រាជធានីភ្នំពេញ ៖ ក្រុមប្រតិភូកីឡាករប្រដាល់គុនខ្មែររបស់សមាគមកីឡាប្រដាល់ក្រសួងមហាផ្ទៃ ដែលចេញទៅប្រកួតនៅប្រទេសឡាវ ដឹកនាំដោយលោកឧត្តមសេនីយ៍ទោអ៊ានសុភ័ក្ត្រ កាលពីថ្ងៃទី១៦ ខែវិច្ឆិកា ឆ្នាំ២០២៥ បានបញ្ចប់បេសកកម្មហើយជាលទ្ធផលឈ្នះ៣នាក់ ចាញ់២នាក់…
រាជធានីភ្នំពេញ ៖ ក្រុមប្រតិភូកីឡាករប្រដាល់គុនខ្មែររបស់សមាគមកីឡាប្រដាល់ក្រសួងមហាផ្ទៃ ដែលចេញទៅប្រកួតនៅប្រទេសឡាវ ដឹកនាំដោយលោកឧត្តមសេនីយ៍ទោអ៊ានសុភ័ក្ត្រ កាលពីថ្ងៃទី១៦ ខែវិច្ឆិកា ឆ្នាំ២០២៥ បានបញ្ចប់បេសកកម្មហើយជាលទ្ធផលឈ្នះ៣នាក់ ចាញ់២នាក់ និងស្មើ១នាក់។
លោកវរសេនីយ៍ឯកស្រឺ ស្រេង ហៅសំណព្វដែលបានរួមដំណើរទៅចូលរួមការប្រកួតនេះដែរបានឱ្យដឹងថា ក្នុងដំណើរទៅប្រកួតផ្សព្វផ្សាយក្បាច់គុនបូរាណខ្មែរនៅប្រទេសឡាវលើកនេះកីឡាករកម្ពុជាពិតជាធ្វើបានល្អខ្លាំងណាស់ ទោះបីលទ្ធផលមានឈ្នះនិងចាញ់ក៏ដោយ។ អ្វីដែលគួរឱ្យកត់សម្គាល់ខ្លាំង គឺអ្នកឈ្នះទាំង៣នាក់សុទ្ធតែបានផ្ដួលគូប្រកួតឱ្យចាញ់ដោយសន្លប់នៅត្រឹមទឹកទី១ដូចគ្នា។
ជាក់ស្ដែង កីឡាករគឿន វឌ្ឍនា ផ្ដួលកីឡាករឡាវPunyaឱ្យសន្លប់ទឹកទី១, កីឡាករវិទ្ធី វ៉ារ៉ានិត ផ្ដួលកីឡាករឡាវPhet Champhonឱ្យសន្លប់ទឹកទី១ និងកីឡាករផៃ ឧត្តម ផ្ដួលកីឡាករឡាវSean Xaivឱ្យចាញ់សន្លប់ទឹកទី១ដូចគ្នា។ ក្រៅពីនេះ កីឡាករយឿន សារុន បានត្រឹមស្មើពិន្ទុកីឡាករឡាវ
Inxelake, កីឡាកររស់ លីហេង ចាញ់ពិន្ទុកីឡាករឡាវ Phet Donmuang និងកីឡាកររឿង ឌីណា ចាញ់ពិន្ទុកីឡាករឡាវKumpan។
លោកវរសេនីយ៍ឯកស្រឺ ស្រេង បានឱ្យដឹងទៀតថា ក្នុងជំនួបមិត្តភាពរវាងកីឡាករកម្ពុជានិងកីឡាករឡាវលើកនេះគឺធ្វើនៅខេត្តប៉ាកសេនៃប្រទេសឡាវ ។ បេសកកម្មនេះជាការរួមចំណែកមួយរបស់សមាគមកីឡាប្រដាល់ក្រសួងមហាផ្ទៃក្នុងការផ្សព្វផ្សាយវិស័យកីឡាប្រដាល់គុនខ្មែរទៅលើឆាកអន្តរជាតិឱ្យកាន់តែទទួលបានចំណាប់អារម្មណ៍ និងគាំទ្រខ្លាំងឡើង ៕
ចែករំលែកព័តមាននេះ