ខេត្តក្រចេះ ៖ ភ្ញៀវទេសចរជាតិ និងអន្តរជាតិមានចំនួនជាង៧ពាន់នាក់ បានមកលេងកំសាន្តនៅរមណីយដ្ឋានមួយចំនួនក្នុងខេត្តក្រចេះ នៅក្នុងអំឡុងថ្ងៃឈប់សម្រាកនៃឱកាសថ្ងៃចូលឆ្នាំសកល។ នេះបើតាមការបញ្ជាក់ពីក្រុមមន្ត្រីនៃមន្ទីរទេសចរណ៍ខេត្ត។
លោកជួប រតនា ប្រធានមន្ទីរទេសចរណ៍ខេត្តបានឲ្យដឹងនៅថ្ងៃទី២ ខែមករា ឆ្នាំ២០២០ នេះថា ភ្ញៀវទេសចរចំនួន៧.៦៧៨នាក់ បានមកលេងកំសាន្តនៅតាមរមណីយដ្ឋាននានាក្នុងខេត្តក្រចេះ នៅថ្ងៃឈប់សម្រាកចូលឆ្នាំសកល ក្នុងនោះភ្ញៀវបានផ្តោតសំខាន់លើរមណីយដ្ឋានកាំពី។ លោកអះអាងថា ចំនួននេះបើប្រៀបធៀបនិងឆ្នាំមុនគឺមានការកើនឡើង។
រមណីយដ្ឋានទឹកជួរទន្លេមេគង្គកាំពី ជារមណីយដ្ឋានអេកូទេសចរណ៍មួយដែលគួរឲ្យទាក់ទាញសម្រាប់ភ្ញៀវទៅលេងកំសាន្ត។ អ្វីដែលចាប់អារម្មណ៍នោះ គឺសន្ឋឹកទឹកហូរខ្មួលខ្មាញ់ថ្លាឆ្វង់នៅតាមជ្រលងថ្មកណ្តាលទន្លេមេគង្គ ដែលដុសអមទៅដោតជួរដើមជ្រៃទឹកសាប។
ភ្ញៀវទេសចរដែលទៅលេងកំសាន្តនៅទីនោះ ក្រៅពីអង្គុយទទួលទានអារហារក្នុងខ្យូសលើទឹកដែលសហគមន៍ទេសចរណ៍បានសង់ជាជួរៗតាមមាត់ទឹកហូរ ពួកគាត់ក៏នាំគ្នាចុះងូតទឹកលេងក្នុងសភាពយ៉ាងសប្បាយអ៊ឺងកង។
ប្រធានមន្ទីរទេសចរណ៍ខេត្តលោក ជួប រតនា បានថ្លែងឲ្យដឹងទៀតថា នារដូវប្រាំងឆ្នាំនេះអាជ្ញាធររបស់លោក បានចុះពិនិត្យមើលពីគុណភាពនិងលក្ខណៈសម្បត្តិលើរោងក្យូស ក៏ដូចជាទីតាំងផ្សេងៗដែលរៀបចំពីប្រជាសហគមន៍សម្រាប់ទទួលភ្ញៀវមកលេងកំសាន្ត នារដូវប្រាំង ដែលសម្បូរដោយថ្ងៃឈប់សម្រាក។
បន្ថែមពីលើនោះ ការពង្រឹងសេវាកម្មផ្នែកបដិសណ្ឋារកិច្ច ក៏ដូចជាតម្លៃមុខម្ហូប អនាម័យ នៃការវេចខ្ចប់ ក៏ត្រូវបានលោក ប្រធានមន្ទីរអះអាងថា ក្រុមការងាររបស់លោកបានចុះទៅ ពង្រឹងនិងបង្ហាត់បង្ហាញដល់ក្រុមប្រជាសហគមន៍នៅតាមតំបន់រមណីយដ្ឋាននានារួចអស់ទៅហើយដែរ ៕ (កែសម្រួលដោយ ៖ ធីតា)
ចែករំលែកព័តមាននេះ