លោក ត្រាំ ថាអត់ខ្វាយខ្វល់រឿងអ៊ីរ៉ង់នៅ World Cup ឯអ៊ីរ៉ង់កំពុងសង្ស័យនូវលទ្ធភាពចូលរួមរបស់ខ្លួន
ទីក្រុងវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) ថា លោកមិនខ្វល់ទេ…
ទីក្រុងវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) ថា លោកមិនខ្វល់ទេ ប្រសិនបើអ៊ីរ៉ង់ចូលរួមព្រឹត្តិការណ៍បាល់ទាត់ពិភពលោកឆ្នាំ ២០២៦ (FIFA World Cup 2026)។ ការអត្ថាធិប្បាយនេះ កើតឡើងចំពេលការវាយរបស់សហរដ្ឋអាមេរិក និងអ៊ីស្រាអែលលើអ៊ីរ៉ង់កាន់តែខ្លាំងឡើង ឆ្លើយតបនឹងការវាយប្រហាររបស់ប្រទេសនៅមជ្ឈិមបូព៌ាមួយនេះទៅលើរដ្ឋសម្ព័ន្ធមិត្តអាមេរិកក្នុងតំបន់កំពុងមានជម្លោះ។ នេះបើតាមប្រភពពី BBC ចេញផ្សាយនៅថ្ងៃទី៤ ខែមីនា ឆ្នាំ២០២៦។
សហរដ្ឋអាមេរិកកំពុងត្រៀមធ្វើជាម្ចាស់ផ្ទះរួមគ្នាជាមួយប្រទេសកាណាដា និងម៉ិកស៊ិក សម្រាប់ព្រឹត្តិការណ៍ World Cup ឆ្នាំ២០២៦ ដែលប្រព្រឹត្តទៅចាប់ពីថ្ងៃទី១១ ខែមិថុនា ដល់ថ្ងៃទី ១៩ ខែកក្កដា។ លោក ត្រាំ បានប្រាប់កាសែតអាមេរិក Politico នៅខាងក្រៅអំពីវត្តមានអ៊ីរ៉ង់នៅក្នុងប្រកួតថា «ខ្ញុំពិតជាមិនខ្វល់ទេ។ ខ្ញុំគិតថា អ៊ីរ៉ង់ ជាប្រទេសដែលចាញ់យ៉ាងធ្ងន់ធ្ងរ»។
ក្រុមជម្រើសជាតិឈុតធំបុរសអ៊ីរ៉ង់ បានឈានដល់ការប្រកួតជុំចុងក្រោយនៃពានរង្វាន់ World Cup ជាលើកទី ៤ សម័យកាលជាប់គ្នា ហើយពួកគេគ្រោងនឹងបើកយុទ្ធនាឆ្នាំ ២០២៦ នៅលើទឹកដីសហរដ្ឋអាមេរិក ដោយតទល់នឹងក្រុមនូវែលសេឡង់ បែលហ្ស៊ិក នៅក្នុងទីក្រុងឡូសអាន់ជ័រលេស (Los Angeles) មុនពេលការប្រកួតចុងក្រោយទល់នឹងអេហ្ស៊ីបនៅទីក្រុងស៊ីតថល (Seattle) សម្រាប់ពូល G។
ប្រទេសអ៊ីរ៉ង់មិនបានប្រកាសដកខ្លួនចេញពីការប្រកួត World Cup ឆ្នាំ២០២៦ នោះទេ នៅពេលដែលសហរដ្ឋអាមេរិកទម្លាក់គ្រាប់បែកលើរោងចក្រនុយក្លេអ៊ែរចំនួន ៣ នៅក្នុងប្រទេសនេះ។ ប៉ុន្តែជាមួយភាពចលាចលបច្ចុប្បន្នដ៏ធ្ងន់ធ្ងរជាងនេះ ប្រធានសហព័ន្ធបាល់ទាត់អ៊ីរ៉ង់ លោក Mehdi Taj ត្រូវបានរាយការណ៍ថា កំពុងដាក់ការសង្ស័យលើលទ្ធភាពចូលរួមរបស់ពួកគេ។
លោក Taj បានប្រាប់ទូរទស្សន៍អ៊ីរ៉ង់ថា «វានៅឆ្ងាយពីការរំពឹងទុករបស់យើងដែលអាចមើលឃើញព្រឹត្តិការណ៍ World Cup ជាមួយក្តីសង្ឃឹម។ លោកបន្ថែមថា មន្ត្រីកីឡាអ៊ីរ៉ង់នឹងសម្រេចចិត្តថា តើសកម្មភាពណាមួយចាំបាច់ ឬអត់?
ពាក់ព័ន្ធនឹងបញ្ហានេះ លោក Mattias Grafstrom អគ្គលេខាធិការសហព័ន្ធបាល់ទាត់ពិភពលោក (FIFA) កាលពីថ្ងៃសៅរ៍សប្តាហ៍មុន បានលើកឡើងថា «ការផ្តោតអារម្មណ៍របស់យើង (FIFA) ដើម្បីឱ្យមានព្រឹត្តិការណ៍ World Cup ប្រកបដោយសុវត្ថិភាពជាមួយមនុស្សគ្រប់គ្នាចូលរួម»៕
ចែករំលែកព័តមាននេះ