ប្រទេសជាច្រើនបង្កើនការនាំចូលទុរេនពីវៀតណាម ខណៈចិននៅតែជាទីផ្សារនាំមុខ
វៀតណាម ៖ ប្រទេសជាច្រើនបានបញ្ជាទិញផ្លែទុរេនពីប្រទេសវៀតណាម កាន់តែច្រើនឡើង ដោយ
វៀតណាម ៖ ប្រទេសជាច្រើនបានបញ្ជាទិញផ្លែទុរេនពីប្រទេសវៀតណាម កាន់តែច្រើនឡើង ដោយសារតែកសិករវៀតណាមបានបង្កើនគុណភាពនៃដំណាំទុរេនរបស់ពួកគេ។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយកាលពីថ្ងៃទី១ ខែមករា ឆ្នាំ២០២៤។
បើយោងតាមរបាយការណ៍ពីគយរបស់វៀតណាមបានបង្ហាញថា ប្រទេសវៀតណាមបាននាំចេញផ្លែទុរេននៅក្នុងតម្លៃ ២,២ពាន់លានដុល្លារអាមេរិកក្នុងរយៈពេល១១ខែដំបូងនៃឆ្នាំ ២០២៣ ដែលកើនឡើង៥ដងពីមួយឆ្នាំទៅមួយឆ្នាំ។ ប្រទេសចិនបាននាំមុខគេជាមួយនឹងការបញ្ជាទិញ ១.៩៧ពាន់លានដុល្លារ ពោលកើនឡើង១៥ដង តាមពីក្រោយដោយសាធារណរដ្ឋឆែកនៅក្នុងតម្លៃ ៩.៧លានដុល្លារ ពោលកើនឡើង២៨ដង ដែលជាការកើនឡើងដ៏ធំបំផុតក្នុងចំណោមទីផ្សារទាំងអស់។ មិនត្រឹមតែប៉ុណ្ណោះ ប្រទេសបារាំង កាណាដា សហរដ្ឋអាមេរិក និងប៉ាពួញូហ្គីណេ (Papua New Guinea) ក៏បានបង្កើនការដឹកជញ្ជូនពី ៣២% ទៅ ៨០០% ផងដែរ។
លោក Dang Phuc Nguyen អគ្គលេខាធិការនៃសមាគមផ្លែឈើ និងបន្លែវៀតណាមបានមានប្រសាសន៍ថា ផ្លែទុរេនវៀតណាមមានគុណភាពជាប់លាប់ល្អ ហើយអាចប្រកួតប្រជែងជាមួយនឹងទុរេនមកពីប្រទេសថៃ ម៉ាឡេស៊ី និងហ្វីលីពីន។ មួយវិញទៀត ប្រទេសវៀតណាមមានផ្លែទុរេនពេញមួយឆ្នាំ ខណៈប្រទេសថៃមានតាមរដូវប៉ុណ្ណោះ។ ទោះជាយ៉ាងណាក៏ដោយ ការដឹកជញ្ជូនតម្លៃថោកជាង ក៏បានដើរតួក្នុងការប្រកួតប្រជែងជាមួយប្រទេសថៃ ដែលជាអ្នកនាំចេញទុរេនដ៏ធំបំផុតទៅកាន់ប្រទេសចិនផងដែរ។
លោកបានបន្តទៀតថា ប្រទេសចិនជាទីផ្សារធំមួយដែលបានអនុម័តការនាំចេញទុរេនស្រស់ពីប្រទេសវៀតណាម ហើយទំនងជានឹងបើកភ្លើងខៀវក្នុងការបង្កកទុរេនទៅថ្ងៃអនាគត។ ប្រសិនបើវៀតណាមអាចរក្សាបាននូវគុណភាពខ្ពស់ វានឹងមិនចាំបាច់ព្រួយបារម្ភអំពីការបាត់បង់ចំណែកទីផ្សារនៅក្នុងប្រទេសចិននោះទេ។ ផ្ទៃដីចម្ការទុរេនបានកើនឡើងពី ៩២,០០០ហិកតាក្នុងឆ្នាំ ២០១០ រហូតដល់ ១៣១, ០០០ហិកតា។ ជាមួយគ្នានោះផងដែរ ផលិតកម្មត្រូវបានគេព្យាករណ៍ថា នឹងឈានដល់មួយលានតោននៅឆ្នាំ ២០២៤ ពោលគឺកើនឡើង ១៥.៩% ពីមួយឆ្នាំទៅមួយឆ្នាំ៕
ចែករំលែកព័តមាននេះ