ខេត្តព្រះសីហនុ ៖ ក្រុមការងារគណៈកម្មាធិការជាតិអូឡាំពិកកម្ពុជាបានធ្វើដំណើរទៅដល់អនុវិទ្យាល័យសម្ដេចឪ ខេត្តព្រះសីហនុកាលពីថ្ងៃទី៣០ ខែធ្នូ ឆ្នាំ២០២៥ ដើម្បីរៀបចំកម្មវិធីអប់រំគុណតម្លៃអូឡាំពិក និងសមភាពស្ត្រីក្នុងវិស័យកីឡា ដោយមានការចូលរួមពីសិស្សានុសិស្សជានារីជិត២០០នាក់ពីថ្នាក់ទី៧ដល់ថ្នាក់ទី៩ ។…
ខេត្តព្រះសីហនុ ៖ ក្រុមការងារគណៈកម្មាធិការជាតិអូឡាំពិកកម្ពុជាបានធ្វើដំណើរទៅដល់អនុវិទ្យាល័យសម្ដេចឪ ខេត្តព្រះសីហនុកាលពីថ្ងៃទី៣០ ខែធ្នូ ឆ្នាំ២០២៥ ដើម្បីរៀបចំកម្មវិធីអប់រំគុណតម្លៃអូឡាំពិក និងសមភាពស្ត្រីក្នុងវិស័យកីឡា ដោយមានការចូលរួមពីសិស្សានុសិស្សជានារីជិត២០០នាក់ពីថ្នាក់ទី៧ដល់ថ្នាក់ទី៩ ។
ឯកឧត្តម ប៊ុយ សុភ័ណ្ឌ ទីប្រឹក្សាគណៈកម្មាធិការជាតិអូឡាំពិកកម្ពុជា និងជាគ្រូឧទ្ទេសប្រចាំកម្មវិធី មានប្រសាសន៍ថា វគ្គទី១នៃកម្មវិធីនេះ មានការបំផុសចែករំលែកគុណតម្លៃអូឡាំពិក ចលនាអូឡាំពិក និងប្រវត្តិកីឡាអូឡាំពិកដល់ស្ត្រី ។ បន្ទាប់មក យុវតីទាំងអស់ក៏បានចូលរួមហ្វឹកហាត់កីឡាវាយសីនៅក្លិបកីឡាវាយសី SBC ក្នុងវិទ្យាល័យសម្ដេចឪដើម្បីជាការផ្សព្វផ្សាយយុទ្ធនាការយុវតីម្នាក់លេងកីឡាមួយប្រភេទប្រចាំជីវិត។
ឯកឧត្ដមសង្ឃឹមថា ក្រោយវគ្គនេះ យុវតីជាសិស្សានុសិស្សនៅវិទ្យាល័យសម្ដេចឪ នឹងបានចូលរួមលេងកីឡាកាន់តែច្រើន ជាពិសេសកីឡាវាយសី ព្រោះស័ក្ដិសមនឹងនារី ដែលមិនបង្កជាបញ្ហាដល់រាងកាយ ដូចកីឡាមួយចំនួនឡើយ។
ជាមួយគ្នានេះ យុវតីទាំងអស់បានចូលរួមលេងកីឡាយ៉ាងផុសផុលដែលជាសកម្មភាពល្អសម្រាប់
សុខភាពរបស់ស្ត្រីនិងមនុស្សទូទៅក្នុងសង្គម។
ឯកឧត្ដម ប៊ុយ សុភ័ណ្ឌ បញ្ជាក់ដែរថា កម្មវិធីសមភាពស្ត្រីក្នុងវិស័យកីឡាស្ថិតក្រោមគម្រោងក្រុមប្រឹក្សាអូឡាំពិកអាស៊ីដើម្បីលើកកម្ពស់ស្ត្រីឱ្យបានដឹងពីការអប់រំគុណតម្លៃអូឡាំពិកជំរុញស្ត្រីចូលរួមលេងកីឡា និងសមភាពយេនឌ័រក្នុងវិស័យកីឡាដែលស្ត្រីមានសិទ្ធិចូលរួមលេងកីឡាដូចបុរសដែរ ខុសពីអូឡាំពិកសម័យបុរាណដែលស្ត្រីមិនអាចលេងកីឡាបាន។
ចំណែកអ្នកគ្រូ ហាង សុខឡា គ្រូអប់រំកាយនិងកីឡានៅវិទ្យាល័យសម្ដេចឪ មានប្រសាសន៍ថា សិស្សានុសិស្សរបស់អ្នកគ្រូសុទ្ធតែបានបង្ហាញភាពរីករាយក្នុងការចូលរួមត្រងត្រាប់ស្ដាប់ការចែករំលែកពីប្រវត្តិចលនាកីឡាអូឡាំពិក និងបានចូលរួមលេងកីឡា ដែលធ្វើឱ្យយុវតីទាំងអស់បានយល់ដឹងពីគុណតម្លៃនៃកីឡា និងសុខភាព។
សូមបញ្ជាក់ថា កម្មវិធីអប់រំគុណតម្លៃអូឡាំពិក និងសមភាពស្ត្រីក្នុងវិស័យកីឡានេះត្រូវបានអនុវត្តតាំងពីឆ្នាំ២០២១ ។ កម្មវិធីនេះបានរួមចំណែកបំផុសសកម្មភាពកីឡាដល់មហាជននិងយុវជន ជាពិសេសស្ត្រី ដែលធ្វើឱ្យមានការយល់ដឹងកាន់តែខ្លាំងពីសារៈសំខាន់នៃកីឡាចំពោះសុខភាព ៕
ចែករំលែកព័តមាននេះ