លោក ហួត ហាក់ រដ្ឋមន្ត្រីក្រសួងទេសចរណ៍បានលើកឡើងថា ម្ហូបក៏ជាធ្នាក់ទាក់ភ្ញៀវទេសចរបរទេសដែរ ដូច្នេះសូមមន្ត្រី និងអ្នកជំនាញ គិតគូររៀបចំឲ្យមានលក្ខណៈសមរម្យ និងត្រឹមត្រូវ មាននៅក្នុងបញ្ជីផ្លូវការ…
លោក ហួត ហាក់ រដ្ឋមន្ត្រីក្រសួងទេសចរណ៍បានលើកឡើងថា ម្ហូបក៏ជាធ្នាក់ទាក់ភ្ញៀវទេសចរបរទេសដែរ ដូច្នេះសូមមន្ត្រី និងអ្នកជំនាញ គិតគូររៀបចំឲ្យមានលក្ខណៈសមរម្យ និងត្រឹមត្រូវ មាននៅក្នុងបញ្ជីផ្លូវការ ។
ថ្លែងនៅក្នុងពិធីបទីសន្និបាតក្រសួង កាលពីរសៀលថ្ងៃទី០៤ ខែកុម្ភៈ ឆ្នាំ២០២៦ លោក ហួត ហាក់ បានលើកឡើងថា ក្រសួងនឹងស្នើសុំឱ្យមានការចុះបញ្ជីមុខម្ហូបខ្មែរជាផ្លូវការ ដើម្បីប្រើប្រាស់ជាអត្តសញ្ញាណជាតិសម្រាប់ការផ្សព្វផ្សាយវិស័យទេសចរណ៍នៃម្ហូបអាហារ ។
លោកបានអះអាងថា បើមានការរៀបចំត្រឹមត្រូវ ម្ហូបសាមញ្ញតាមចិញ្ចើមផ្លូវ តម្លៃថោក តាំងពីបាយស្រូបព្រឹក លតឆា បបរមាន់ បបរឈាមជ្រូក នំកាឆាយ… សុទ្ធតែជាមុខម្ហូបដែលគួរតែគិតគូរចងក្រង បន្ថែមលើមុខម្ហូបខ្លះដែលយើងបានគិតគូរដូចជា សម្លរកកូរ នំបញ្ចុក ហើយនោះ ។
ជាមួយគ្នានោះ លោករដ្ឋមន្ត្រីក៏បានស្នើសុំឱ្យរដ្ឋបាលរាជធានីខេត្តពិសេសមន្ទីរទេសចរណ៍រាជធានីខេត្តទាំង២៥ ត្រូវយកមុខម្ហូបតំណាងខេត្តនីមួយៗយ៉ាងហោចណាស់ឱ្យបានចំនួន២មុខ ចុះបញ្ជីធ្វើមុខម្ហូបប្រចាំខេត្ត សម្រាប់ដាក់ទទួលទាំងភ្ញៀវទេសចរជាតិ និងអន្តរជាតិ ។
កាលពីឆ្នាំ២០២៥ កម្ពុជាទទួលបានទេសចរអន្តរជាតិសរុប៥,៥៧ លាននាក់ ថយចុះ១៦,៩ភាគរយ បើធៀបនឹងឆ្នាំ២០២៤ ។ ក្នុងចំណោមភ្ញៀវសំខាន់ៗមានដូចជា វៀតណាមចំនួន១,២២ លាននាក់ ថយចុះ ៨,៨ភាគរយ, ចិន១,២ លាននាក់ កើន៤១,៥ភាគរយ, ថៃ១,០២ លាននាក់ ថយចុះ៥២,៤ភាគរយ, អាមេរិក ២០៦.៧៩១ នាក់ ថយចុះ៣,៦ភាគរយ និងកូរ៉េខាងត្បូង១៥២.៥៩៨ នាក់ ថយចុះ ២០,៦ភាគរយ ៕
ចែករំលែកព័តមាននេះ