រាជធានីភ្នំពេញ ៖ តាមគម្រោងប្រចាំឆ្នាំរបស់គណៈកម្មាធិការជាតិអូឡាំពិកកម្ពុជាក្រោមការឧបត្ថម្ភរបស់អង្គការសាមគ្គីអូឡាំពិកអន្តរជាតិ និងជាគំនិតផ្តួចផ្តើមរបស់សហព័ន្ធកីឡាទ្រីយ៉ាត្លុងអន្តរជាតិផងនោះ សហព័ន្ធកីឡាទ្រីយ៉ាត្លុងកម្ពុជាគ្រោងបើកវគ្គបណ្តុះបណ្តាលជំនាញបច្ចេកទេសគ្រូបង្វឹកកីឡាទ្រីយ៉ាត្លុងកម្ពុជាលើកទី១ ចាប់ពីថ្ងៃទី១៩ ដល់ថ្ងៃទី២៥ ខែកក្កដា ឆ្នាំ២០១៤ ខាងមុខនេះ ដោយមានសិក្ខាកាមដែលជាគ្រូបង្វឹកមកពីក្លិបសមាគមផ្សេងៗចំនួន២៥នាក់ចូលរួម ។
លោក ងិន សុខបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានប្រាប់កោះសន្តិភាពថា នេះជាលើកទី១ហើយសម្រាប់សហព័ន្ធកីឡាទ្រីយ៉ាត្លុងកម្ពុជាដែលទទួលបានវគ្គបណ្តុះបណ្តាលគ្រូបង្វឹកនេះដែលពីមុនមកយើងមិនធ្លាប់ធ្វើឡើយ ។ ចំពោះគ្រូបង្វឹកដែលចូលរួមក្នុងវគ្គនេះគឺយើងបានធ្វើការស្នើសុំគ្រូពីក្រសួងអប់រំយុវជននិងកីឡា សមាគម និងក្លិបដែលជាសមាជិកដែលមានស្រាប់ចំនួន២៥នាក់ តែអាចមានចំនួនលើសនេះ បើសិនពួកគាត់ធ្វើការស្នើសុំចូលរួម ។ វគ្គបណ្តុះបណ្តាលនេះគឺស្ថិតនៅក្នុងទិសដៅរបស់យើងដែលកំពុងតែផ្តោតជាសំខាន់លើការផ្សព្វផ្សាយកីឡាទ្រីយ៉ាត្លុងកម្ពុជាឱ្យបានទូលំទូលាយ ហើយបើសិនជាយើងគិតតែពង្រីកដោយមិនមានថ្នាលបន្តវេនល្អៗនោះ ក៏មិនអាចដំណើរការបានល្អដែរ ។
ដូច្នេះនេះគឺជាកូនសោមួយដ៏សំខាន់ ព្រោះក្រោយពីចប់វគ្គនេះទៅ គឺយើងទទួលបាននូវគ្រូដែលមានកម្រិតជំនាញ និងបច្ចេកទេសកាន់តែល្អជាងនេះបន្ថែមទៀត ។ លោក ងិន សុខបញ្ញា បន្តទៀតថា បច្ចុប្បន្ននេះ សហព័ន្ធកំពុងខិតខំជំរុញយ៉ាងខ្លាំងទៅដល់សមាគម និងក្លិបកីឡាទ្រីយ៉ាត្លុងក្នុងស្រុកទាំងអស់ ឱ្យពង្រីកសមត្ថភាពកីឡាករ-កីឡាការិនី និងយុវជនជំនាន់ក្រោយឱ្យមានការរីកចម្រើនបន្ថែមទៀត ដើម្បីជាការត្រៀមខ្លួនឱ្យហើយក្នុងការចូលរួមប្រកួតកីឡា SEA Games លើកទី២៨ នៅសិង្ហបុរីនាឆ្នាំ២០១៥ខាងមុខ ។
គួររំលឹកផងដែរថា វគ្គនេះជាសញ្ញាមួយដ៏ល្អសម្រាប់សហព័ន្ធកីឡាទ្រីយ៉ាត្លុងកម្ពុជាដែលបានខិតខំតស៊ូសម្រេចគោលដៅរបស់ខ្លួនក្នុងការបង្កើតឡើងជាសហព័ន្ធដែលអាចទាក់ទាញការស្រលាញ់ចូលចិត្តពីអ្នកស្នេហាវិស័យកីឡាជាច្រើន ជាពិសេសបានបង្កើតនូវព្រឹត្តិការណ៍ថ្នាក់ជាតិធំៗដែលមានការគាំទ្រពីមហាជនជាច្រើនផងដែរ ។ បច្ចុប្បន្ននេះ សហព័ន្ធបាននិងកំពុងបណ្តុះបណ្តាលថ្នាលរបស់ខ្លួន ហើយក្នុងនោះកីឡាករចំនួន៤នាក់កំពុងតែមានវត្តមានក្នុងជំរំហ្វឹកហាត់កីឡាជម្រើសជាតិសម្រាប់ត្រៀមចូលរួមក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ (SEA Games) លើកទី២៨ នៅប្រទេសសិង្ហបុរីទៀតផង ។
សហព័ន្ធកីឡាទ្រីយ៉ាត្លុងកម្ពុជាបង្កើតឡើងតាំងពីឆ្នាំ២០០៩មកម៉្លេះ ប៉ុន្តែកីឡានេះត្រូវបានប្រជាជនកម្ពុជាស្គាល់ជាទូទៅ ក៏ដូចជាមានសកម្មភាពកាន់តែផុសផុលនៅដើមឆ្នាំ២០១២ ។ កីឡាទ្រីយ៉ាត្លុងនេះ បែងចែកជា៣គឺ១-ទ្រីយ៉ាត្លុងឈុតធំ អត្តពលិកម្នាក់លេង៣វិញ្ញាសាដែលមានហែលទឹក+ជិះកង់+រត់ប្រណាំង ។ ២-ឌូអាត្លុង កីឡាករម្នាក់លេងតែ២វិញ្ញាសាទេ គឺជិះកង់+រត់ប្រណាំង ប៉ុន្តែលេង៣ដំណាក់កាលមានរត់បន្ទាប់មកជិះកង់រួចមករត់បន្តទៀត និង៣-អាគ័រត្លុងមាន២វិញ្ញាសាដូចគ្នា គឺហែលទឹក និងរត់ប្រណាំងប៉ុណ្ណោះ ៕
ចែករំលែកព័តមាននេះ