នាំ២០២៤ ខាងមុខ ក្នុងការប្រើប្រាស់កម្មវិធីបណ្តុះបណ្តាល ទម្លាប់ល្អទាំង ៧ សម្រាប់បុគ្គលឆ្នើម ដើម្បីជួយអភិវឌ្ឍសមត្ថភាពសិស្ស ក្លាយទៅជាមូលធនមនុស្សនៅពេលអនាគត ។
លោកឧកញ៉ា ប៉ិច បូឡែន មានប្រសាសន៍បញ្ជាក់ថា បើនិយាយអំពីបំណិនសតវត្សទី២១ គឺមាន៥ ទៅ៦ចំណុចហើយ ដែលអាចដោះស្រាយបានដោយកម្មវិធីទម្លាប់ល្អទាំង៧ ដូច្នេះនៅឆ្នាំ២០២៤ លោកនឹងឧបត្ថម្ភសាលារដ្ឋចំនួន៤ សម្រាប់ការប្រើប្រាស់កម្មវិធីនេះ ព្រោះថាកិច្ចការអប់រំនេះ មិនមែនជាកិច្ចរបស់រដ្ឋ ឬរបស់ឯកជននោះទេ ទោះបីសាលារដ្ឋ សាលាឯកជន គឺជាសាលារបស់ជាតិតែមួយ ។
សូមជម្រាបថា ក្រុមហ៊ុន ហ្វ្រែងខ្លីន ខូវី អេឌ្យូខេសិន ប្រចាំនៅកម្ពុជា គឺជាស្ថាប័នឯកជនមួយ ដែលទទួលសិទ្ធិចែកចាយផ្តាច់មុខ កម្មវិធីបណ្តុះបណ្តាលទម្លាប់ល្អទាំង ៧ សម្រាប់បុគ្គលឆ្នើមក្នុងប្រទេសកម្ពុជា ពីក្រុមហ៊ុន ហ្វ្រែងខ្លីន ខូវី អេឌ្យូខេសិនសហរដ្ឋអាមេរិកចាប់តាំងពីឆ្នាំ២០១៦ ។ មកដល់ពេលបច្ចុប្បន្ននេះ មានសាលារៀនជាង៣០ កំពុងប្រើប្រាស់ និងដាក់បញ្ចូលកម្មវិធីនេះជាកម្មវិធីសិក្សាបន្ថែម ៕ អត្ថបទសហការ
ចែករំលែកព័តមាននេះ