សហរដ្ឋអាមេរិក ៖ ទំនាក់ទំនងមិត្តភាពដ៏ជិតស្និទ្ធរវាងប្រធានាធិបតីសហរដ្ឋអាមេរិក និងប្រធានសហព័ន្ធបាល់ទាត់ពិភពលោក (FIFA) លោក Gianni Infantino អាចនឹងក្លាយទៅជាទំនាក់ទំនងការងារដ៏សំខាន់ បន្ទាប់ពីកាសែត New York Post កាលពីថ្ងៃទី២១ ខែកក្កដា ឆ្នាំ២០២៦ បានរាយការណ៍ថា លោកប្រធានាធិបតី ដូណាល់ ត្រាំ (Donald Trump) ចង់ឱ្យប្រធាន FIFA រូបនេះ ធ្វើជាអគ្គលេខាធិការបន្ទាប់នៃអង្គការសហប្រជាជាតិ (UN)។
ប្រភពមួយបានបង្ហើបប្រាប់កាសែត New York Post ថា លោកប្រធានាធិបតី ត្រាំ មានទំនុកចិត្តថា លោក Infantino គឺត្រូវបានគោរពដោយមនុស្សគ្រប់គ្នានៅជុំវិញពិភពលោកហើយបន្ទាប់ពី World Cup ឆ្នាំ២០២៦ ដែលជាព្រឹត្តិការណ៍លើកដំបូងបង្អស់ធ្វើឡើងនៅក្នុងប្រទេស៣ផ្សេងគ្នានោះ (សហរដ្ឋអាមេរិក កាណាដា និងម៉ិកស៊ិក) ប្រធានាធិបតីទី ៤៥ និងទី ៤៧ របស់សហរដ្ឋអាមេរិករូបនេះ ជឿជាក់ថាពិភពលោកទទួលស្គាល់ថា លោក Infantino មានសមត្ថភាពពិសេសក្នុងការបង្រួបបង្រួមមនុស្សជាតិ។
សេតវិមានមិនបានធ្វើការឆ្លើយតបភ្លាមៗ ចំពោះសំណើសុំការអត្ថាធិប្បាយពីទូរទស្សន៍ Fox News Digital ជុំវិញបញ្ហានេះនៅឡើយទេ។
អគ្គលេខាធិការបន្ទាប់របស់ UN នឹងត្រូវជ្រើសរើសនៅក្នុងឆ្នាំនេះ ដើម្បីជំនួសលោក António Guterres ជនជាតិព័រទុយហ្គាល់ ដែលនឹងត្រូវចូលនិវត្តន៍ ហើយដើរចេញពីតំណែងដ៏សំខាន់នេះនៅចុងខែធ្នូ។ ទោះយ៉ាងណាក៏ដោយ ដើម្បីទទួលបានតំណែងដ៏សំខាន់នេះ លោក Infantino ត្រូវឈ្នះការគាំទ្រពីក្រុមប្រឹក្សាសន្តិសុខដែលមានសមាជិក ១៥ ប្រទេស ដែលក្នុងនោះសមាជិកអចិន្ត្រៃយ៍ទាំង៥មានសិទ្ធិវេតូ (ជំទាស់) បន្ទាប់មកត្រូវឆ្លងកាត់ការអនុម័តយល់ព្រមពីមហាសន្និបាត។ ប៉ុន្តែវាក៏មិនច្បាស់ទេថា តើលោក Infantino ចង់បានការងារនេះដែរឬទេ ហើយថាតើលោក ត្រាំ បានពិភាក្សាអំពីប្រធានបទនេះជាមួយលោកនៅក្នុងកម្រិតណានោះទេ?
គួរបញ្ជាក់ជូនថា លោក Infantino ជនជាតិស្វីសមេដឹកនាំស្ថាប័នក្បាលម៉ាស៊ីនបាល់ទាត់ពិភពលោក បានបង្កើតទំនាក់ទំនងជិតស្និទ្ធជាមួយលោក ត្រាំ យ៉ាងស្អិតល្មួតអំឡុងពេលរៀបចំការប្រកួត World Cup ឆ្នាំ ២០២៦។ លោក ត្រាំ បានចូលរួមក្នុងសកម្មភាព និងកម្មវិធីផ្សេងៗជាច្រើន រួមទាំងលោក Infantino បានប្រគល់រង្វាន់សន្តិភាពលើកដំបូងបង្អស់របស់ FIFA ជូនលោក ត្រាំ កាលពីខែធ្នូ ឆ្នាំមុនផងដែរ។
លោក ត្រាំ ក៏ត្រូវបានអញ្ជើញជាអធិបតីប្រគល់ពានរង្វាន់ FIFA Club World Cup ដល់ក្លិប Chelsea កាលពីឆ្នាំមុន ក៏ដូចជាប្រគល់ពានរង្វាន់ World Cup ឆ្នាំ២០២៦ ជូនក្រុមជម្រើសជាតិអេស្ប៉ាញ កាលពីពេលថ្មីៗនេះផងដែរ៕
ចែករំលែកព័តមាននេះ