ប្រទេសតួកគី ៖ កីឡាបាល់ទាត់នៅក្នុងប្រទេសតួកគី កំពុងតែស្ថិតក្នុងវិបត្តិដ៏ធ្ងន់ធ្ងរមួយ ដោយសារតែកីឡាករ និងអាជ្ញាកណ្តាលជាច្រើននាក់ ជាប់ពាក់ព័ន្ធនឹងល្បែងភ្នាល់។ ជាក់ស្តែង កាលពីថ្ងៃទី១១ ខែវិច្ឆិកា…
ប្រទេសតួកគី ៖ កីឡាបាល់ទាត់នៅក្នុងប្រទេសតួកគី កំពុងតែស្ថិតក្នុងវិបត្តិដ៏ធ្ងន់ធ្ងរមួយ ដោយសារតែកីឡាករ និងអាជ្ញាកណ្តាលជាច្រើននាក់ ជាប់ពាក់ព័ន្ធនឹងល្បែងភ្នាល់។
ជាក់ស្តែង កាលពីថ្ងៃទី១១ ខែវិច្ឆិកា ឆាំ្ន២០២៥ សហព័ន្ធបាល់ទាត់តួកគី (TFF) បានបញ្ជាក់ថា កីឡាករអាជីពជាង ១ ០០០ នាក់ត្រូវព្យួរ ហើយកំពុងត្រូវបានស៊ើបអង្កេតពីបទពាក់ព័ន្ធនឹងល្បែងភ្នាល់បាល់។ រឿងអាស្រូវនេះបានបណ្តាលឱ្យការប្រកួតជាច្រើនត្រូវបានពន្យារពេលជាបន្តបន្ទាប់ ហើយអ្នកពាក់ព័ន្ធជាច្រើននាក់ ត្រូវបានចាប់ខ្លួន ខណៈមតិជាច្រើនបានលើកឡើងនូវសំណួរធំៗ អំពីសុចរិតភាព នៃការប្រកួតក្នុងស្រុក។
បើយោងតាមព័ត៌មានដែលចេញផ្សាយដោយ TFF កីឡាករអាជីពសរុបចំនួន ១ ០២៤ នាក់ នៅទូទាំងផ្នែកផ្សេងៗនៃលីគបាល់ទាត់ក្នុងស្រុក ត្រូវបានព្យួរ និងបញ្ជូនទៅគណៈកម្មាធិការវិន័យវិជ្ជាជីវៈ (PFDK) ដើម្បីស៊ើបអង្កេតពាក់ព័ន្ធនឹងល្បែងភ្នាល់បាល់។ ក្នុងចំណោមនោះមានកីឡាករ ២៧ នាក់ កំពុងប្រកបអាជីពក្នុងលីគកំពូលតួកគី (Super Lig) មានទាំងមកពីក្លិបកំពូលៗ ដូចជា Galatasaray, Besiktas និង Trabzonspor ថែមទៀតផង។ ជាការកត់សម្គាល់ ក្រុមស្ទើរតែទាំងអស់ឈរនៅចំណាត់ថ្នាក់កំពូលទាំង ១០ ក្របខណ្ឌ Super Lig ជាប់ពាក់ព័ន្ធបញ្ហានេះ លើកលែងតែក្រុម Fenerbahce។
ការស៊ើបអង្កេតមិនបានដាក់គោលដៅត្រឹមលីគកំពូលនោះទេ។ ជាក់ស្តែង កីឡាករចំនួន ៧៧ នាក់ នៅលីគលំដាប់ទី ១ បូករួមទាំងកីឡាករចំនួន ២៨២ នាក់ នៅលីគទី ២ និងកីឡាករចំនួន ៦២៩ នាក់ នៅលីគទី ៣ ក៏ជាប់ឈ្មោះក្រោមការស៊ើបអង្កេតផងដែរ រួមជាមួយករណីចំនួន ៩ ផ្សេងទៀត ដែលមិនស្ថិតក្នុងប្រព័ន្ធប្រកួតប្រជែងអាជីព។ ដោយសារតែប្រព័ន្ធលីគបាល់ទាត់តួកគីមានច្រើន ដូច្នេះ TFF ត្រូវបានបង្ខំចិត្តឱ្យពន្យារពេលលីគកម្រិតទាបរយៈពេល ២ សប្តាហ៍ ដើម្បីផ្តល់ពេលវេលាដល់ក្រុមទាំងអស់រៀបចំសមាជិករបស់ពួកគេឡើងវិញ។
វិបត្តិដ៏ធ្ងន់ធ្ងរនេះ ក៏ជាប់ពាក់ព័ន្ធនឹងសហគមន៍អាជ្ញាកណ្តាលតួកគីផងដែរ។ រឿងអាស្រូវនេះ បានផ្ទុះឡើងកាលពីខែមុន បន្ទាប់ពី TFF បានព្យួរអាជ្ញាកណ្តាល និងជំនួសការអាជ្ញាកណ្តាលចំនួន ១៤៩ នាក់។
ការធ្វើសវនកម្មផ្ទៃក្នុងដោយ TFF បានរកឃើញថា អាជ្ញាកណ្តាលចំនួន ៣៧១ នាក់ក្នុងចំណោមអាជ្ញាកណ្តាលចំនួន ៥៧១ នាក់ ដែលកំពុងបម្រើការនៅក្នុងប្រទេសតួកគី មានគណនីភ្នាល់ ហើយក្នុងនោះ ១៥២ នាក់ កំពុងភ្នាល់ជាប្រចាំ រួមទាំងការប្រកួតដែលពួកគេធ្លាប់ធ្វើអាជ្ញាកណ្តាលកាត់សេចក្តីផងដែរ ក្នុងនោះរួមទាំងអាជ្ញាកណ្តាលលីគកំពូលចំនួន ៧ នាក់ និងជំនួយការអាជ្ញាកណ្តាលចំនួន ១៥ នាក់ផងដែរ។ អាជ្ញាកណ្តាលម្នាក់ត្រូវបានរកឃើញថាបានភ្នាល់ជាង ១៨ ០០០ លើក ខណៈដែលរាប់សិបនាក់ផ្សេងទៀតបានភ្នាល់ជាង ១ ០០០ លើក។
លោក Ibrahim Haciosmanoglu ប្រធាន TFF បានហៅវិបត្តិនេះថា គឺជាវិបត្តិសីលធម៌ធ្ងន់ធ្ងរបំផុតក្នុងប្រវត្តិសាស្ត្របាល់ទាត់តួកគី ដោយលោកសង្កត់ធ្ងន់ថា បញ្ហានេះមិនត្រឹមតែទាក់ទងនឹងរដ្ឋបាលប៉ុណ្ណោះទេ ប៉ុន្តែវាក៏ទាក់ទងនឹងគុណភាពវិជ្ជាជីវៈផងដែរ។
ករណីនេះកាន់តែធ្ងន់ធ្ងរឡើង នៅពេលដែលតុលាការទីក្រុងអ៊ីស្តង់ប៊ុលបានបញ្ជាឱ្យចាប់ខ្លួនប្រធានក្លិប Eyupspor លោក Murat Ozkaya និងអ្នកផ្សេងទៀតចំនួន ៧ នាក់ ពីបទកំណត់លទ្ធផលការប្រកួត និងពាក់ព័ន្ធនឹងសកម្មភាពភ្នាល់ខុសច្បាប់។ អាជ្ញាធរបានអះអាងថា ការស៊ើបអង្កេតនឹងបន្ត ជាមួយនឹងលទ្ធភាពនៃការចោទប្រកាន់បន្ថែមទាក់ទងនឹងការកំណត់លទ្ធផលប្រកួត និងអំពើពុករលួយក្នុងវិស័យកីឡាតួកគី៕ ដកស្រង់ ៖ BBC និង Znews
ចែករំលែកព័តមាននេះ