ខេត្តកំពង់ស្ពឺ ៖ មនុស្សមួយក្រុមជិះឡានម៉ាកហាយឡេនឌ័រមួយគ្រឿងមិនស្គាល់ស្លាកលេខ តែងតែធ្វើសកម្មភាពបើកឡានដេញស្ទាក់រ៉ឺម៉កដឹកធ្យូង និងឡានដឹកអុសជារៀងរាល់យប់នៅលើផ្លូវជាតិលេខ4 ចាប់ពីភូមិសាស្ត្រខេត្តកំពង់ស្ពឺ រហូតដល់ស្ពានអាកាសផ្សារជម្ពូវ័ន្ត ។
យោងតាមប្រភពបានបង្ហើបថា កាលពីយប់ថ្ងៃទី5 មីនា ឆ្នាំ2024 កន្លងទៅ ក្រុមមនុស្សទាំងនោះត្រូវបានស្គាល់មានម្នាក់មក ស៊ូ កុល ចំណែកអ្នកផ្សេងទៀត គេមិនស្គាល់ឈ្មោះនោះទេ ប្រើប្រាស់មធ្យោបាយធ្វើដំណើរដោយរថយន្តហាយឡិនឌ័របានស្ទាក់ចាប់រ៉ឺម៉កដឹកធ្យូង និងរថយន្តដឹកអុសជាច្រើនគ្រឿងដោយប្រាប់ថា ខ្លួនគឺជាមន្ត្រីមកពីក្រសួងបរិស្ថានមេបញ្ជាឲ្យដើរធ្វើការ ។
ក្រោយឃាត់រ៉ឺម៉ក និងឡានទឹកអុសឈប់ ហើយក្រុមមនុស្សទាំងនោះបានតម្រូវឲ្យម្ចាស់រ៉ឺម៉ក និងម្ចាស់ឡានបង់លុយមកខ្លួន ក្នុងមួយគ្រឿងមួយលានរៀល។ បុរសម្នាក់ឈ្មោះ ច.ច.ម រកស៊ីដឹកធ្យូងរស់នៅក្រុងច្បារមនបានបង្ហើបប្រាប់ផងដែរថា បន្ទាប់ពីឃាត់ហើយគាត់ក៏សុំចរចាមកនៅត្រឹមតែមួយគ្រឿង40ម៉ឺនរៀលប៉ុណ្ណោះ រីឯបុរសម្នាក់ទៀតរកស៊ីដឹកអុសក៏បាននិយាយដូចគ្នាដែរថា ក្រុមមនុស្សទាំងនោះនិយាយចេញមកតែរឿងលុយបើមិនបង់លុយឲ្យពួកគាត់នឹងរាយការណ៍ហៅកម្លាំងឲ្យមកអូសយកទៅទុកនៅកន្លែងមេព្រៃមិនខាន ដោយខ្លាចខាតបង់ថវិកា និងពេលវេលាពួកគាត់ក៏បង្ខំចិត្តបង់ទាំងសោកស្តាយ។បន្ទាប់ពីបង់លុយរួចហើយទើបក្រុមមនុស្សទាំងនោះព្រមឲ្យរ៉ឺម៉ក និងរថយន្តបន្តដំណើរទៅមុខទៀតតាមគោលដៅរៀងខ្លួន ។
ក្រុមអ្នករកស៊ីដឹកធ្យូង និងអុសបានលើកជាសំណួរថា តើក្រសួងបរិស្ថានមានផែនការចេញបេសកកម្មដល់មន្ត្រីរបស់ខ្លួនឲ្យចុះធ្វើសកម្មភាពតាមដងផ្លូវដែរឬយ៉ាងណា? ហើយក្រុមមនុស្សទាំងនោះធ្វើសកម្មភាពភាគច្រើនគឺនៅពេលយប់ជ្រៅទៀតផងចាប់ចន្លោះពីម៉ោង12:00ពាក់កណ្តាលអធ្រាត្រ ទៅម៉ោង3:00ទៀបភ្លឺ ទំនងខ្លាចក្រែងអ្នកធ្វើដំណើរដឹងរឿង។
ម្យ៉ាងពេលធ្វើទៅសកម្មភាពនោះ មិនមានស្លៀកសំលៀកបំពាក់ជាមន្ត្រីបរិស្ថាននោះទេ គឺស្លៀកសំលៀកបំពាក់ខោអាវឈុតខ្មៅរបៀបជាអ្នកការពារ។ អ្នកដែលដឹងរឿងនេះបានលើកឡើងថា ក្រុមមនុស្សទាំងនោះអាចជាមនុស្សក្លែងបន្លំ ដើម្បីគាបយកលុយពីអ្នករកស៊ីដឹកធ្យូងតាមរ៉ឺម៉ក និងឡានដឹកអុសតែប៉ុណ្ណោះ មិនមែនជាមន្ត្រីបរិស្ថានពិតប្រាកដនោះទេ បើពិតជាមន្ត្រីបរិស្ថានពិតមែននោះ គឺមានសម្លៀកបំពាក់និងសញ្ញាសម្គាល់ជាមន្ត្រីបរិស្ថានហើយមិនមែនស្លៀកសម្លៀកបំពាក់របៀបឈុតជាអ្នកការពារនោះទេ។
ជាក់ស្ដែង កាលពីខែឆ្នាំ 2024 ក្រុមមនុស្សទាំងនេះ ដែលត្រូវបានស្គាល់ដឹកនាំដោយឈ្មោះស៊ូកុលបានឆាតតាមប្រព័ន្ធតេលេក្រាមឲ្យក្រុមម្ចាស់ឡានបង់លុយឲ្យខ្លួនក្នុងមួយរថយន្ត6ម៉ឺនរៀល មុនពេលដែលធ្វើដំណើរដឹកអុសយកទៅដាក់នៅគោលដៅរបស់ខ្លួន ។
យោងតាមការស្រាវជ្រាវអ្នកយកព័ត៌មានយើងបានសួរនាំទៅរដ្ឋបាលព្រៃឈើអង្គស្នួល តែត្រូវបានប្រាប់ថាខាងរដ្ឋបាលព្រៃឈើមិនដែលមានគោលការណ៍ឲ្យមន្ត្រីធ្វើសកម្មភាពបែបនេះទេ បើមានក្រុមមនុស្សធ្វើទៅកម្មភាពបែបនេះមែនគឺជាអំពើល្មើសច្បាប់ហើយ ។ សកម្មភាពរបស់ក្រុមមនុស្សទាំងនេះអាចចាត់ទុកថា គឺជាសកម្មភាពដែលបង្កភាពអសន្តិសុខក្នុងសង្គម និងជាបទល្មើសកំហែងយកទៀតផង ប្រសិនបើក្រុមទាំងនោះប្រព្រឹត្តដូចការលើកឡើងមែន ។ ហើយបើសិនជាសមត្ថកិច្ចបង្ក្រាបបានក្រុមមនុស្សទាំងនេះប្រឈមមុខនឹងការជាប់ពន្ធនាគារផងដែរ ។
ទាក់ទិននឹងសេចក្តីរាយការណ៍ខាងលើនេះដែរ អ្នកយកព័ត៌មានយើងបានព្យាយាមទាក់ទងទៅកាន់លោកស៊ូកុលដើម្បីសុំការពន្យល់ដោយលោកបានបញ្ជាក់ថា លោកគឺជាមន្ត្រីអង្គការឈរជើងនៅកំបូលរូបលោកនិងក្រុមការងារមិនបានធ្វើសកម្មភាពដូចសេចក្តីរាយការណ៍នោះទេ ។ បើទោះជាលោកស៊ូ កុល បានបដិសេធយ៉ាងនេះក្តី ក៏ក្រុមអ្នកដឹកអុសធ្យូងបានបង្ហាញ និងបញ្ជាក់ច្បាស់ថា ប្រតិបត្តិការវេរលុយតាមទូរសព្ទគឺជាលេខកុងធនាគាររបស់លោកស៊ូ កុល ។
ព័ត៌មានបន្ថែមមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ