ទីក្រុងបាងកក៖ រដ្ឋាភិបាលថៃអំពាវនាវឱ្យសមាគមអាស៊ានដើរតួនាទីបុរេសកម្មនៅក្នុងការដោះស្រាយបញ្ហានៅប្រទេសភូមា។ ការអំពាវនាវនេះធ្វើឡើងបន្ទាប់ពីប្រទេសថៃខ្លួនឯងកំពុងស្ថិតនៅក្នុងស្ថានភាពពិបាក។ ម៉្យាងជនភៀសខ្លួនភូមាសម្រុកចូលទឹកដីថៃតាមច្រកស្រុកមេសូត នៃខេត្តតាក។ ម៉្យាងទៀត ការប្រយុទ្ធគ្នានៅកៀកនឹងព្រំដែនថៃ-ភូមារវាងក្រុមកុលសម្ព័ន្ធជាតិការ៉េន (Karen) ទល់នឹងទាហានរបស់លោកមីនអុងឡាំង។
ថៃបារម្ភថាបញ្ហានេះអាចបង្កអស្ថិរភាព និងអសន្តិសុខសម្រាប់ខ្លួន។ចំណុចសំខាន់មួយទៀត ជម្លោះប្រដាប់អាវុធនេះក៏ប៉ះពាល់ខ្លាំងផងដែរសម្រាប់អ្នកជំនួញថៃដែលត្រូវដឹកឥវ៉ាន់ទៅលក់នៅទីក្រុងពាណិជ្ជកម្មដ៏សំខាន់ជាយុទ្ធសាស្ត្រនៅជាប់នឹងព្រំដែនតែម្ដង។ សព្វថ្ងៃនេះ ប្រទេសភូមាត្រូវដិតដាមដោយសង្គ្រាមស៊ីវិល។ សមាគមអាស៊ាន និងលោកមីនអុងឡាំងធ្លាប់ព្រមព្រៀងគ្នាទៅលើផែនការសន្តិភាពដែលផ្ដួចផ្ដើមឡើងតាំងពីឆ្នាំ២០២១។
ប៉ុន្តែជាក់ស្ដែងផែនការនេះមិនទាន់អនុវត្តឱ្យមានប្រសិទ្ធភាពនៅឡើយទេ។ ជាពិសេស ការសំណូមពរឱ្យគ្រប់ភាគីបិទបញ្ចប់អំពើហិង្សាដាក់គ្នា និងងាកមករកតុចរចា។ អ្នកនាំពាក្យក្រសួងការបរទេសថៃថ្លែងថាថៃចង់ឃើញអាស៊ានដើរតួនាទីបុរេសកម្ម។ ថៃបានពិគ្រោះគ្នាជាមួយឡាវក្នុងនាមជាប្រធានអាស៊ានប្ដូរវេននៅឆ្នាំនេះ និងពិគ្រោះគ្នាជាមួយមីយ៉ាន់ម៉ាអំពីស្ថានការណ៍វិវត្តថ្មីៗ។
កាលពីថ្ងៃទី១១ ខែមេសា ក្រុមប្រឆាំងនឹងលោកមីនអុងឡាំងបានចូលកាន់កាប់ទីក្រុងមីយ៉ាវ៉ាឌីដែលស្ថិតនៅជាប់នឹងព្រំដែនថៃ។ ប៉ុន្តែក្រោយមក លោកមីនអុងឡាំងបញ្ជូនកងទ័ពជើងគោកជាច្រើនកងពល និងវាយផ្គួបគ្នាពីលើអាកាសដណ្ដើមបានទីក្រុងនេះមកវិញ។ ពួកយុទ្ធជនការ៉េនបានដកថយទៅតំបន់ខ្សែក្រវាត់ក្រុង។ ទោះជាយ៉ាងណាក្ដី ការចូលកាន់កាប់មួយចម្អិនកំពិសនេះបង្ហាញថាសង្គ្រាមឆាបឆេះដល់ព្រំដែនថៃហើយ ហើយធ្វើឱ្យលោកមីនអុងឡាំងពិបាកទប់ទល់ម្ដងៗ។
កាលពីថ្ងៃទី២០ ខែមេសា ថៃអះអាងថាជនស៊ីវិលភូមាបីពាន់នាក់ឆ្លងចូលដីថៃ។ ទើបតែឥឡូវនេះទេដែលពួកគេត្រឡប់ទៅវិញភាគច្រើន ហើយនៅសល់ប្រហែល១រយនាក់ទៀត។ អ្នកនាំពាក្យថៃថ្លែងថាការប្រយុទ្ធគ្នារវាងក្រុមប្រឆាំង និងរបបសឹកនេះបានរីករាលដាលទៅដល់ទីក្រុងមីយ៉ាវ៉ាឌីដែលជាទីតាំងស្ថិតនៅកៀកនឹងប្រទេសថៃខ្លាំងមែនទែន។ អាស៊ានត្រូវតែខិតខំបន្ថែមទៀតដើម្បីដោះស្រាយបញ្ហានេះ។
ប្រទេសថៃបានស្នើសុំកោះប្រជុំអាស៊ានដើម្បីពិភាក្សាគ្នាអំពីបញ្ហានេះ ហើយចូលរួមដោយប្រទេសឥណ្ឌូណេស៊ីដែលជាប្រធានអាស៊ានកាលពីឆ្នាំមុន, ឡាវដែលជាប្រធានឆ្នាំនេះ និងម៉ាឡេស៊ីជាប្រធាននៅឆ្នាំក្រោយ។ យោងតាមផែនការសន្តិភាព៥ចំណុចដែលព្រមព្រៀងគ្នាកាលពីឆ្នាំ២០២១នោះ ប្រធានអាស៊ានជាអ្នកតែងតាំងអ្នកតំណាងពិសេសរបស់ខ្លួនដើម្បីតាមដានថាការអនុវត្តផែនការនេះវិវត្តដល់ណាហើយ។ ប្រទេសឡាវមិនសូវនិយាយលម្អិតពេកទេអំពីសកម្មភាពរបស់បេសកជនខ្លួន៕
ចែករំលែកព័តមាននេះ