សហរដ្ឋអាមេរិក ៖ នៅទីបំផុត ជំនួបប្រដាល់សកល ដែលអ្នកគាំទ្រនៅជុំវិញពិភពលោកចង់ឃើញជាលើកទី២ កើតឡើងហើយ បន្ទាប់ពីកំពូលអ្នកប្រដាល់មិនទាន់ស្គាល់ចាញ់អាមេរិក ហ្វ្លយ ម៉េវ៉េឌើ ជូនៀ…
សហរដ្ឋអាមេរិក ៖ នៅទីបំផុត ជំនួបប្រដាល់សកល ដែលអ្នកគាំទ្រនៅជុំវិញពិភពលោកចង់ឃើញជាលើកទី២ កើតឡើងហើយ បន្ទាប់ពីកំពូលអ្នកប្រដាល់មិនទាន់ស្គាល់ចាញ់អាមេរិក ហ្វ្លយ ម៉េវ៉េឌើ ជូនៀ (Floyd Mayweather Jr.) ទទួលយកជំនួបសងសឹករបស់ស្តេចប្រដាល់ហ្វីលីពីន ម៉ានី ប៉ាក់គីអៅ (Manny Pacquiao) ដែលជាការប្រកួតអាជីព នឹងធ្វើឡើងនៅថ្ងៃទី១៩ ខែកញ្ញា ឆ្នាំ២០២៦ នៅក្នុងសាលសិល្បៈ Sphere នាទីក្រុងឡាសវេហ្គាស (Las Vegas) សហរដ្ឋអាមេរិក។ ការប្រកួតនេះនឹងត្រូវបានចាក់ផ្សាយនៅទូទាំងពិភពលោកនៅលើកម្មវិធី Netflix ផងដែរ។
ប្រភពពីសារព័ត៌មាន ESPN កាលពីថ្ងៃទី២៣ ខែកុម្ភៈ ឆ្នាំ២០២៦ បានឱ្យដឹងថា ការប្រកាសដ៏ភ្ញាក់ផ្អើលនេះ ធ្វើឡើងត្រឹមតែប៉ុន្មានថ្ងៃ បន្ទាប់ពី Mayweather វ័យ៤៩ឆ្នាំបានប្រកាសពីចេតនារបស់ខ្លួនវិលត្រឡប់ឡើងសង្វៀនប្រកួតអាជីពវិញ បន្ទាប់ពីចូលនិវត្តន៍អស់រយៈពេលជិត៩ឆ្នាំ ពោលកាលពីឆ្នាំ ២០១៧។
ងាកទៅ Pacquiao ដែលចូលនិវត្តន៍កាលពីឆ្នាំ ២០២១ ដើម្បីប្រឡូកឆាកនយោបាយឯណោះវិញ បានត្រឡប់ឡើងសង្វៀនអាជីពវិញរួចហើយ កាលពីខែកក្កដាឆ្នាំមុន ដោយស្មើការប្រកួតជាមួយនឹងម្ចាស់ខ្សែក្រវាត់ WBC welterweight កីឡាករអាមេរិក Mario Barrios។ ស្តេចប្រដាល់ហ្វីលីពីនវ័យ៤៧ឆ្នាំរូបនេះ ក៏នឹងត្រៀមប៉ះអតីតអ្នកប្រដាល់ឆ្នើមប្រែខ្លួនជាអ្នកនយោបាយរុស្ស៊ី លោក Ruslan Provodnikov វ័យ៤២ឆ្នាំ នៅថ្ងៃទី១៨ ខែមេសា ឆ្នាំ២០២៦ នៅទីក្រុង ឡាសវេហ្គាស។ ប៉ុន្តែនៅមិនទាន់ដឹងច្បាស់នៅឡើយទេថា ការប្រកួតនេះនឹងត្រូវប្រកួតក្នុងប្រភេទទម្ងន់អ្វី និងប៉ុន្មានទឹកនៅឡើយទេ។
ជំនួបសងសឹករវាង Pacquiao និង Mayweather កំពុងតែត្រូវបានផ្សព្វផ្សាយដោយភ្នាក់ងារ Manny Pacquiao Promotions និង Mayweather Promotions។ ដ្បិតជំនួបលើកទី១ កាលពីថ្ងៃទី២ ខែឧសភា ឆ្នាំ២០១៥ ដែលត្រូវបានប្រសិទ្ធិនាមថា «ការប្រកួតដ៏អស្ចារ្យបំផុតប្រចាំទសវត្សរ៍» នោះ Mayweather បានយកឈ្នះ Pacquiao ដោយពិន្ទុឯកច្ឆន្ទ។ ការប្រកួតដែលធ្វើឡើងនៅសហរដ្ឋអាមេរិកនេះ បានបំបែកកំណត់ត្រាប្រដាល់ជាច្រើនដែលនៅតែមានរហូតមកដល់សព្វថ្ងៃនេះ រួមទាំងចំនួនអ្នកទស្សនាអនឡាញ (បង់ប្រាក់) ចំនួន ៤,៦ លាននាក់ និងកើបចំណូលជាង ៤១០ លានដុល្លារ ហើយក៏បានបំបែកកំណត់ត្រាការលក់សំបុត្ររកបាន ៧២,២ លានដុល្លារផងដែរ។
ថ្មីៗនេះ Mayweather ដែលមានកំណត់ត្រាប្រកួតអាជីព ៥០-០ បានបញ្ជាក់ក្នុងសេចក្តីថ្លែងការណ៍មួយថា «ខ្ញុំបានប្រកួត និងយកឈ្នះលើ Manny ម្តងរួចមកហើយ។ ដូច្នេះលើកនេះ នឹងមានលទ្ធផលដូចគ្នា»។
គួររំលឹកថា មុនឈានដល់ការប្រកួតអំពីជំនួបសងសឹកនេះ ការប្រកាសដ៏ភ្ញាក់ផ្អើលមួយបានកើតឡើងកាលពីខែកញ្ញា ឆ្នាំមុន អំពីជំនួបរវាង Mayweather និងវីរបុរសប្រដាល់អាមេរិក ម៉ៃ ថៃសាន់ (Mike Tyson) នៅឆ្នាំ ២០២៦ ប៉ុន្តែមកទល់ពេលនេះ មិនទាន់មានកាលបរិច្ឆេទ ឬទីតាំងណាមួយត្រូវបានបញ្ជាក់ជាផ្លូវការនៅឡើយទេ៕ ប្រភព ៖ ESPN
ចែករំលែកព័តមាននេះ