រាជធានីភ្នំពេញ ៖ កីឡាករប្រដាល់ជើងខ្លាំងកម្ពុជា២រូបមានវាសនាមិនដូចគ្នាទេ ក្នុងជំនួប មិត្តភាពក្នុងកម្មវិធី «កម្ពុជា សង្វៀនគុនខ្មែរ» នៅលើសង្វៀនស្ថានីយទូរទស្សន៍ស៊ីអិនស៊ី កាល ពីថ្ងៃសៅរ៍ទី៤ ខែមករាកន្លងមក ដែលម្នាក់ឈ្នះគូប្រកួតនៅក្នុងទឹកទី៤ ឯម្នាក់ទៀតចាញ់សន្លប់ក្នុងទឹកទី៤ ។
ព្រឹត្តិការណ៍ប្រកួតដ៏កក្រើកដែលមិនធ្លាប់មានមួយនេះ បានធ្វើឱ្យអ្នកទស្សនាផ្ទាល់មាន ការរំភើបនិងចាប់អារម្មណ៍មែនទែន ។ ជាពិសេស កីឡាករ ព្រំ សំណាង ខ្លាចាស់មកពីក្លិបកងទ័ពពិសេសឆត្រយោង៩១១ មានប្រើស្នៀតពិសេសៗ វាយផ្ដួលកីឡាករស្វ៊ីស Stojanov Gliger ឱ្យចាញ់សន្លប់នៅត្រឹមទឹកទី៤ទាំងមិនអស់ចិត្ត ។
គូនេះសម្រាប់ការប្រកួត៣ទឹកកន្លងមក ព្រំ សំណាង ត្រូវកីឡាករស្វ៊ីសម្នាក់នេះវាយឱ្យដក ថយទាំងភ្នែកនៅលើកញ្ចឹងកម្ដងៗទៅហើយ ប៉ុន្តែអ្នកប្រដាល់ចាស់វស្សារូបនេះពិតជាមិនអន់នោះទេ ។ គេព្យាយាមវាយទប់ការពារខ្លួនបានយ៉ាងល្អ ថែមទាំងមានឱកាសធ្វើការវាយបកសងវិញម្ដងៗដែរ ដើម្បីរារាំងកុំឱ្យកីឡាករស្វ៊ីសម្នាក់នេះសម្រុកខ្លាំងពេក ។
គ្រាន់តែចូលដល់ទឹកទី៤ភ្លាម ព្រំ សំណាង មិនបង្អង់យូរឡើយ គេបានសម្រុកចូលម៉ាត់ និងទាត់បកសងវិញ ចូលចំគោលដៅសំខាន់ៗពេញៗ ទំហឹងតែម្ដង រហូតធ្វើឱ្យ Stojanov Gliger ដួលទាំងជំហរទៅលើក្តារសង្វៀន ហើយត្រូវអាជ្ញាកណ្ដាលបញ្ឈប់លែងឱ្យប្រកួតតែម្ដង។
ចំណែកកីឡាករ ឡុង សុវណ្ណឌឿន មកពីក្លិបសាលវ័ន្តកីឡា ត្រូវកីឡាករថៃ Phit Munny វាយឱ្យសន្លប់នៅត្រឹមទឹកទី៤ ។ គូនេះ ក៏ប្រកួតគ្នាស្វិតស្វាញណាស់ដែរ ប៉ុន្តែ ឡុង សុវណ្ណ ឌឿន វាយចេញមិនសូវបានល្អទាល់តែសោះ ត្រូវ កីឡាករថៃដេញវាយផ្ទប់នឹងខ្សែរេញ មិនសូវមានឱកាសតដៃបានល្អឡើយ ។
ទោះជាយ៉ាងណា កីឡាករ ឡុង សុវណ្ណឌឿន ដែលមិនសូវបានឡើងសង្វៀនប្រកួតញឹកញាប់នោះ ចលនារបស់គេមិនសូវរហ័សរហួនដូចមុនទេ ទោះជាគេខំប្រឹងប្រែងទប់បានដល់ទឹកទី៣ក្ដី ។ លុះចូលដល់ទឹកទី៤ កម្លាំងចាប់ផ្ដើមស្រុតចុះខ្លាំង ដែលធ្វើឱ្យគេមិនអាចការពារខ្លួនបានល្អរហូតត្រូវកីឡាករថៃវាយឱ្យសន្លប់តែម្ដង ។
រីឯកីឡាករ ថា សារុន មកពីក្លិបពុទ្ធសេរីវង្សពោធិ៍សែនជ័យ ប្រកួតចាញ់ពិន្ទុកីឡាករថៃ Yorth Banphut ។ កីឡាករ តាំង តាក់ មកពីក្លិបរស្មីភូមិគាបខេត្តបន្ទាយមានជ័យ ប្រកួតចាញ់កីឡាករ ខាំ សូរិយា មកពីក្លិបរ៉ាហាប់ស្វាយប៉ាកដោយពិន្ទុ ៕ (កែសម្រួលដោយ ៖ បុប្ផា)
ចែករំលែកព័តមាននេះ