ប្រទេសថៃ ៖ ភ្លៀងធ្លាក់ខ្លាំងរយៈពេលយូរបណ្តាលឱ្យមានទឹកជំនន់នៅឯភាគខាងត្បូងប្រទេសថៃ កំពុងតែបង្កើនការព្រួយបារម្ភកាន់តែខ្លាំងឡើងអំពីការរៀបចំព្រឹត្តិការណ៍កីឡាស៊ីហ្គេមលើកទី ៣៣ ដែលគ្រោងនឹងធ្វើឡើងនៅខែក្រោយ។ យោងតាមការចេញផ្សាយពីសារព័ត៌មានវៀតណាម Znews កាលពីថ្ងៃទី២៤ ខែវិច្ឆិកា…
ប្រទេសថៃ ៖ ភ្លៀងធ្លាក់ខ្លាំងរយៈពេលយូរបណ្តាលឱ្យមានទឹកជំនន់នៅឯភាគខាងត្បូងប្រទេសថៃ កំពុងតែបង្កើនការព្រួយបារម្ភកាន់តែខ្លាំងឡើងអំពីការរៀបចំព្រឹត្តិការណ៍កីឡាស៊ីហ្គេមលើកទី ៣៣ ដែលគ្រោងនឹងធ្វើឡើងនៅខែក្រោយ។
យោងតាមការចេញផ្សាយពីសារព័ត៌មានវៀតណាម Znews កាលពីថ្ងៃទី២៤ ខែវិច្ឆិកា ឆ្នាំ២០២៥ ដោយស្រង់ប្រភពពីសារព័ត៌មាន Astro បានឱ្យដឹងថា ទីលានកីឡាជាច្រើននៅក្នុងទីក្រុងសុងក្លា (Songkhla) ខេត្តសុងក្លា បានរងការខូចខាតយ៉ាងធ្ងន់ធ្ងរ ដោយសារផលប៉ះពាល់នៃគ្រោះទឹកជំនន់។
ពិសេស ពហុកីឡដ្ឋាន ទិន ស៊ូឡាណុន (Tinsulanon) ដែលគ្រោងនឹងធ្វើម្ចាស់ផ្ទះការប្រកួតបាល់ទាត់ផ្នែកបុរស ក៏ត្រូវបានលិចលង់ផងដែរ។ រូបភាព និងរបាយការណ៍ពីកន្លែងកើតហេតុបានបង្ហាញថា ទីលាន និងតំបន់ជុំវិញនោះ ត្រូវបានជន់លិច គំរាមកំហែងដល់ការជួសជុល និងការរៀបចំទីលានស្មៅទាន់ពេលវេលា សម្រាប់ការប្រកួតកីឡាស៊ីហ្គេមនៅខែក្រោយ។
លើសពីនេះទៀត ទីលានសម្រាប់ការប្រកួតកីឡាមួយថៃ (Muay Thai) និង បញ្ចសិលា (Pencak Silat) នៅមជ្ឈមណ្ឌលកីឡា ភូ ឃ្លាំងខាវ (Phru Khang Khao) និង ជីរ៉ាណាខុន (Chira Nakhon Sports Complex) ក៏រងផលប៉ះពាល់ស្រដៀងគ្នាដែរ។ ទីលានទាំង ២ ត្រូវបានរាយការណ៍ពីទឹកជំនន់ក្នុងតំបន់សំខាន់មួយចំនួន ដែលធ្វើឱ្យពិបាកក្នុងការផ្លាស់ទីឧបករណ៍ ដំណើរការត្រួតពិនិត្យសុវត្ថិភាព និងការរៀបចំកន្លែងផ្សេងទៀត។
បច្ចុប្បន្ន អាជ្ញាធរមូលដ្ឋាន ព្រមទាំងគណៈកម្មាធិការរៀបចំកីឡាស៊ីហ្គេមលើកទី ៣៣ កំពុងសម្របសម្រួលដោះស្រាយបន្ទាន់ ដើម្បីជំនះផលវិបាក រួមទាំងការបូមទឹកចេញ ការត្រួតពិនិត្យរចនាសម្ព័ន្ធអគារ និងវាយតម្លៃកម្រិតសុវត្ថិភាពនៃពហុកីឡដ្ឋាននីមួយៗ។ លើសពីនេះទៀត ផែនការបន្ទាន់សម្រាប់ការផ្លាស់ប្តូរទីកន្លែងប្រកួត ឬកែសម្រួលកាលវិភាគប្រកួត ក៏កំពុងត្រូវបានពិភាក្សាផងដែរ ដើម្បីធានាថា ព្រឹត្តិការណ៍ស៊ីហ្គេមលើកទី ៣៣ ប្រព្រឹត្តទៅតាមការគ្រោងទុក។
គួរបញ្ជាក់ថា ព្រឹត្តិការណ៍កីឡាប្រជាជាតិអាស៊ីអាគ្នេយ៍ ឬកីឡាស៊ីហ្គេមលើកទី៣៣ តាមការគ្រោងទុកនឹងប្រព្រឹត្តទៅចាប់ពីថ្ងៃទី៩ ដល់ថ្ងៃទី២០ ខែធ្នូ នៅទូទាំងទីក្រុងចំនួន ៣ របស់ប្រទេសថៃ រួមមាន ៖ ទីក្រុងបាងកក សុងក្លា និងឈុនបុរី។ អត្តពលិកប្រមាណ ១២,៥០០នាក់មកពីប្រទេសអាស៊ីអាគ្នេយ៍ចំនួន ១១ ត្រូវបានរំពឹងថានឹងប្រកួតប្រជែងនៅក្នុងវិញ្ញាសាចំនួន ៥៧៤ ចេញពីកីឡាសរុបចំនួន ៥០ ប្រភេទ៕ ប្រភព ៖ Znews
ចែករំលែកព័តមាននេះ