ខេត្តប៉ៃលិន ៖ រហូតមកដល់វេលាម៉ោង១០និង០០នាទីព្រឹកថ្ងៃទី៣១ ខែធ្នូ ឆ្នាំ២០២៥នេះ គ្រាន់តែក្រឡេកឃើញវីរកងទ័ពកម្ពុជាទាំង១៨រូប ដែលស្ថិតក្រោមការឃុំគ្រងរបស់ភាគីថៃ អស់រយៈពេល១៥៥ថ្ងៃ ត្រូវបានដោះលែង និងបញ្ជូនមកដល់ខ្លោងទ្វារព្រំដែន…
ខេត្តប៉ៃលិន ៖ រហូតមកដល់វេលាម៉ោង១០និង០០នាទីព្រឹកថ្ងៃទី៣១ ខែធ្នូ ឆ្នាំ២០២៥នេះ គ្រាន់តែក្រឡេកឃើញវីរកងទ័ពកម្ពុជាទាំង១៨រូប ដែលស្ថិតក្រោមការឃុំគ្រងរបស់ភាគីថៃ អស់រយៈពេល១៥៥ថ្ងៃ ត្រូវបានដោះលែង និងបញ្ជូនមកដល់ខ្លោងទ្វារព្រំដែន ខេត្តប៉ៃលិនភ្លាម ស្រាប់តែអ្នកខ្លះស្រែកទ្រហោយំ ដោយត្រេកអរ រំភើបខ្លាំងពេករកអ្វីមកប្រៀបផ្ទឹមពុំបាន រីឯអ្នកខ្លះទៀត បានលុតជង្គង់ ទទួលស្វាគមន៍ ដោយដឹងគុណអស់ពីដួងចិត្ត ដល់វីរកងទ័ពទាំងអស់គ្នា ។
លើសពីនេះ លោកជំទាវ បាន ស្រីមុំ អភិបាលខេត្តប៉ៃលិន និងឯកឧត្តម អ៊ី ឈាន ទេសរដ្ឋមន្ត្រី និងជាប្រធានក្រុមការងារចុះមូលដ្ឋានខេត្តប៉ៃលិន ក៏បានដឹកនាំក្រុមការងារចូលទៅឈររង់ចាំទទួលពួកគាត់ទាំងអស់នោះយ៉ាងកក់ក្តៅផងដែរ ។
បើតាមប្រភពព័ត៌មានពីស្ត្រីម្នាក់ គឹម លី អាយុ៥៥ឆ្នាំ រស់នៅក្នុងក្រុងប៉ៃលិន បានរៀបរាប់ទាំងទឹកភ្នែកហូរសស្រាក់នៅលើផែនផ្ទាល់ ឱ្យភ្នាក់ងារយើងដឹងថា ៖ តំណាងឱ្យប្រជាពលរដ្ឋនៅទូទាំងខេត្តប៉ៃលិន ក៏ដូចជាទូទាំងប្រទេសកម្ពុជា គាត់ពិតជាសូមចូលរួមអបអរសាទរ និងត្រេកអរយ៉ាងខ្លាំងពន់ពេក រកអ្វីមកប្រៀបផ្ទឹមពុំបាននោះឡើយ ខណៈដែលក្រុមគ្រួសារ សាច់ញាតិបងប្អូនរបស់វីរកងទ័ពទាំងនោះ ក៏ដេកមិនលក់ បក់មិនល្ហើយ ដោយម្នាក់ៗ ទន្ទឹងរង់ចាំមើលផ្លូវពួកគាត់ ដោយសង្ឃឹមថា យោធាថៃដោះលែងឱ្យត្រឡប់មកប្រទេសកម្ពុជាវិញ ។
ប្រភពបន្តទៀតថា កាលពីម្សិលម៉ិញគាត់ និងប្រជាពលរដ្ឋដទៃទៀត ក៏នាំគ្នាទៅឈររង់ចាំនៅច្រកទ្វារព្រំដែនម្តងរួចហើយ តាំងពីព្រលឹមរហូតដល់ពេលល្ងាច តែមិនឃើញគេបញ្ជូនពួកគាត់ឆ្លងដែនមកខ្មែរឡើយ ដែលធ្វើរូបគាត់ និងក្រុមគ្រួសារមន្ត្រីយោធាទាំងអស់ នាំគ្នាគិតកាន់តែខ្លាំងឡើងៗ ស្ទើរតែទទួលទានអាហារមិនបាននោះឡើយ ព្រោះបារម្ភពីសុវត្ថិភាពមន្ត្រីយោធាទាំងអស់នោះ។ តែនៅពេលនេះ ពួកគាត់ពិតជារំភើបខ្លាំងណាស់ ព្រោះម្នាក់ៗ បានដុតធូបបែរបន់ដល់លោកយាយយ៉ាតឱ្យតាមថែរក្សាកងទ័ពទាំងអស់ កុំឱ្យមានបញ្ហាអ្វីកើតឡើងដល់ពួកគាត់នោះឡើយ។
ប្រភពព័ត៌មានបានបញ្ជាក់ទៀតថា ក្រោយពេលវីរៈកងទ័ពត្រូវបានបញ្ជូនឆ្លងដែនចូលមកដល់ទឹកដីខេត្តប៉ៃលិនភ លោកជំទាវ បាន ស្រីមុំ អភិបាលខេត្តប៉ៃលិន ក៏បានរៀបចំឱ្យក្រុមការងារដឹកវីរៈកងទ័ពទាំង១៨នាក់ ទៅកាន់មន្ទីរពេទ្យបង្អែកខេត្តប៉ៃលិន ដើម្បីពិនិត្យសុខភាព លុះក្រោយពេលសម្រាកមួយរយៈពេលខ្លី ក៏បានជូនដំណើរពួកគាត់ទាំងអស់ឡើងរថយន្តបន្តទៅទៀត ដោយលោកជំទាវ ជូនពរដល់ពួកគាត់ឱ្យទទួលបាននូវសុវត្ថិភាព សុខភាពល្អ កម្លាំងមាំមួន ដើម្បីបន្តទៅជួបជុំក្រុមគ្រួសារ ដែលកំពុងទទឹងរង់ចាំផ្លូវអស់រយៈពេលជាច្រើនថ្ងៃខែ ៕
ចែករំលែកព័តមាននេះ