សហរដ្ឋអាមេរិក ៖ ធនាគារអាមេរិក ឬ Bank of America កាលពីពេលថ្មីៗនេះ បានឱ្យដឹងថា ការប្រកួតពានរង្វាន់បាល់ទាត់ពិភពលោក FIFA World Cup ឆ្នាំ ២០២៦ បានចាក់បញ្ចូលទឹកប្រាក់ចំនួន ២០ពាន់លានដុល្លារអាមេរិកទៅក្នុងសេដ្ឋកិច្ចសហរដ្ឋអាមេរិកក្នុងនាមជាសហម្ចាស់ផ្ទះរួមជាមួយ កាណាដា និងម៉ិកស៊ិក ដោយក្នុងនោះទីក្រុងម្ចាស់ផ្ទះមួយចំនួនរៀបចំការប្រកួតបានឃើញការកើនឡើងខ្លាំងនៃការចំណាយពីសំណាក់ភ្ញៀវទេសចរ។ នេះបើតាមប្រភពពី Yahoo Sports ចេញផ្សាយកាលពីថ្ងៃទី២១ ខែកក្កដា ឆ្នាំ២០២៦។
របាយការណ៍អំពីការជំរុញផ្នែកហិរញ្ញវត្ថុនេះ បានលេចឡើង បើទោះបីជាមានការព្រួយបារម្ភពីមុនមកថា កត្តាមួយចំនួន រួមទាំងគោលនយោបាយអន្តោប្រវេសន៍ដ៏តឹងរ៉ឹងរបស់លោកប្រធានាធិបតី ដូណាល់ ត្រាំ (Donald Trump) និងសង្គ្រាមរបស់សហរដ្ឋអាមេរិកជាមួយប្រទេសអ៊ីរ៉ង់ អាចធ្វើឱ្យភ្ញៀវទេសចរបរទេសមានការរារែកចិត្ត និងប៉ះពាល់ដល់ផលប្រយោជន៍សេដ្ឋកិច្ចរបស់សហរដ្ឋអាមេរិកយ៉ាងណាក៏ដោយ។
ទោះជាយ៉ាងណាក៏ដោយ លោក Brian Moynihan នាយកប្រតិបត្តិនៃធនាគារអាមេរិក ដែលជាអ្នកឧបត្ថម្ភការប្រកួតដ៏អស្ចារ្យនេះ បានប្រាប់ទូរទស្សន៍អាមេរិក CBS News ថា ប្រហែលពាក់កណ្តាលនៃសកម្មភាពសេដ្ឋកិច្ចសរុប ៤០ពាន់លានដុល្លារអាមេរិក ដែលបង្កើតឡើងដោយការប្រកួតព្រឹត្តិការណ៍ World Cup គឺស្ថិតនៅក្នុងសហរដ្ឋអាមេរិក។ លោកបានបញ្ជាក់ថា ព្រឹត្តិការណ៍ World Cup ឆ្នាំ២០២៦ បានបង្កើតឥទ្ធិពលសេដ្ឋកិច្ចជាក់ស្តែង ហើយការចំណាយកំពុងហូរចូលទៅក្នុងអ្វីដែលត្រូវបានហៅថា អាជីវកម្មដែលមានទីតាំងផ្ទាល់ ដូចជា បារ ភោជនីយដ្ឋាន និងកន្លែងស្រដៀងគ្នានេះ និងមិនមែនកើតឡើងតែចំពោះមនុស្សដែលស្ថិតនៅក្នុងកីឡដ្ឋាននោះទេ។
បើតាមរបាយការណ៍ Consumer Checkpoint សម្រាប់ខែកក្កដារបស់ធនាគារអាមេរិក បានរកឃើញថា ការចំណាយតាមរយៈកាតឥណទាន (Credit Card) និងកាតឥណពន្ធ (Debit Card) នៅទូទាំងប្រទេស មានការកើនឡើង ៦,៣% បើធៀបនឹងរយៈពេលដូចគ្នាកាលពីឆ្នាំមុន ដែលនេះជាកំណើនដ៏ខ្លាំងក្លាបំផុតក្នុងរយៈពេល៤ឆ្នាំចុងក្រោយនេះ។
យ៉ាងណាមិញ បើតាមសារព័ត៌មាន The Wall Street Journal បានបង្ហាញថា ទីក្រុងចំនួន ១១ នៅសហរដ្ឋអាមេរិកដែលទទួលធ្វើជាម្ចាស់ផ្ទះរៀបចំការប្រកួត មិនទទួលបានកំណើនសេដ្ឋកិច្ចស្មើគ្នានោះទេ ដោយទីក្រុងហ្វីឡាដែលហ្វៀ (Philadelphia) និងកាន់សាស់ (Kansas) ត្រូវបានចាត់ទុកជាទីក្រុងកើបលុយដ៏ធំធេង។
ជាមួយគ្នានោះ បើតាមប្រភពពីកាសែត The Guardian កាលពីថ្ងៃទី២០ ខែកក្កដា ឆ្នាំ២០២៦ បានរាយការណ៍ថា សហព័ន្ធបាល់ទាត់ពិភពលោក FIFA នឹងប្រកាសពីប្រាក់ចំណូលបំបែកកំណត់ត្រាចំនួន ១៥ ពាន់លានដុល្លារអាមេរិកពីការប្រកួត World Cup នារដូវក្តៅនេះ ដែលជាចំនួនលើសពីគោលដៅកំណត់មុនពេលចាប់ផ្តើមព្រឹត្តិការណ៍យ៉ាងខ្លាំង។
សមាគមសមាជិករបស់ FIFA ត្រូវបានផ្តល់ដំណឹងអំពីការកើនឡើងប្រាក់ចំណូលដោយលោក Gianni Infantino កាលពីថ្ងៃសៅរ៍សប្តាហ៍មុន។ ដើមឡើយ ស្ថាប័នក្បាលម៉ាស៊ីនបាល់ទាត់មួយនេះបានប៉ាន់ស្មានថានឹងទទួលបានប្រាក់ចំណូល ១១ ពាន់លានដុល្លារ។ ប៉ុន្តែប្រភពនានាបានបង្ហាញថា សេវាកម្មបដិសណ្ឋារកិច្ច និងការលក់សំបុត្រ ជាពិសេសតាមរយៈទីផ្សារលក់បន្តដែលមានតម្លៃថ្លៃកប់ពពកនោះ គឺជាចំណែកដ៏សំខាន់ដែលធ្វើឱ្យមានការកើនឡើងប្រាក់ចំណូលដ៏មហាសាលនេះ ដ្បិត FIFA ទទួលបានកម្រៃជើងសារ ១៥% ពីអ្នកទិញ និង ១៥% ទៀតពីអ្នកលក់ នៅលើទីផ្សារលក់បន្តនោះ។
តាមរយៈប្រាក់ចំណូលជាកំណត់ត្រានេះ បណ្តាសមាគមបាល់ទាត់ជាសមាជិក FIFA នឹងទទួលបានអត្ថប្រយោជន៍ពីកញ្ចប់ថវិកាដែលបានពង្រីកបន្ថែមសម្រាប់ព្រឹត្តិការណ៍ World Cup បើទោះបីជាព័ត៌មានលម្អិតមិនទាន់ត្រូវបានសម្រេចជាស្ថាពរក៏ដោយ៕
ចែករំលែកព័តមាននេះ