រាជធានីភ្នំពេញ ៖ ដោយមានការណែនាំពីលោកអូន ព័ន្ធមុនីរ័ត្ន រដ្ឋមន្ត្រីប្រតិភូអមសម្តេចនាយករដ្ឋមន្ត្រី និងជាប្រធានឧត្តមក្រុមប្រឹក្សាសេដ្ឋកិច្ច នៅទីស្នាក់ការធនាគារអភិវឌ្ឍន៍ជនបទនាព្រឹកថ្ងៃទី២១ កញ្ញា ឆ្នាំ២០១០ លោកសុន គន្ធរ ទីប្រឹក្សាផ្ទាល់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី និងជាប្រធានអគ្គនាយកធនាគារអភិវឌ្ឍន៍ជនបទ បានទទួលជួបពិភាក្សាការងារជាមួយប្រតិភូក្រសួងកសិកម្ម និងកសិ-ឧស្សាហកម្មនៃប្រទេសម៉ាឡេស៊ី ដឹកនាំដោយលោក Raja Saifful Ridzuwan អនុប្រធានបេសកកម្មនៃស្ថានទូតម៉ាឡេស៊ី ប្រចាំកម្ពុជា ។
ចូលរួមក្នុងឱកាសនោះ ខាងកម្ពុជាមានលោកឧកញ៉ា ស៊ន សុខណា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាអនុប្រធានសភាមុខរបរ និងមីក្រូសហគ្រាសកម្ពុជា លោកឧកញ៉ា ហាន់ ឃៀង លោកឧកញ៉ា ភួ ពុយ ប្រធានក្រុមហ៊ុនបែតងកម្ពុជា និងមន្ត្រីធនាគារអភិវឌ្ឍន៍ជនបទជាច្រើនរូបទៀត ។ ចំណែកខាងម៉ាឡេស៊ី លោក Muez Abdul Aziz អនុលេខាធិការនៃក្រសួងកសិកម្ម និងកសិ-ឧស្សាហកម្មម៉ាឡេស៊ី លោក Mohamed Aminuddin Abdul Rahman អនុលេខាធិការក្រសួងកសិកម្ម និងកសិ-ឧស្សាហកម្មម៉ាឡេស៊ី លោកបណ្ឌិត Habibuddin Hashim អគ្គនាយករងនៃវិទ្យាស្ថានសំរាប់ការស្រាវជ្រាវ និងអភិវឌ្ឍន៍វិស័យកសិកម្មម៉ាឡេស៊ី និងមន្ត្រីជំនាញចំនួន៤រូប ។
លោក Raja Saifful Ridzuwan បានមានប្រសាសន៍ថា បន្ទាប់ពីការប្រកាសរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អំពីគោលនយោបាយជំរុញផលិតកម្មស្រូវ និងការនាំចេញអង្ករ និងដោយមានការណែនាំពីនាយករដ្ឋមន្ត្រីនៃប្រទេសម៉ាឡេស៊ី ក្រសួងកសិកម្ម និងកសិ-ឧស្សាហកម្ម ម៉ាឡេស៊ី បានបញ្ជូនក្រុមបច្ចេកទេសមកប្រទេសកម្ពុជា នាពេលនេះ ក្នុងគោលបំណងដើម្បីសិក្សាលទ្ធភាពក្នុងការនាំអង្ករចេញពីកម្ពុជា ទៅប្រទេសម៉ាឡេស៊ី និងការវិនិយោគរយៈពេលវែងក្នុងវិស័យស្រូវ-អង្ករនៅកម្ពុជា ។
លោកសុន គន្ធរ បានមានមតិស្វាគមន៍ និងសំដែងនូវទឹកចិត្តរីករាយចំពោះភាគីម៉ាឡេស៊ី ដែលមានចំណាប់អារម្មណ៍ក្នុងការនាំអង្ករពីកម្ពុជា ចេញទៅប្រទេសម៉ាឡេស៊ី និងមានបំណងចង់វិនិយោគលើវិស័យស្រូវអង្ករនៅកម្ពុជា ខណៈពេលដែលប្រទេសកម្ពុជា កំពុងត្រូវការអ្នកវិនិយោគក៏ដូចជាទុនសំរាប់អភិវឌ្ឍន៍វិស័យនេះ ។ ឆ្លើយតបទៅនឹងសំណួរដែលទាក់ទងទៅនឹងការផ្តល់ឥណទានរបស់ធនាគារអភិវឌ្ឍន៍ជនបទសំរាប់គាំទ្រដល់វិស័យស្រូវអង្ករនេះ លោកសុន គន្ធរ បានបញ្ជាក់ជំរាបដល់ភាគីម៉ាឡេស៊ី អំពីខ្សែសង្វាក់នៃការផ្គត់ផ្គង់សំរាប់ផលិតកម្មស្រូវអង្ករ ដែលក្នុងនោះធនាគារអភិវឌ្ឍន៍ជនបទបានផ្តល់ឥណទានបីប្រភេទសំខាន់ៗគឺ ១-ឥណទានរយៈពេលខ្លីសំរាប់កសិករក្នុងការបង្កបង្កើនផល ២-ឥណទានរយៈពេលខ្លីសំរាប់រោងម៉ាស៊ីនកិនស្រូវធ្វើជាទុនបង្វិលប្រមូលទិញស្រូវពីកសិករ ៣-ឥណទានរយៈពេលមធ្យម និងវែងសំរាប់រោងម៉ាស៊ីនកិនស្រូវក្នុងការវិនិយោគធ្វើទំនើបភាវូបនីយកម្មម៉ាស៊ីនកែច្នៃ ដែលនេះគឺជាផ្នែកមួយនៃគោលនយោបាយរបស់រាជរដ្ឋាភិបាលកម្ពុជា ក្នុងការទប់ស្កាត់ការហូរចេញស្រូវទៅក្រៅប្រទេសនារដូវប្រមូលផល ។ កន្លងមកគឺប្រើប្រាស់ហិរញ្ញប្បទានពិសេសរបស់រាជរដ្ឋាភិបាល ប៉ុន្តែនៅឆ្នាំ២០១០ នេះដោយផ្អែកលើគោលការណ៍របស់សម្តេចអគ្គមហាសេនាបតីតេជោ ហ៊ុន សែន មានធនាគារពាណិជ្ជមួយចំនួនក៏បានចូលរួមទុនផងដែរ ហើយឧត្តមក្រុមប្រឹក្សាសេដ្ឋកិច្ចជាតិ និងក្រសួងសេដ្ឋកិច្ច និងហិរញ្ញវត្ថុ កំពុងពិនិត្យលទ្ធភាពបង្កើតមូលនិ់ធិធានាឥណទាន៥០% សំរាប់វិស័យធនាគារពាណិជ្ជកម្មឯកជនដែលចូលរួមផ្តល់ទុនឥណទានទ្រទ្រង់វិស័យស្រូវនេះ ។
ចូលរួមមានមតិក្នុងឱកាសនោះ លោកឧកញ៉ា ភួ ពុយ ប្រធានក្រុមហ៊ុនបៃតងភីអិលស៊ី បានមានប្រសាសន៍ជំរាបជូនដល់ប្រតិភូម៉ាឡេស៊ី អំពីផលិតកម្មស្រូវ និងការកែច្នៃអង្ករនៅកម្ពុជាថា កាលពីពេលមុនកម្ពុជាពុំទាន់មានលទ្ធភាពនាំអង្ករចេញទៅក្រៅប្រទេសទេ ពោលគឺមានតែការនាំចេញស្រូវ មូលហេតុបណ្តាលមកពី ការខ្វះខាតទុនបង្វិលសំរាប់ទិញស្រូវស្តុកទុក និងទុនវិនិយោគសំរាប់បំពាក់ម៉ាស៊ីនទំនើបធ្វើការកែច្នៃស្រូវ ។ ប៉ុន្តែបច្ចុប្បន្ននេះ ដោយមានការផ្តល់ហិរញ្ញប្បទានពីរាជរដ្ឋាភិបាលកម្ពុជា តាមរយៈធនាគារអភិវឌ្ឍន៍ជនបទ ក្រុមហ៊ុនមានលទ្ធភាពបំពាក់ម៉ាស៊ីនទំនើបសំរាប់ធ្វើការកែច្នៃអង្ករឱ្យស្របតាមស្តង់ដាអន្តរជាតិសំរាប់នាំចេញ និងធានាបានទាំងបរិមាណ និងគុណភាព ។ ក្នុងឆ្នាំ២០១០ ក្រុមហ៊ុនបានចាប់ផ្តើមកែច្នៃអង្ករ និងធ្វើការនាំចេញជាបណ្តើរៗ ហើយសំរាប់ឆ្នាំ២០១១ ខាងមុខនេះ អាចមានលទ្ធភាពនាំចេញពី៣សែនទៅ៥សែនតោន ។
លោកសុន គន្ធរ បានជំរាបដល់ប្រតិភូម៉ាឡេស៊ីថា ភាគីកម្ពុជាសូវស្វាគមន៍ចំពោះគោលបំណងរបស់ម៉ាឡេស៊ី ក្នុងការវិនិយោគលើវិស័យស្រូវអង្ករ និងសំណូមពរឱ្យភាគីម៉ាឡេស៊ី ពិនិត្យលទ្ធភាពក្នុងការផ្តល់ជាជំនួយបច្ចេកទេសដល់រោងម៉ាឡេស៊ីកិនស្រូវកម្ពុជា ដើម្បីបង្កើនលទ្ធភាពថែមទៀត ក្នុងការកែច្នៃអង្ករសំរាប់ធ្វើការនាំចេញ ។ នៅថ្ងៃទី២២ កញ្ញា ឆ្នាំ២០១០ ប្រតិភូក្រសួងកសិកម្ម និងកសិ-ឧស្សាហកម្មនៃប្រទេសម៉ាឡេស៊ី បានចុះទៅស្វែងយល់សកម្មភាពរោងម៉ាស៊ីនកិនស្រូវមួយចំនួន និងដំណាំស្រូវក្នុងខេត្តបាត់ដំបងផងដែរ ៕
ចែករំលែកព័តមាននេះ