រាជធានីភ្នំពេញ ៖ កីឡាប្រមាណ៣០ប្រភេទនឹងត្រូវដាក់បញ្ចូលនៅក្នុងព្រឹត្តិការណ៍កីឡាជាតិលើកទី៣ឆ្នាំ២០២០ខាងមុខនេះ។ នេះបើយោងតាម លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា បានមានប្រសាសន៍កាលពីថ្ងៃទី២៧ ធ្នូ…
រាជធានីភ្នំពេញ ៖ កីឡាប្រមាណ៣០ប្រភេទនឹងត្រូវដាក់បញ្ចូលនៅក្នុងព្រឹត្តិការណ៍កីឡាជាតិលើកទី៣ឆ្នាំ២០២០ខាងមុខនេះ។ នេះបើយោងតាម លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា បានមានប្រសាសន៍កាលពីថ្ងៃទី២៧ ធ្នូ ២០១៩ ។ ជាមួយគ្នានេះលោកបានប្រាប់ដល់តំណាងសហព័ន្ធកីឡាជាតិទាំង៣០ ត្រូវត្រៀមខ្លួនសម្រាប់ចូលរួមប្រកួតក្នុងព្រឹត្តិការណ៍នេះផងដែរ។
គួររំលឹកថា នៅក្នុងព្រឹត្តិការណ៍កីឡាជាតិលើកទី២ ឆ្នាំ២០១៨ មានតែ២៧ប្រភេទកីឡាប៉ុណ្ណោះ ហើយគណៈកម្មការបានជ្រើសរើសយកទីលានចំនួន៤ខេត្ត-រាជធានីដើម្បីរៀបចំធ្វើ គឺរាជធានីភ្នំពេញ ខេត្តកែប កំពត និង ខេត្តកំពង់ធំ ។ កីឡាទាំង២៧ប្រភេទដែលដាក់ឲ្យប្រកួតនោះ រួមមានកីឡាបាល់ទាត់, បាល់ទះ, បាល់បោះ, អត្តពលកម្ម, ប៉េតង់, វាយសី, វាយកូនបាល់, វាយកូនឃ្លីលើតុ, ចំបាប់, តេក្វាន់ដូ W.T.F របស់កូរ៉េខាងត្បូង, ហែលទឹក, ល្បុក្កតោ, កាយសម្ព័ន្ធ, ប្រដាល់សាកល, ហ្សូរិនជីកាំប៉ូ, តេក្វាន់ដូ I.T.F របស់កូរ៉េខាងជើង, ការ៉ាតេដូ, ប្រដាល់គុនខ្មែរ, យូដូ, ទ្រីយ៉ាត្លុង, សូហ្វតិន្នីស, ប៊េស្បល, ប្រណាំងកង់, សីដក់, កីឡាបាញ់កាំភ្លើង និងវ៉ូវីណាម ។
សម្រាប់ឆ្នាំនេះ ក្រសួងអប់រំ យុវជន និងកីឡា សម្រេចដាក់បន្ថែម៣ប្រភេទកីឡាទៀត គឺម៉ូតូទឹក អុកចត្រង្គ និងកីឡាជិះសេះ ដូច្នេះកីឡាជាតិលើកទី៣ ឆ្នាំ២០២០ខាងមុខ នឹងមានកីឡាប្រមាណ៣០ប្រភេទចូលរួម។
លោកអគ្គនាយកកីឡា អ៊ុក សិទ្ធិជាតិ បានឲ្យដឹងទៀតថា ការប្រកួតកីឡាជាតិលើកទី៣ នឹងប្រព្រឹត្តចាប់ពីថ្ងៃទី២៥ ខែឧសភា រហូតដល់ថ្ងៃទី៥ ខែមិថុនា ឆ្នាំ២០២០។ ក្នុងរយៈពេល១២ថ្ងៃនៃការរៀបចំព្រឹត្តិការណ៍ថ្នាក់ជាតិដ៏ធំ២ឆ្នាំម្ដងនេះ ក្រសួងអប់រំ យុវជន និងកីឡា បានត្រៀមថវិការដ្ឋចំនួន៦.០០០លានរៀល កើនឡើងទ្វេដងបើធៀបនឹងការរៀបចំលើកទី១ កាលពីឆ្នាំ២០១៦ ដើម្បីចំណាយលើការរៀបចំផ្សេងៗ តែមិនបូកការចំណាយលើការរៀបចំពិធីបើក និងពិធីបិទ ដែលរ៉ាប់រងដោយគណៈកម្មាធិការជាតិអូឡាំពិកកម្ពុជាឡើយ។
លោកថា ដោយសារប្រភេទកីឡាត្រូវបានបង្កើន ឡើងពី១៥ប្រភេទកីឡា ទៅ២៧ប្រភេទកីឡា ស្មើនឹង២៧២វិញ្ញាសា ខណៈប្រតិភូ គ្រូ និងអត្តពលិក គឺបានកើនឡើងពីជិត ២.០០០នាក់ ដល់ប្រមាណ ៥.០០០នាក់ឯណោះ។
សូមបញ្ជាក់ថា កាលពីបើកកីឡាជាតិលើកទី២ ឆ្នាំ២០១៨ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា បានលើកឡើងថា ការប្រកួតកីឡាជាតិ គឺជាការប្រកួតកីឡាកម្រិតជំនាញខ្ពស់បំផុតរបស់ជាតិ ដើម្បីវាស់ស្ទង់ ប្រៀបធៀប និងផ្ទៀងផ្ទាត់គុណផលកីឡាជាតិ(National Perfomance) ជាមួយគុណផលកីឡាអន្តរជាតិ(International Perfomance) ដែលមានទាំងថ្នាក់តំបន់ ថ្នាក់ទ្វីប និង ថ្នាក់ពិភពលោក ៕ (កែសម្រួលដោយ ៖ បុប្ផា)
ចែករំលែកព័តមាននេះ