ប្រទេសវៀតណាម ៖ ដូចការរំពឹងទុកមែន កីឡាករប្រដាល់កម្ពុជាគោរមៈ ចាន់រាជ្យ បានក្លាយជាម្ចាស់ខ្សែក្រវាត់GMAក្នុងប្រភេទទម្ងន់៥៧គីឡូក្រាមបន្ទាប់ពីយកឈ្នះកីឡាករMENG TANBOរបស់ម៉ាឡេស៊ីក្នុងទឹកទី២ក្នុងព្រឹត្តិការណ៍ប្រកួតគុនចម្រុះMMAនៅប្រទេសវៀតណាមកាលពីថ្ងៃទី០២ សីហា ឆ្នាំ២០២៥។ មុនពេលចេញទៅប្រកួត…
ប្រទេសវៀតណាម ៖ ដូចការរំពឹងទុកមែន កីឡាករប្រដាល់កម្ពុជាគោរមៈ ចាន់រាជ្យ បានក្លាយជាម្ចាស់ខ្សែក្រវាត់GMAក្នុងប្រភេទទម្ងន់៥៧គីឡូក្រាមបន្ទាប់ពីយកឈ្នះកីឡាករMENG TANBOរបស់ម៉ាឡេស៊ីក្នុងទឹកទី២ក្នុងព្រឹត្តិការណ៍ប្រកួតគុនចម្រុះMMAនៅប្រទេសវៀតណាមកាលពីថ្ងៃទី០២ សីហា ឆ្នាំ២០២៥។
មុនពេលចេញទៅប្រកួត កីឡាករគោរមៈ ចាន់រាជ្យ បានតាមដានសកម្មភាពប្រកួតរបស់ដៃគូយ៉ាងល្អិតល្អន់បំផុត និងបានឃើញពីចំណុចខ្លាំងនិងខ្សោយរបស់កីឡាករMENG TANBOដើម្បីត្រៀមលក្ខណៈគ្រប់គ្រាន់យកឈ្នះការប្រកួតឱ្យទាល់តែបាន ។ ការប្រកួត១ទឹកដំបូង គោរមៈ ចាន់រាជ្យ ត្រូវកីឡាករម៉ាឡេស៊ីចាប់បោកសង្កត់ពីលើដោយកម្លាំងស្ទើរតែមិនអាចតដៃបាន ។ ទោះបីយ៉ាងណា គោរមៈ ចាន់រាជ្យ បានព្យាយាមរើបម្រះ រហូតមានឱកាសចាប់បោកផ្ដួលសង្កត់ពីលើវិញទាល់តែចប់ទឹកទី១។
ចូលដល់ទឹកទី២ គោរមៈ ចាន់រាជ្យ ព្យាយាមចាប់ក្លេ និងបានបុកកែងចូលគោលដៅពេញទំហឹង ធ្វើឱ្យកីឡាករម៉ាឡេស៊ីដួលទៅលើក្ដារសង្វៀន ។ ដោយឃើញឱកាសល្អគោរមៈ ចាន់រាជ្យ បានបន្តវាយកែងសង្គ្រុបជាប់មិនឱ្យតដៃរួច ទើបអាជ្ញាកណ្ដាលសម្រេចបញ្ឈប់ការប្រកួតតែម្ដងដោយសារបារម្ភខ្លាចកីឡាករម៉ាឡេសុីទទួលគ្រោះថ្នាក់ធ្ងន់ធ្ងរ។
គួរបញ្ជាក់ថា ការប្រកួតជាលក្ខណៈគុនចម្រុះមាន៣ទឹក ក្នុង១ទឹកមាន៥នាទី តែសម្រាប់កីឡាករគោរមៈ ចាន់រាជ្យ របស់កម្ពុជាពិតជាធ្វើបានល្អខ្លាំងណាស់ ដោយដណ្ដើមបានខ្សែក្រវាត់មកជូនជាតិទាល់តែបាន ។
ដោយឡែកកីឡាករកម្ពុជា២រូបទៀតមានឡុង ឡា និងរិន សារ័ត្ន មិនអាចដណ្ដើមជ័យជម្នះពីការប្រកួតលើកនេះបានឡើយ ។ ឡុង ឡា បានចាញ់កីឡាកម៉ាឡេស៊ីឈ្មោះTAN TERENZ ក្នុងការប្រកួតដណ្ដើមខ្សែក្រវាត់ក្នុងប្រភេទទម្ងន់៥៩គីឡូក្រាម ចំណែកកីឡាកររិន សារ័ត្ន ចាញ់ពិន្ទុកីឡាករថៃ Chayut ROJANAKATក្នុងការប្រកួតដណ្ដើមខ្សែក្រវាត់ប្រភេទទម្ងន់៦៨គីឡូក្រាម ៕
ចែករំលែកព័តមាននេះ