រាជធានីភ្នំពេញ ៖ ស្ថានីយទូរទស្សន៍ PNN បានប្រកាសបើកការប្រកួតប្រដាល់រដូវកាលថ្មីដែលនឹងប្រព្រឹត្តទៅនៅថ្ងៃអាទិត្យ ទី៥ ខែមករា ឆ្នាំ២០២០ ដើម្បីស្វែងរកម្ចាស់ជើងឯកខ្សែក្រវាត់មាសប្រភេទទម្ងន់៥៧គីឡូក្រាម បន្ទាប់ពីការ…
រាជធានីភ្នំពេញ ៖ ស្ថានីយទូរទស្សន៍ PNN បានប្រកាសបើកការប្រកួតប្រដាល់រដូវកាលថ្មីដែលនឹងប្រព្រឹត្តទៅនៅថ្ងៃអាទិត្យ ទី៥ ខែមករា ឆ្នាំ២០២០ ដើម្បីស្វែងរកម្ចាស់ជើងឯកខ្សែក្រវាត់មាសប្រភេទទម្ងន់៥៧គីឡូក្រាម បន្ទាប់ពីការ ប្រកួតរដូវកាលទី១បានបញ្ចប់ទៅ ដោយកីឡាករ ឡៅ ចិត្រា មកពីក្លិបកងទ័ពពិសេសឆត្រយោងលេខ៩១១ ក្លាយជាម្ចាស់ខ្សែក្រវាត់ក្នុងប្រភេទទម្ងន់៦៩គីឡូក្រាម ។
សម្រាប់ការប្រកួតរដូវកាលថ្មីនេះ គឺជាការផ្ដល់ឱកាសដល់កីឡាករជើងខ្លាំងកម្ពុជាចំនួន៨រូប ប្រជែងគ្នាយកតំណែងខ្សែក្រវាត់មាសក្នុងប្រភេទទម្ងន់៥៧គីឡូក្រាម ។ កីឡាករកម្ពុជាជើងខ្លាំងទាំង៨រូបនេះរួមមាន កីឡាករ ម៉ន សាម៉េត កីឡាករ វ៉ាន់ វឿន កីឡាករ អេ ណារ័ត្ន កីឡាករ ពេជ្រ ម្ទេសខ្មាំង កីឡាករ ប៊ុន សុធា កីឡាករ អេលីត ចំរើន កីឡាករ លាភ រដ្ឋានិងកីឡាករ ឃួន ឡាំងកូស៊ីន ។
មុននឹងឈានទៅប្រកួតដណ្ដើមខ្សែក្រវាត់មាស កីឡាករទាំងអស់ត្រូវប្រកួតដណ្ដើមខ្សែក្រវាត់ប្រាក់ជាមុនសិន ។ ដូច្នេះសម្រាប់ការប្រកួតក្នុងថ្ងៃបើកឆាកដំបូង កីឡាករមាឌល្អិតតែចិត្តធំ ម៉ន សាម៉េត ត្រូវទទួលស្វាគមន៍កីឡាករថៃ ផ្សាក់ អ៊ិនស៊ី ។ ឯគូប្រកួតមិត្តភាពអន្តរជាតិមួយគូទៀត គឺជាការជួបគ្នារវាងកីឡា ករ ឈុត សេរីវណ្ណថង មកពីក្លិបជាយដែន ខេត្តបាត់ដំបង ជាមួយកីឡាករថៃ នី តិកន ។
នៅមានគូប្រកួតអមចំនួន២គូទៀត គឺកីឡាករវ័យក្មេងកំពុងឡើងកូដ អេលីត ផានិតមកពីក្លិបប៉ែនកាក់គុនខ្មែរ ប្រកួតជាមួយកីឡា ករ សូ ចាន់រាជ មកពីក្លិបតាព្រហ្មមានជ័យ ។ កីឡាករ លី សេងហុង មកពីក្លិបឃ្លាំងមឿង កីឡា ប្រកួតជាមួយកីឡាករ ប៊ន ពន្លឹក ក្លិបមកពីចតុមុខ ។
តាមអ្នករៀបចំកម្មវិធីប្រកួតរបស់ស្ថានីយ ទូរទស្សន៍PNN រូបមន្តប្រកួត គឺកីឡាករកម្ពុជាទាំង៨រូបនេះ ត្រូវជួបប្រកួតជាមួយកីឡាករថៃ៨រូបដែរ ។ ប៉ុន្តែគូប្រកួតដណ្ដើមខ្សែក្រវាត់ប្រចាំសប្ដាហ៍នីមួយៗមានតែមួយគូប៉ុណ្ណោះ អ្នកដែលឈ្នះទើបមានឱកាសឡើងទៅប្រកួតបន្ត ៕ (កែសម្រួលដោយ ៖ បុប្ផា)
ចែករំលែកព័តមាននេះ