ទីក្រុងប៊ែឡាំង៖ ឆ្លៀតឱកាសដែលមនុស្សសប្បាយនឹងបុណ្យគ្រីសស្មាស់ ចោរមួយក្រុមនៅប្រទេសអាល្លឺម៉ង់បានប្រើប្រាស់ឧបករណ៍ខួងទូដែករបស់ធនាគារមួយកន្លែង និងលួចយកលុយយ៉ាងតិចដប់លានអឺរ៉ូ រួមទាំងទ្រព្យសម្បត្តិមានតម្លៃជាច្រើនទៀតដែលដាក់នៅក្នុងទូ។ នេះបើយោងតាមការឱ្យដឹងពីនគរបាល។
ក្រុមជនដៃដល់បានខួងជញ្ជាំងបេតុងក្រាស់នៃសាខាធនាគារស្ប៉ាកាស់ (Sparkasse) នៅទីក្រុងហ្គេលសិនខឺឆិន (Gelsenkirchen)។ បន្ទាប់មក ពួកគេដើរឆ្លងចូលទៅរកទូដាក់លុយ។ ហាងលក់ទំនិញ និងធនាគារភាគច្រើនបានបិទទ្វារនៅអាល្លឺម៉ង់កាលពីអំឡុងបុណ្យគ្រីសស្មាស់ដែលចាប់ផ្ដើមតាំងពីយប់ថ្ងៃទី២៤ ខែធ្នូ។
រហូតដល់ព្រឹកថ្ងៃចន្ទ ទី២៩ ខែធ្នូទើបនគរបាលដឹងរឿងនេះបន្ទាប់ពីកណ្ដឹងប្រកាសអាសន្នអគ្គិភ័យមិនដំណើរការ។ អតិថិជនរបស់ធនាគារខាងលើនេះមានអារម្មណ៍ខឹងសម្បារ និងប្រមូលផ្ដុំគ្នានៅមុខធនាគារ។ បុរសម្នាក់ប្រាប់ថាខ្លួនគេងមិនលក់ទាល់តែសោះពេញមួយយប់។ ខ្លួនមិនអាចទទួលព័ត៌មានអ្វីជាពិតប្រាកដទេ។
បុរសខាងលើនេះប្រាប់ថាគាត់បានប្រើប្រាស់សេវារបស់ធនាគារនេះរយៈពេល២៥ឆ្នាំមកហើយ។ គាត់ដាក់ប្រាក់សន្សំនៅធនាគារនេះទុកសម្រាប់ចាយនៅពេលចាស់ទៅ។ បុរសម្នាក់ទៀតប្រាប់ថាគាត់ប្រើប្រាស់ហិបដាក់លុយ និងគ្រឿងអលង្ការសម្រាប់គ្រួសាររបស់គាត់។ អ្នកនាំពាក្យធនាគារខាងលើនេះមិនបានឆ្លើយតបទៅនឹងសំណួររបស់អ្នកសារព័ត៌មានទេ។
យោងតាមការឱ្យដឹងពីនគរបាល សាក្សីបានរាយការណ៍ថាកាលពីយប់ថ្ងៃសៅរ៍ ពួកគេឃើញបុរសជាច្រើននាក់កាន់កាបូបធំៗនៅជណ្ដើរដែលតភ្ជាប់ទៅចំណតរថយន្ត។ ប្រភពខ្លះរាយការណ៍ថាគេឃើញរថយន្តអូឌី (Audi) ពណ៌ខ្មៅមួយគ្រឿងបើកចេញពីចំណតនោះកាលពីព្រឹកថ្ងៃចន្ទ និងឃើញបុរសបិទមុខជិះនៅក្នុងឡាននោះ។ ក្រោយពេលស្រាវជ្រាវ គេរកឃើញថានោះជាឡានដែលលួចពីទីក្រុងហេនអូវើ (Hanover) ចម្ងាយជាង២រយគីឡូម៉ែត្រពីកន្លែងកើតហេតុ។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ