រាជធានីភ្នំពេញ ៖ យោងតាមសេចក្ដីជូនដំណឹងរបស់សហព័ន្ធកីឡាប្រដាល់គុនខ្មែរកាលពីថ្ងៃទី២៥ ខែកុម្ភៈ ឆ្នាំ២០២៦ បានឱ្យដឹងថា កីឡាករអេ អាំម៉ារីនភូថង និងអេ វិរៈខាំឈិត…
រាជធានីភ្នំពេញ ៖ យោងតាមសេចក្ដីជូនដំណឹងរបស់សហព័ន្ធកីឡាប្រដាល់គុនខ្មែរកាលពីថ្ងៃទី២៥ ខែកុម្ភៈ ឆ្នាំ២០២៦ បានឱ្យដឹងថា កីឡាករអេ អាំម៉ារីនភូថង និងអេ វិរៈខាំឈិត ភូថង ដែលត្រូវបានគេស្គាល់ជាកូនប្រុសរបស់លោកអេ ភូថង ត្រូវបានសហព័ន្ធផ្អាកមិនឱ្យឡើងសង្វៀនប្រកួតរយៈពេល៦ខែគិតចាប់ពីថ្ងៃទី២៥ ខែកុម្ភៈ រហូតដល់ថ្ងៃទី២៥ ខែកក្កដាឆ្នាំ២០២៦ បន្ទាប់ពីមានការស្នើសុំរបស់មជ្ឈមណ្ឌលកីឡាកងយោធពលខេមរភូមិន្ទ។
ក្នុងសេចក្ដីជូនដំណឹងដែលចុះហត្ថលេខាដោយលោកម៉ិល កាដូ ប្រធានសហព័ន្ធកីឡាប្រដាល់គុនខ្មែរស្ដីទីបានឱ្យដឹងថា ការដាក់ពិន័យដោយការផ្អាកចាប់គូប្រកួតទាំងក្នុងនិងក្រៅប្រទេសរយៈពេល៦ខែទៅលើកីឡាករអេ អាំម៉ារីនភូថង និងអេ វិរៈខាំឈីតភូថង គឺមូលហេតុមកពីកីឡាករទាំងពីររូបជាយោធិនសេរីគឺលោកអនុសេនីយ៍ត្រីអេ វិរៈខាំឈីត ភូថង និងលោកនាយឯកអេ អាំម៉ារីនភូថង
មិនគោរពអនុវត្តតាមបទបញ្ជាថ្នាក់ដឹកនាំរបស់មជ្ឈមណ្ឌលកីឡាកងយោធពលខេមរភូមិន្ទ។
ជុំវិញបញ្ហានេះឯកឧត្តមខូវ ឆាយ ប្រធានសហព័ន្ធកីឡាប្រដាល់គុនខ្មែរបានប្រាប់កោះសន្តិភាពតាមទូរស័ព្ទថា សហព័ន្ធកីឡាប្រដាល់គុនខ្មែរសម្រេចដាក់ពិន័យកូនប្រុសលោកអេ ភូថង មិនឱ្យឡើងសង្វៀនប្រកួតរយៈពេល៦ខែគឺដោយសារតែពួកគេទាំងពីរមិនគោរពនិងស្ដាប់តាមការណែនាំរបស់អង្គភាព ។
ជាពិសេសរាល់ពេលចេញទៅប្រកួតនៅក្រៅប្រទេសមិនដែលស្នើសុំការអនញ្ញាតពីអង្គភាពម្ដងណាឡើយ។ ឯកឧត្តមបានបញ្ជាក់ឱ្យដឹងបន្ថែមថា អង្គភាពនីមួយៗតែងតែមានបទបញ្ជានិងច្បាប់ទម្លប់ត្រឹមត្រូវ ។ កីឡាករទាំងពីរសុទ្ធតែនៅក្នុងក្របខណ្ឌមន្ត្រីកងយោធពលខេមរភូមិន្ទ គេមិនហាមឃាត់មិនឱ្យប្រកួតនោះទេ តែមុនធ្វើអ្វីមួយត្រូវតែសុំការអនុញ្ញាតពីអង្គភាពឱ្យបានត្រឹមត្រូវ។
ក្រោយពីសហព័ន្ធកីឡាប្រដាល់គុនខ្មែរចេញសេចក្ដីជូនដំណឹងនេះភ្លាម លោកគ្រូអេ ភូថងនិងភរិយាគឺលោកស្រីសាំង សុម៉ាលី បានចេញប្រតិកម្មភ្លាមៗផ្អើលពេញបណ្ដាញសង្គមថា រូបលោក(អេ ភូថង)ខិតខំត្រួសត្រាយនៅក្នុងវិស័យកីឡាប្រដាល់គុនខ្មែរតាំងពីអាយុ១២ឆ្នាំមកម្ល៉េះរហូតមកទល់ពេលនេះលោកមានអាយុ៥៤-៥៥ឆ្នាំហើយចូលឆ្នាំថ្មីនេះ ។
លោកពិតជាមានការហត់នឿយខ្លាំងណាស់ ចង់ឈប់ពីគុនខ្មែរទៅធ្វើស្រែចម្ការវិញម្ដង ដោយសារសហព័ន្ធជំនាន់ថ្មី ។ មិនតែប៉ុណ្ណោះលោកធ្លាប់នាំយកកីឡាគុនខ្មែរទៅប្រកួតផ្សព្វផ្សាយនៅក្រៅប្រទេសដោយខ្លួនឯងតាំងពីកីឡាប្រដាល់គុនខ្មែរមិនទាន់មានឈ្មោះបោះសំឡេងមកម៉្លេះ។
ឯកឧត្តមខូវ ឆាយ បានបញ្ជាក់ច្បាស់ហើយថា លោកមិនបានហាមឃាត់ពួកគេមិនឱ្យចេញប្រកួតនោះទេ ប៉ុន្តែកីឡាករទាំងពីររូបខាងលើគឺជាមន្ត្រីកងយោធពលខេមរភូមិន្ទ ដូច្នេះត្រូវតែគោរពច្បាប់របស់អង្គភាព ជាពិសេសរបស់ថ្នាក់ដឹកនាំមជ្ឈមណ្ឌលកីឡាកងយោធពលខេមរភូមិន្ទ ៕
ចែករំលែកព័តមាននេះ