ប្រទេសនីហ្សេរីយ៉ា ៖ អតីតម្ចាស់ខ្សែក្រវាត់ប្រដាល់សកលទម្ងន់ធ្ងន់ពិភពលោក កីឡាករ Anthony Joshua បានរងរបួសស្រាលនៅក្នុងគ្រោះថ្នាក់ចរាចរណ៍ដ៏រន្ធត់មួយដែលបានឆក់យកជីវិតមនុស្ស ២ នាក់ដែលជាមិត្តភក្តិជិតស្និទ្ធ និងគ្រូបង្វឹកកាយសម្បទាកីឡាកររូបនេះ…
ប្រទេសនីហ្សេរីយ៉ា ៖ អតីតម្ចាស់ខ្សែក្រវាត់ប្រដាល់សកលទម្ងន់ធ្ងន់ពិភពលោក កីឡាករ Anthony Joshua បានរងរបួសស្រាលនៅក្នុងគ្រោះថ្នាក់ចរាចរណ៍ដ៏រន្ធត់មួយដែលបានឆក់យកជីវិតមនុស្ស ២ នាក់ដែលជាមិត្តភក្តិជិតស្និទ្ធ និងគ្រូបង្វឹកកាយសម្បទាកីឡាកររូបនេះ នៅក្នុងប្រទេសនីហ្សេរីយ៉ា កាលពីថ្ងៃទី២៩ ខែធ្នូ ឆ្នាំ២០២៥។ នេះបើតាមការលើកឡើងរបស់ប៉ូលិសនីហ្សេរីយ៉ា។
ហេតុការណ៍ដ៏រន្ធត់នេះ បានកើតឡើងនៅម៉ោងប្រហែល ១១ ព្រឹក ម៉ោងក្នុងស្រុក នៅលើផ្លូវហាយវេ Lagos-Ibadan ដ៏មមាញឹកមួយ តភ្ជាប់រដ្ឋ Ogun ទៅកាន់មជ្ឈមណ្ឌលពាណិជ្ជកម្មនៃរដ្ឋ Lagos ភាគនិរតីប្រទេសនីហ្សេរីយ៉ា។
កីឡាករ Joshua សញ្ជាតិអង់គ្លេសដើមកំណើតនីហ្សេរីយ៉ា ដែលមានសាច់ញាតិរស់នៅ Ogun ត្រូវបានរាយការណ៍ថា របួសស្រាលមានស្នាមជាំតិចតួចប៉ុណ្ណោះ ប៉ុន្តែកីឡាកររូបនេះបានបាត់បង់មនុស្សជិតស្និទ្ធនឹងគេបំផុត គឺលោក Latif Ayodele ជាមិត្តសម្លាញ់ និងលោក Sina Ghami គ្រូបង្វឹកកាយសម្បទា។ បើតាមសេចក្តីថ្លែងការណ៍ប៉ូលិសបានឱ្យដឹងថា Joshua របួសស្រាល ដោយសាររូបគេអង្គុយនៅកៅអីខាងក្រោយនៃរថយន្ត Lexus SUV របស់គេ ហើយកំពុងទទួលការព្យាបាល។
បើតាមសម្តីប៉ូលិសរដ្ឋ Ogun បានបញ្ជាក់ថា ស្ថានភាពជុំវិញគ្រោះថ្នាក់ចរាចរណ៍ដ៏រន្ធត់ដែលបានកើតឡើងនៅភាគខាងជើងរដ្ឋ Lagos តំបន់សេដ្ឋកិច្ចដ៏សំខាន់របស់នីហ្សេរីយ៉ា កំពុងត្រូវបានស៊ើបអង្កេត។
លោក Lanre Ogunlowo ស្នងការប៉ូលិសរដ្ឋ Ogun បានប្រាប់ ESPN ថា គ្រោះថ្នាក់នេះកើតឡើងដោយសារសំបកកង់រថយន្តបានផ្ទុះ បណ្តាលឱ្យអ្នកបើកបរបាត់បង់ការគ្រប់គ្រង ហើយរថយន្តបានបត់ទៅបុករថយន្តដឹកទំនិញដែលចតនៅស្ងៀមលើដងផ្លូវ។ ចំណែកលោក Olusegun Ogungbemide អ្នកនាំពាក្យអង្គភាពសុវត្ថិភាពចរាចរណ៍សហព័ន្ធបានអះអាងថា ការស៊ើបអង្កេតបឋមបង្ហាញថា រថយន្តបើកបរហួសពីល្បឿនដែលបានកំណត់ដោយច្បាប់លើច្រករបៀង រួមទាំងបាត់បង់ការគ្រប់គ្រងអំឡុងពេលបើកបរជែង ហើយបានបុកជាមួយរថយន្តដឹកទំនិញចតស្ងៀមនៅម្ខាងផ្លូវតែម្តង។
គួររំលឹកថា មុនជួបគ្រោះថ្នាក់ដ៏រន្ធត់នេះ Anthony Joshua ទើបតែបានផ្តួលតារាយូធូបអាមេរិក ប្រែខ្លួនក្លាយជាអ្នកប្រដាល់អាជីព Jake Paul ឱ្យបោះបង់ការប្រកួតត្រឹមទឹកទី ៦ កាលពីថ្ងៃទី១៩ ខែធ្នូ ឆ្នាំ២០២៥ នៅក្នុងការប្រកួតមួយនាទីក្រុងម៉ៃអាមី (Miami) រដ្ឋផ្លរីដា (Florida)៕ ប្រភព ៖ CNN, BBC, AFP និង ESPN
ចែករំលែកព័តមាននេះ