សហរដ្ឋអាមេរិក ៖ ទំនាក់ទំនង​រវាង​ប្រធានាធិបតី​សហរដ្ឋអាមេរិក លោក ដូ​ណា​ល់ ត្រាំ (Donald Trump) និង​កីឡាករ​គុន​ចម្រុះ UFC ខរ​ណ័​រ ម៉ាក់​គ្រេ​ហ្គ័​រ (Conor McGregor) កាន់តែ​ស្និទ្ធស្នាល និង​រឹង​មាំ​ឡើង​ទ្វេ​ដង តាម​រយៈ​ភាព​ជា​ដៃគូ​អាជីវកម្ម​។ នេះ​បើ​តាម​ការ​ចេញផ្សាយ​ពី​កាសែត The Times និង The Mac Life កាលពី​ថ្ងៃ​ទី​៤ ខែមករា ឆ្នាំ​២០២៦​។

ឯកសារ​ថ្មី​ៗ​បាន​បង្ហាញ​ថា ក្រុម​គ្រួសារ​លោក ត្រាំ កំពុង​បង្កើន​មិត្តភាព​ទ្វេ​ដង​ជាមួយនឹង​កីឡាករ ម៉ាក់​គ្រេ​ហ្គ័​រ ដោយ​ផ្លាស់​ប្តូរ​ពី​អ្នកគាំទ្រ​ធម្មតា​ទៅ​ជា​ដៃគូ​អាជីវកម្ម​ធំ​ៗ ជាមួយនឹង​ការ​វិនិយោគ​យ៉ាងច្រើន​នៅ​ក្នុង​ក្រុមហ៊ុន MMA Inc. របស់​កីឡាករ​គុន​ចម្រុះ​ឆ្នើម​សញ្ជាតិ​អៀរ​ឡង់​វ័យ​៣៧​ឆ្នាំ ដែល​ជា​ក្រុមហ៊ុន​បណ្តុះបណ្តាល​ក្បាច់គុន និង​ត្រូវ​បាន​ចុះបញ្ជី​នៅ​ទីផ្សារ​ហ៊ុន​ទីក្រុង​ញូ​វ​យ៉​ក (NYSE)​។

យោង​តាម​ឯកសារ​ទីផ្សារ​ភាគហ៊ុន​ថ្មី​ៗ​នេះ ក៏​បាន​បង្ហាញ​ថា ក្រុមហ៊ុន MMA Inc. ទើបតែ​បាន​បិទ​ការ​វិនិយោគ​ដំបូង​ចំនួន ៣ លាន​ដុល្លារ​អា​មេ​រិ​ក ដែល​ដឹកនាំ​ដោយ​ក្រុមហ៊ុន American Ventures ដែល​ស្គាល់​ថា ក្រុមហ៊ុន​គ្រួសារ​ត្រកូល ត្រាំ និង​លោក ដូ​ណា​ល់ ត្រាំ ជូ​នៀ (Donald Trump Jr.) កូនប្រុស​ច្បង​ប្រធានាធិបតី​សហរដ្ឋអាមេរិក​ទី ៤៧​។ ទោះ​យ៉ាងណា​ក៏​ដោយ កិច្ចព្រមព្រៀង​នេះ រួម​បញ្ចូល​ទាំង​ការ​សន្យា​ទិញ​ភាគហ៊ុន​រហូត​ដល់ ២០ លាន​ដុល្លារ​បន្ថែម​ទៀត ដើម្បី​ពង្រីក​អាជីវកម្ម​នេះ​នៅ​ទូ​ទាំង​ពិភពលោក​។

ម៉ាក់​គ្រេ​ហ្គ័​រ អតីត​ម្ចាស់​ខ្សែក្រវាត់​ពិភពលោក UFC Featherweight និង Lightweight ហើយ​ក៏​ជា​អ្នក​ប្រយុទ្ធ UFC ដំបូង​គេ​ដែល​កាន់កាប់​ខ្សែក្រវាត់ UFC ពីរ​ប្រភេទ​ទម្ងន់​ក្នុង​ពេល​ដំណាលគ្នា បាន​ស្វាគមន៍​ចំពោះ​ការ​ផ្លាស់​ប្តូរ​នេះ​លើ​បណ្តាញ​សង្គម​ផ្លូវការ​របស់​ខ្លួន ដោយ​បាន​ហៅ​លោក ត្រាំ ជូ​នៀ ថា មិត្ត​ភ័ក្តិ និង​ជា​ដៃគូ​អាជីវកម្ម​ឥឡូវនេះ​របស់​ខ្លួន​។

ខណៈ​ដែល​អាជីវកម្ម​ជាមួយ​គ្រួសារ​ត្រកូល ត្រាំ កំពុង​ផ្ទុះ​ឡើង​លើ​បណ្តាញ​សង្គម និង​ប្រព័ន្ធ​ផ្សព្វផ្សាយ​ធំ​ៗ​ជា​ច្រើន​នោះ ពាក្យ​ចចាមអារ៉ាម​អំពី​ការ​ត្រឡប់​ឡើង​សង្វៀន​របស់​ម៉ាក់​គ្រេ​ហ្គ័​រ កំពុង​ឈាន​ដល់​កម្រិត​ជជែក​វែកញែក​ដ៏​ក្តៅ​គគុក​ផង​ដែរ​។ ស្រប​ពេល​ដែល​កីឡាករ​កំពូល​ឌឺ​រូប​នេះ បាន​បញ្ជាក់​យ៉ាង​ច្បាស់​ថា រូបគេ​មាន​បំណង​បង្ហាញខ្លួន​នៅ​ក្នុង​ការ​ប្រកួត UFC White House (​សេត​វិមាន​) ដែល​គ្រប់​គ្នាំ​ទន្ទឹងរង់ចាំ​យ៉ាង​ខ្លាំង នៅ​ខែមិថុនា ឆ្នាំ​២០២៦ ដោយ​រួម​បញ្ចូល​កីឡាករ​ល្បី​ៗ​បំផុត​របស់ UFC ជាមួយ​ព្រឹត្តិការណ៍​ដែល​ត្រូវ​បាន​ចាត់​ទុក​ថា ធំ​បំផុត​គ្រប់ពេល​។ ប្រសិនបើ​រឿង​នោះ​កើតឡើង​មែន នោះ​នឹង​បន្ត​ពង្រឹង​ទំនាក់ទំនង​របស់​ម៉ាក់​គ្រេ​ហ្គ័​រ​ជាមួយនឹង​គ្រួសារ​ត្រកូល ត្រាំ ឡើង​មួយ​កម្រិត​ទៀត​៕