រាជធានីភ្នំពេញ ៖ ខណៈពេលដែលវិស័យកីឡាប្រដាល់គុនខ្មែរ កាន់តែមានភាពរីកចម្រើនខ្លាំង សហព័ន្ធកីឡាប្រដាល់គុនខ្មែរបានបង្កើតច្បាប់ថ្មីមួយទៀត កាលពីពេលថ្មីនេះ បានណែនាំទៅដល់កីឡាករ-កីឡាការិនី ដែលមានអាយុត្រឹម១៥-១៦ឆ្នាំចុះក្រោម មុនពេលឡើងសង្វៀនប្រកួត ត្រូវគោរពឱ្យបានតាមបទបញ្ជាបច្ចេកទេសត្រឹមត្រូវ…
រាជធានីភ្នំពេញ ៖ ខណៈពេលដែលវិស័យកីឡាប្រដាល់គុនខ្មែរ កាន់តែមានភាពរីកចម្រើនខ្លាំង សហព័ន្ធកីឡាប្រដាល់គុនខ្មែរបានបង្កើតច្បាប់ថ្មីមួយទៀត កាលពីពេលថ្មីនេះ បានណែនាំទៅដល់កីឡាករ-កីឡាការិនី ដែលមានអាយុត្រឹម១៥-១៦ឆ្នាំចុះក្រោម មុនពេលឡើងសង្វៀនប្រកួត ត្រូវគោរពឱ្យបានតាមបទបញ្ជាបច្ចេកទេសត្រឹមត្រូវ ។
យោងតាមស្មារតីអង្គប្រជុំ គណៈអចិន្តៃយ៍ និងដៃគូអភិវឌ្ឍ កាលពីថ្ងៃទី១៩ ខែវិច្ឆិកា ឆ្នាំ២០២៥ ដើម្បីរក្សាសុវត្ថិភាព សុខភាព គុណផល និងភាពត្រឹមត្រូវ សុក្រិត្យភាព យុត្តិធម៌ជូនដល់កីឡាករ កីឡាការិនី នៅក្នុងការប្រកួត សហព័ន្ធកីឡាប្រដាល់គុនខ្មែរបានធ្វើការណែនាំ ទៅដល់កីឡាករ កីឡាការិនី ដែលមានអាយុក្រោម១៦ឆ្នាំ មិនអនុញ្ញាតឱ្យប្រកួត ដោយប្រើស្រោមដៃ(ហ្គង់)ចេញម្រាម ឬអំបោះឆៅឡើយ។ ជាពិសេសកីឡាករ កីឡាការិនី ដែលមានអាយុក្រោម១៥ឆ្នាំ ពេលប្រកួត ត្រូវតែពាក់ប្រដាប់ការពារក្បាល និងកែដៃ ។
នៅក្នុងបទបញ្ជា បច្ចេកទេសគ្រប់គ្រងការប្រកួតនេះទៀត បានបញ្ជាក់ឱ្យដឹងបន្ថែមទៀតថា ចំពោះកីឡាករ កីឡាការិនី ដែលត្រូវបានដៃគូប្រកួតវាយចំប្រដាប់ការពារ(ភេ.ទ) ពេលកំពុងប្រកួត អាជ្ញាកណ្ដាល ត្រូវពិចារណាទៅលើស្ថានភាពធ្ងន់ ឬស្រាល។ បើស្ថានភាពធ្ងន់ ត្រូវការសម្រាកសម្រួលឱ្យកីឡាករ កីឡាការិនីនោះវិលមកស្ថានភាពប្រក្រតីវិញ អាជ្ញាកណ្ដាល ត្រូវផ្អាកការប្រកួតផ្ដល់សញ្ញាទៅឱ្យគណៈវិនិច្ឆ័យ និងមន្ត្រីរក្សាថិរវេលា សម្រាករយៈពេល២នាទី។ ហើយប្រសិនបើ សម្រាកសម្រួលរយៈពេល២នាទី លើកទី១ មិនទាន់ស្រួល មិនអាចប្រកួតតទៅទៀតបាន អាជ្ញាកណ្ដាល ត្រូវសម្រាកសម្រួលរយៈពេល២នាទីទៀត ជាលើកទី២។ ហើយមុនចប់រយៈពេល២នាទី លើកទី២ បើនៅតែមិនអាចប្រកួតបាន អាជ្ញាកណ្ដាល ពិនិត្យមើលលើវីដេអូយឺតៗ អំពីស្ថាបភាពវាយត្រូវប្រដាប់ករពារភេ.ទ និងពិភាក្សាជាមួយគណៈវិនិច្ឆ័យ ត្រៀមវិនិច្ឆ័យសម្រេចលទ្ធផល នៃការប្រកួត។ ជាពិសេសអាជ្ញាកណ្ដាល ត្រូវរាប់តាមនិតិវិធី និងធ្វើការសម្រេចលទ្ធផល ដែលបានពិភាក្សាជាមួយគណៈវិនិច្ឆ័យ ផ្នែកទី១៧ ចំណុចទី១០ ។
សហព័ន្ធកីឡាប្រដាល់គុនខ្មែរ សង្ឃឹមយ៉ាងមុតមាំ ថា ឯកឧត្តម លោកជំទាវ លោក លោកស្រី ប្រធានសមាគមក្លឹបកីឡាករ កីឡាការិនី មន្ត្រីបច្ចេកទេស អាជ្ញាកណ្ដាល ចៅក្រមកីឡាប្រដាល់គុនខ្មែរ អនុវត្តបានត្រឹមត្រូវ ៕
ចែករំលែកព័តមាននេះ