ប្រទេសអាល្លឺម៉ង់ ៖ យោងតាមរបាយការណ៍កាសែតអាល្លឺម៉ង់ BILD កាលពេលពីថ្មីៗនេះ បានឱ្យដឹងថា ក្លិប Liverpool កំពុងពិចារណាចាយប្រាក់ ៦០លានអឺរ៉ូ (ជាង ៦៨លានដុល្លារអាមេរិក) ដើម្បីនាំយកខ្សែបម្រើការពារជប៉ុន Kaishu Sano បន្ទាប់ពីការបង្ហាញទម្រង់លេងដ៏គួរឱ្យចាប់អារមណ៍ក្នុងលីគកំពូលអាល្លឺម៉ង់ Bundesliga ពិសេសនៅព្រឹត្តិការណ៍ World Cup ឆ្នាំ ២០២៦។
Liverpool កំពុងតាមដានកីឡាករអន្តរជាតិជប៉ុនវ័យ២៥ឆ្នាំរូបនេះ ខណៈដែលតម្លៃផ្ទេររបស់ខ្សែបម្រើការពារក្លិប Mainz 05 រូបនេះ បានកើនឡើងជាបន្តបន្ទាប់។ យោងតាម Transfermarkt តម្លៃទីផ្សាររបស់ Kaishu Sano បានកើនឡើង ១០លានអឺរ៉ូ ដោយឈានដល់ ៥០លានអឺរ៉ូ។ ប៉ុន្តែ Mainz បញ្ជាក់ហើយថាព្រមចរចាលុះត្រាតែទទួលបានយ៉ាងហោចណាស់ ៦០លានអឺរ៉ូសម្រាប់កីឡាករស្នូលរបស់ពួកគេ។
យ៉ាងណាមិញ បច្ចុប្បន្នទោះបីជាមានព័ត៌មានថា Liverpool មានឆន្ទៈចំណាយតាមតម្លៃដែល Mainz ទាមទារក៏ដោយ ក៏គ្មានការចរចាផ្លូវការណាមួយកើតឡើងនៅឡើយទេ។ ប្រភពព័ត៌មានបានបង្ហាញថា ក្លិបនៅអង់គ្លេសមួយនេះ កំពុងតែពិនិត្យមើលយ៉ាងប្រុងប្រយ័ត្ន មុននឹងធ្វើការដាក់សំណើជាផ្លូវការ។
ប្រសិនបើកិច្ចព្រមព្រៀងនេះពិតជាសម្រេចផ្លូវការមែននោះ វានឹងក្លាយជាការផ្ទេរកីឡាករអាស៊ីមានតម្លៃខ្ពស់បំផុតនៅក្នុងប្រវត្តិសាស្ត្រ ដោយបំបែកកំណត់ត្រាការផ្ទេរខ្សែការពារកូរ៉េខាងត្បូង Kim Min-jae ពីក្លិប Napoli ទៅចូលរួមជាមួយក្លិប Bayern Munich នៅក្នុងតម្លៃ ៥០ លានអឺរ៉ូ កាលពីឆ្នាំ ២០២៣។ ស្របពេលដែល Kaishu Sano ត្រូវបានរំពឹងថានឹងក្លាយជាការបន្ថែមគុណភាពថ្មីមួយសម្រាប់មហិច្ឆតារបស់ក្រុមហង្សក្រហម Liverpool នៅក្នុងការប្រជែងពានរង្វាន់នារដូវកាលថ្មី៕
ចែករំលែកព័តមាននេះ