រាជធានីភ្នំពេញ ៖ រថយន្តម៉ាក SCANIA ប្រភេទយីឌុបបែនដឹកដី ១គ្រឿង បានបើកបរបោះពួយក្នុងល្បឿនលឿន វ៉ាជែងរថយន្តដែលកំពុងបើកស្របគ្នា ចូលទៅចំណែកផ្លូវម្ខាងទៀត ក៏ជ្រុលទៅបុកជាមួយរថយន្តដឹកកុងតឺន័រ…
រាជធានីភ្នំពេញ ៖ រថយន្តម៉ាក SCANIA ប្រភេទយីឌុបបែនដឹកដី ១គ្រឿង បានបើកបរបោះពួយក្នុងល្បឿនលឿន វ៉ាជែងរថយន្តដែលកំពុងបើកស្របគ្នា ចូលទៅចំណែកផ្លូវម្ខាងទៀត ក៏ជ្រុលទៅបុកជាមួយរថយន្តដឹកកុងតឺន័រ ១គ្រឿងទៀត ពេញទំហឹង ខណៈពេលកំពុងបើកបរធ្វើដំណើរបញ្ច្រាស់ទិសគ្នា បណ្ដាលឲ្យបុរសដែលជាអ្នកបើកបររថយន្តកុងតឺន័រ រងរបួសធ្ងន់បាក់ជើងទាំង២ តែម្ដង ចំណែករថយន្តទាំង២គ្រឿង បានរងការខូចខាតយ៉ាដំណំដូចគ្នាផងដែរ ។
ឧប្បត្តិហេតុខាងលើនេះ បានកើតឡើងកាលពីវេលាម៉ោង០៦និង១០នាទីព្រឹកថ្ងៃទី៨ ខែឧសភា ឆ្នាំ២០២៤ នៅតាមផ្លូវជាតិលេខ៤ ស្ថិតនៅក្នុងភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ ។
រថយន្តយីឌុបបែនដឹកដី ១គ្រឿងខាងលើនោះ ម៉ាក SCANIA ពណ៍ព្រីងទុំ ពាក់ស្លាកលេខ ភ្នំពេញ 3F-1429 បើកបរដោយបុរសពុំស្គាល់អត្តសញ្ញាណម្នាក់ ហើយពុំដឹងថា រងរបួសឬអត់នោះទេ។ ចំណែករថយន្តកុងតឺន័រ ១គ្រឿងទៀត ពណ៍ស ពាក់ស្លាកលេខភ្នំពេញ 3F-2850 បុរសអ្នកបើកបររងរបួសធ្ងន់ បាក់ជើងទាំង២ តែម្ដង ។
អ្នកដំណើរតាមផ្លូវខាងលើ ដែលបានឃើញហេតុការណ៍បាននិយាយថា មុនពេលកើតហេតុ រថយន្តបែនយីឌុបដឹក បានបើកបរធ្វើដំណើរក្នុងទិសដៅពីកើតទៅលិច ហើយបានវ៉ាជែង រថយន្តដែលកំពុងបើកស្របគ្នាជាបន្តបន្ទាប់ ព្រមទាំងចូលទៅក្នុងចំណែកផ្លូវម្ខាងទៀតផងដែរ លុះពេលទៅដល់ត្រង់ចំណុចកើតហេតុ បានវាក់ជាមួយរថយន្តកុងតឺន័រ ខណៈពេលកំពុងបើកបរក្នុងទិសដៅបញ្ច្រាស់គ្នា បានបុកពេញទំហឹង ។
សាក្សីរូបនោះ បានប្រាប់ទៀតថា ពេលនោះ បណ្ដាលឲ្យរថយន្តទាំង២គ្រឿងរងការខូចខាតខ្ទេចមុខដូចគ្នា ហើយរថយន្តបែនដឹកដីបានរេចង្កូតជ្រុលចូលទៅច្រកផ្លូវបុរីពិភពថ្មី ចំណែករថយន្តកុងតឺន័រ ខ្ទាតចេញពីផ្លូវ និងវេទទឹងលើចិញ្ចើមផ្លូវ ហើយអ្នកបើកបររថយន្តកុងតឺន័រ រងរបួសបាក់ជើងទាំង២ និងត្រូវបានគេបញ្ជូនទៅសង្គ្រោះភ្លាមៗ ។ ក្រោយពេលកើតហេតុ នគរបាលប៉ុស្តិ៍កន្ទោកនិងនគរបាលខណ្ឌកំបូល បានចុះទៅធ្វើការវាស់វែង នាំនាំយករថយន្តទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ