រាជធានីភ្នំពេញ ៖ មហាជននាំគ្នាបួងសួងដល់វត្ថុស័ក្តិសិទ្ធិតាមជួយថែរក្សាព្រឹទ្ធាចារ្យកោសល្យវោហារ គង់ ណៃ បន្ទាប់ពីទទួលបានដំណឹងថា ព្រឹទ្ធាចារ្យកោសល្យវោហារ ត្រូវបានបញ្ជូនទៅសង្គ្រោះនៅមន្ទីរពេទ្យ កាលពីពេលថ្មីៗកន្លងទៅនេះ ។…
រាជធានីភ្នំពេញ ៖ មហាជននាំគ្នាបួងសួងដល់វត្ថុស័ក្តិសិទ្ធិតាមជួយថែរក្សាព្រឹទ្ធាចារ្យកោសល្យវោហារ គង់ ណៃ បន្ទាប់ពីទទួលបានដំណឹងថា ព្រឹទ្ធាចារ្យកោសល្យវោហារ ត្រូវបានបញ្ជូនទៅសង្គ្រោះនៅមន្ទីរពេទ្យ កាលពីពេលថ្មីៗកន្លងទៅនេះ ។
ព្រឹទ្ធាចារ្យកោសល្យវោហារ គង់ ណៃ ដែលគេស្គាល់ថា ព្រឹទ្ធាចារ្យចាប៉ី ដែលមានវ័យចំណាស់ ត្រូវបានក្រុមគ្រួសារបញ្ចូនមកមន្ទីរពេទ្យរុស្ស៊ីភ្លាមៗ ក្រោយលោកតាមានអាការៈពុំសូវស្រួលខ្លួន ។ លោកតា គង់ណៃ ដែលជាមរតកមនុស្សរស់ របស់ប្រទេសកម្ពុជាយើងគិតមកដល់ពេលបច្ចុប្បន្ននេះ គឺមានវ័យ៨០ឆ្នាំហើយ ។ ជាមួយគ្នានោះ លោកព្រឹទ្ធចារ្យក៏ត្រូវបានធ្វើទុក្ខជាញឹកញាប់ ដោយសារតែជំងឺផងដែរ ។
ជាក់ស្តែងថ្មីៗនេះព្រឹទ្ធាចារ្យ គង់ ណៃ ដែលជាសិល្បករចាប៉ីដងវែងដ៏ល្បីល្បាញមួយរូប របស់កម្ពុជា មានអាការៈមិនស្រួលភ្លាមកូនចៅក៏បានបញ្ចូនមកមន្ទីរពេទ្យរុស្សី ។ នេះបើយោងតាមសំណេររបស់ លោក គង់ សម័យ ដែលជាកូនប្រុសរបស់លោកតាគង់ណៃ ។
យោងតាមការបង្ហោះលើហ្វេសប៊ុកផេកផ្លូវការរបស់ខ្លួន លោក គង់ សម័យ បានបញ្ជាក់ថា « ថ្ងៃអាទិត្យទី០៥ ខែឧសភា ឆ្នាំ២០២៤ នាំពុកមកពេទ្យរុស្ស៊ីសម្រាកព្យាបាលជំងឺ» ។
តាមរយៈសំណេរទាំងនេះ មហាជនសម្តែងការអាណិតដល់លោកតាដែលជាព្រឹទ្ធា ដោយម្នាក់បានលើកឡើងថា « សូមជូនពរលោកតា ឆាប់ជាសះស្បើយមានសុខភាពល្អ រឹងមាំ និងកម្លាំងខ្លាំងក្លាឡើងវិញនោះ» និងខ្លះទៀតក៏បានសួរសុខទុក្ខលោកតាជាដើមនោះ ។ គិតមកដល់ថ្ងៃទី៨ ខែឧសភានេះ លោកតា គង់ណៃ បានចូលសម្រាកព្យាបាលជម្ងឺនៅមន្ទីរពេទ្យរុស្សី អស់រយៈពេល៤ថ្ងៃហើយ ហើយក៏ទទួលបានព័ត៌មានថា ស្ថានភាពសុខភាពលោកតាក៏ប្រសើរឡើងវិញផងដែរ ដោយលោកតាទទួលបានការយកចិត្តទុកពីសំណាក់ក្រុមគ្រូពេទ្យនៅមន្ទីរពេទ្យរុស្សី ។ លោកព្រឹទ្ធាចារ្យ គឺមានសុខភាល្អប្រសើរជាមុន ដោយលោកអាចពិសាបានទឹកបានខ្លះ តែពុំច្រើននោះទេ ។
តាមរយៈបទសម្ភាសន៍ជាមួយសារព័ត៌មានកោះសន្តិភាព អ្នកស្រី គង់ ធារី ដែលជាកូនទី៥ របស់ព្រឹទ្ធាចារ្យកោសល្យវោហារគង់និយាយថា ដំបូងឡើយ លោកក្តៅខ្លួន ដាក់សារ៉ូម ហើយក៏រលាកបំពង់.ក ពិបាកដកដង្ហើម ពោលក្រោយមានអាការៈពុំសូវសមប្រកប ក្រុមគ្រួសារ និងកូនចៅ បានបញ្ចូនលោកតាមកមន្ទីរពេទ្យរុស្សីភ្លាមៗ ។
អ្នកស្រី គង់ ធារី ដែលកំពុងមើលថែព្រឹទ្ធាចារ្យ គង់ណៃ នៅមន្ទីរពេទ្យយ៉ាងដិតដល់នោះបន្តថា នាព្រឹកនេះ លោកតាពិសាអាហារបានខ្លះ ដោយបានបបរ៤ទៅ៥ម៉ាត់ និងបាយ២បី៣ម៉ាត់ដែរ ដោយការតែជម្ងឺធ្វើអោយលោកតាបាយទឹកពុំសូវបាន ពោលមានការអស់កម្លាំង ព្រោះមិនសូវបរិភោគបានច្រើន ។ តែបើធៀបកាលពីថ្ងៃទៅមិញ គឺថ្ងៃនេះរៀងប្រសើរណាស់ ព្រោះលោកបានពិសាខអាហារបានខ្លះៗនោះ ។ ជាមួយគ្នានេះដែរ អ្នកស្រី គង់ ធារីថា លោកតាមានជម្ងឺ សួត ទឹកនោមផ្អែម ហើយពេលនេះរលាកបំពង់.ក ដូច្នេះការពិសាអាហារបាយទឹក បានតិចតួច ។
ជាការពិតណាស់ ក្រោយលោកតាព្រឹទ្ធាចារ្យគង់ណៃ ចូលមន្ទីរពេទ្យភ្លាមៗនោះ គ្រូពេទ្យស្ម័គ្រចិត្តយុវជនសម្តេចតេជោ ក៏បានចុះជួបសួរសុខទុក្ខផងដែរ ដោយបង្ហោះសារថា « សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឧបត្ថម្ភដល់ការព្យាបាលជំងឺរបស់លោកព្រឹទ្ធាចារ្យ គង់ ណៃ នាព្រឹកថ្ងៃទី៧ ខែ ឧសភា ឆ្នាំ២០២៤ ក្រុមការងារសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានចុះសួរសុខទុក្ខ និងនាំយកថវិកា ដែលជាអំណោយដ៏ថ្លៃថ្លារបស់ សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់លោកព្រឹទ្ធាចារ្យ គង់ ណៃ វីរៈសិល្បៈករចាប៉ី ដងវែងដ៏ល្បីល្បាញ ដែលខណៈនេះ លោកកំពុងសម្រាកព្យាបាលនៅផ្នែកបេះដូង នៃមន្ទីរពេទ្យមិត្តភាពខ្មែរ-សូវៀត ។
ដោយមានការយកចិត្តទុកដាក់ដ៏ខ្ពង់ខ្ពស់ពីសំណាក់ សម្តេចធិបតី និងលោកជំទាវបណ្ឌិត, លោកទាំងទ្វេបានរ៉ាប់រងរាល់ការចំណាយទាំងអស់ទាំងក្នុងការព្យាបាល ស្នាក់នៅ និងហូបចុករបស់លោកព្រឹទ្ធាចារ្យ »។ តើប្រិយមិត្តអ្នកស្តាប់មានពាក្យពេចន៍អ្វីខ្លះជូនពរដល់លោកតាព្រឹទ្ធាចារ្យ គង់ ណៃ ដែលជាសិល្បករចាប៉ីដងវែងដ៏ល្បីល្បាញមួយរូបរបស់កម្ពុជាយោង? ដោយ៖លីហួ គីមឆាយ
ចែករំលែកព័តមាននេះ