ខេត្តកំពង់ឆ្នាំង ៖ ផ្ទុះវិវាទរវាងអាជ្ញាធរ និងសហគមន៍នេសាទអ្នកតាហាង ទាក់ទិន និងការប្រជុំស្នើសុំលក់ត្រីក្នុងតំបន់អភិរក្សមេទឹកទំនប់តាសេកដែលមានទីតាំងស្ថិតក្នុងភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ដើម្បីប្រមូលផលត្រីលក់…
ខេត្តកំពង់ឆ្នាំង ៖ ផ្ទុះវិវាទរវាងអាជ្ញាធរ និងសហគមន៍នេសាទអ្នកតាហាង ទាក់ទិន និងការប្រជុំស្នើសុំលក់ត្រីក្នុងតំបន់អភិរក្សមេទឹកទំនប់តាសេកដែលមានទីតាំងស្ថិតក្នុងភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ដើម្បីប្រមូលផលត្រីលក់ យកលុយកសាងទំនប់ ក្លាយជាប្រធានបទក្តៅ និងមានការវែកញែកផ្សេងៗគ្នា ។
លោក ចាយ ពិសិត គណៈកម្មការសហគមន៍នេសាទ តំណាងក្រុមការងារក្នុងសហគមន៍ បានរៀបរាប់ថា ទំនប់តាសេក ខាងលើនេះគឺស្ថិតនៅក្នុងតំបន់ដែននេសាទ និងជាតំបន់ស្នូលអភិរក្សត្រីមេពូជ ការថែរក្សាទំនប់នេះបានមកទល់សព្វថ្ងៃក្រុមការងារលោក គោរពលើគោលការណ៍ ៖ ទី១ លក្ខន្តិកៈ , ទី២ បទបញ្ជាផ្ទៃក្នុង , និងទី៣ យកច្បាប់ជលផលជាជំហរ ។
ដោយឡែកថ្មីៗនេះអាជ្ញាធរភូមិមានបំណង ស្នើសុំលក់ត្រីក្នុងតំបន់អភិរក្សមេទឹកទំនប់តាសេក ដោយយោងហេតុផលថា ដើម្បីយកកម្រៃជួសជុលទំនប់ និងកម្រៃខ្លះឲ្យតម្លៃជើងសារទៅអ្នកមើលថែទំនប់ ឬយកមកចែកគ្នាចិញ្ចឹមឆ្នាំង ។ ប៉ុន្តែខាងសហគមន៍លោក មិនយល់ព្រមដាច់ខាតព្រោះការលក់ត្រីនៅតំបន់នេះគឺជាទង្វើខុសច្បាប់ ។ ក្នុងកិច្ចការងារនេះ មានវិធីផ្សេងដើម្បីកុំឲ្យការអនុវត្តខុសច្បាប់គឺអាច ធ្វើបដិភាគ ឬរៃលុយដែលប្រជាពលរដ្ឋអាស្រ័យផលធ្វើស្រែក្នុងតំបន់នេះ និងសូមសំណូមពររាល់ការអភិវឌ្ឍន៍នៅក្នុងតំបន់សហគមន៍នេសាទឬដែននេសាទទាំងមូលនេះ សូមឱ្យអាជ្ញាធរពាក់ព័ន្ធ ស្នើអោយមានការប្រជុំពិភាក្សាគ្នាមុននឹងសម្រេចធ្វើអ្វីមួយ។
លោក ណុប សូត្រ មេភូមិអ្នកតាហាងបញ្ជាក់អោយដឹងថា ទំនប់តាសេកជារៀងរាល់ឆ្នាំគោករាក់ និងមានប្រជាពលរដ្ឋពីគ្រប់ទិសទីចូលមកនេសាទយកផលត្រីនៅទីតាំងនោះអស់ត្រីមេពូជទៅហើយ ដើម្បីកុំអោយបង់ខាតប្រយោជន៍ លោកមានបំណងស្នើសុំលក់ត្រីក្នុងតំបន់នេះ ដើម្បីបានលុយខ្លះកសាងអភិវឌ្ឍទំនប់ និងមួយផ្នែកទៀតឩបត្ថម្ភម្រៃបន្តិចបន្តួចជូនដល់អ្នកមើលថែទំនប់ ចំនួន៥នាក់ ជាការលើកទឹកចិត្តពួកគាត់តែប៉ុណ្ណោះ មិនមែនសម្រាប់ផលប្រយោជន៍បុគ្គលណាឡើយ ។
មតិខ្លះថា បើលក់មែន ប្រៀបដូចសាច់៣ជាន់កាត់ចែកគ្នា…ហេ! ហេ! ។
ទោះជាយ៉ាងនេះក្តីប្រជាពលរដ្ឋមួយចំនួនមានការគាំទ្រលោកមេភូមិក្នុងការលក់ត្រីក្នុងតំបន់អភិរក្សមេទឹកទំនប់តាសេកនេះ និងប្រជាពលរដ្ឋមួយចំនួនទៀតមិនឯកភាពនោះទេ ព្រោះជាទង្វើផ្ទុយពីច្បាប់ ។ ដូចនេះសំណូមពរអាជ្ញាធរស្រុក ក៏ដូចជាជំនាញពាក់ព័ន្ធថ្នាក់ខេត្តចាត់ក្រុមការងារចុះមកពិនិត្យនិងដោះស្រាយវិទាទនេះជូនពួកគាត់ ឈរលើគោលនយោបាយឈ្នះឈ្នះទាំងអស់គ្នា គឺដើម្បីប្រយោជន៍ជាតិ និងប្រជាជន។
ជាចុងក្រោយ ប្រជាពលរដ្ឋសំណូមពរទៅលើអាជ្ញាធរមេទំនប់និងលោកមេឃុំមេត្តាជួយទប់ស្កាត់បទល្មើសទាំងឡាយមេត្តាកុំឃុបឃិតគ្នាដើម្បីកុំឲ្យបំផ្លាញមច្ឆាជាតិ ដើម្បីប្រយោជន៍ផ្ទាល់ខ្លួន យកលេសក្រោមហេតុផលមិនអាចទទួលយកបាន ។
ព័ត៌មានបន្តនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ