ទីក្រុងហាណូយ ៖ ប្រទេសថៃ កាលពីរសៀលថ្ងៃទី២៨ ខែតុលា ឆ្នាំ២០២៥ បានបង្កើតកំហុសដ៏ធំមួយ ដោយបានបង្ហាញរូបទង់ជាតិរបស់ប្រទេសចិនដោយច្រឡំជំនួសឱ្យរូបទង់ជាតិរបស់ប្រទេសវៀតណាម អំឡុងពេលចាប់ឆ្នោតពានរង្វាន់បាល់ទាត់ក្នុងសាល (ហ្វុតសាល)…
ទីក្រុងហាណូយ ៖ ប្រទេសថៃ កាលពីរសៀលថ្ងៃទី២៨ ខែតុលា ឆ្នាំ២០២៥ បានបង្កើតកំហុសដ៏ធំមួយ ដោយបានបង្ហាញរូបទង់ជាតិរបស់ប្រទេសចិនដោយច្រឡំជំនួសឱ្យរូបទង់ជាតិរបស់ប្រទេសវៀតណាម អំឡុងពេលចាប់ឆ្នោតពានរង្វាន់បាល់ទាត់ក្នុងសាល (ហ្វុតសាល) យុវជនអាស៊ានអាយុក្រោម១៩ឆ្នាំ ឆ្នាំ២០២៥ (ASEAN U19 Boys’ Futsal Championship 2025)។
កំហុសនេះ បានកើតឡើងក្នុងអំឡុងពេលចាប់ឆ្នោតរយៈពេល១០នាទី រៀបចំដោយសមាគមបាល់ទាត់ថៃ ហៅកាត់ថា FAT ដែលក្រោយមកបានវីដេអូនោះ ត្រូវបានលុបចេញពីបណ្តាញទំនាក់ទំនងសង្គមរបស់ខ្លួនវិញ។ សហព័ន្ធបាល់ទាត់វៀតណាម ហៅកាត់ថា VFF បានផ្ញើលិខិតបន្ទាន់មួយទៅកាន់សហព័ន្ធបាល់ទាត់អាស៊ាន ហៅកាត់ថា AFF និង FAT ដើម្បីបង្ហាញការតវ៉ាជំទាស់របស់ខ្លួន ចំពោះកំហុសនេះ។
VFF បានបញ្ជាក់ក្នុងលិខិតដូច្នេះថា «VFF តវ៉ា និងស្នើសុំការបំភ្លឺទាក់ទងនឹងការបង្ហាញទង់ជាតិវៀតណាមមិនត្រឹមត្រូវ អំឡុងពេលការចាប់ឆ្នោត។ កំហុសដ៏ធ្ងន់ធ្ងរនេះអាចមានផលវិបាក ធ្វើឱ្យខូចមុខមាត់ប្រទេសវៀតណាម និងប៉ះពាល់ជាអវិជ្ជមានដល់ឯកភាពក្នុងសហគមន៍អាស៊ាន»។
VFF បានស្នើសុំឱ្យ AFF ស៊ើបអង្កេតមូលហេតុ និងអនុវត្តវិធានការតឹងរ៉ឹង ដើម្បីការពារបញ្ហាបែបនេះមិនឱ្យកើតឡើងនៅក្នុងព្រឹត្តិការណ៍នាពេលខាងមុខ។ សេចក្តីថ្លែងការណ៍បានបន្ថែមថា «VFF ជឿជាក់ថា AFF ដឹងយ៉ាងច្បាស់អំពីភាពធ្ងន់ធ្ងរនៃបញ្ហានេះ ហើយនឹងដោះស្រាយវាដោយការទទួលខុសត្រូវ ប្រុងប្រយ័ត្ន និងវិជ្ជាជីវៈខ្ពស់បំផុត»។
យ៉ាងណាមិញ ទាំង AFF និង FAT ក្រោយមក បានចេញលិខិតសុំទោសវៀតណាម និង VFF។ ជាក់ស្តែង លោកស្រី Nualphan Lamsam ឬ Madam Pang ប្រធាន FAT កាលពីថ្ងៃទី២៨ ខែតុលា បានផ្ញើលិខិតសុំទោសផ្លូវការទៅកាន់ប្រធាន VFF លោក Tran Quoc Tuan ទាក់ទងនឹងការបង្ហាញទង់ជាតិវៀតណាមមិនត្រឹមត្រូវ។
លោកស្រីបានសម្តែងការសោកស្តាយយ៉ាងខ្លាំង ហើយសង្កត់ធ្ងន់ថា បញ្ហានេះមិនអាចបង្ហាញថា FAT មិនការគោរពចំពោះវៀតណាម និងសហព័ន្ធសមាជិកអាស៊ានទាំងអស់នោះទេ។ លោកស្រីបានគូសបញ្ជាក់ថា FAT បានចាត់វិធានការកែតម្រូវ និងពង្រឹងនីតិវិធីរបស់ខ្លួនរួចហើយ ដើម្បីធានាថា មិនមានកំហុសស្រដៀងគ្នានេះកើតឡើងទៀតនាពេលខាងមុខ។
សូមជម្រាបថា ការប្រកួតបាល់ទាត់ក្នុងសាលយុវជនអាស៊ានអាយុក្រោម១៩ឆ្នាំ ឆ្នាំ២០២៥ នឹងត្រូវធ្វើឡើងចាប់ពីថ្ងៃទី២៣ ដល់ថ្ងៃទី២៩ ខែធ្នូ ឆ្នាំ២០២៥ នៅខេត្តណនថាបុរី ប្រទេសថៃ។ វៀតណាមស្ថិតនីៅក្នុងពូល A រួមជាមួយព្រុយណេ និងម្ចាស់ផ្ទះថៃ។ រីឯពូល B រួមមាន ឥណ្ឌូណេស៊ី មីយ៉ាន់ម៉ា ម៉ាឡេស៊ី និងកម្ពុជា។ ក្រុមទាំងអស់នឹងប្រកួតប្រជែងក្នុងទម្រង់វិលជុំ ដោយក្រុមកំពូលទាំង ២ នៃពូលនីមួយៗ បន្តឡើងទៅកាន់វគ្គពាក់កណ្តាលផ្តាច់ព្រ័ត្រ៕ ប្រភព ៖ VNExpres, ASEAN FOOTBALL និង Seasia goal
ចែករំលែកព័តមាននេះ