រាជធានីភ្នំពេញ ៖ ឯកឧត្ដម វ៉ាត់ ចំរើន រដ្ឋលេខាធិការតំណាងដ៏ខ្ពង់ខ្ពស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ…
រាជធានីភ្នំពេញ ៖ ឯកឧត្ដម វ៉ាត់ ចំរើន រដ្ឋលេខាធិការតំណាងដ៏ខ្ពង់ខ្ពស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអំពាវនាវដល់បណ្ដាគ្រឹះស្ថានអប់រំ និងវិស័យឯកជនបន្តយកចិត្តទុកដាក់ឱ្យបានជាប់លាប់នូវសកម្មភាពកីឡាដល់សិស្សានុសិស្សរបស់ខ្លួនដើម្បីសុខភាព បណ្ដុះក្ដីស្រឡាញ់ក្នុងកីឡា និងជាធនធានដ៏ល្អសម្រាប់ជាតិ ។
ឯកឧត្ដមមានប្រសាសន៍បែបនេះក្នុងពិធីបិទព្រឹត្តិការណ៍កីឡាសិស្សបឋមសិក្សាថ្នាក់ជាតិ ឆ្នាំ ២០២៦នារសៀលថ្ងៃទី៩ ខែឧសភា ឆ្នាំ២០២៦ នាវិមានពហុកីឡដ្ឋានជាតិអូឡាំពិក។
ជាមួយគ្នានេះ ឯកឧត្ដម វ៉ាត់ ចំរើន បានផ្ដល់អនុសាសន៍មួយចំនួនដូចខាងក្រោម៖
១.គណៈគ្រប់គ្រងសាលាសូមបន្តយកចិត្ត
ទុកដាក់ខ្ពស់លើកម្មវិធីអប់រំកាយ និងរៀបចំឱ្យមានហេដ្ឋារចនាសម្ព័ន្ធកីឡាជាមូលដ្ឋាន ដើម្បីគាំទ្រដល់ការអប់រំស្របជាមួយនឹងសុខភាពផ្លូវកាយ និងផ្លូវចិត្តល្អ។
២.លោកគ្រូ អ្នកគ្រូអប់រំកាយក្នុងម៉ោងសិក្សា និងក្រៅម៉ោងសិក្សា ត្រូវបន្តអនុវត្តវិធីសាស្ត្របង្រៀនប្រកបដោយភាពទាក់ទាញ និងបន្តស្វែងរកសិស្សដែលមានទេពកោសល្យកីឡា និងមានឧបនិស្ស័យជាកីឡាករឆ្នើម ដើម្បីបន្តបណ្តុះបណ្តាល។
៣.សិស្សានុសិស្សសូមបន្តអនុវត្តទិសស្លោក យុវជនម្នាក់លេងកីឡាមួយប្រភេទយ៉ាងតិចប្រចាំជីវិត ដើម្បីសុខភាព វិន័យ និងការសិក្សាល្អ។
៤.វិស័យឯកជន និងសប្បុរសជន សូមបន្តចូលរួមឧបត្ថម្ភគាំទ្រជាស្មារតី សម្ភារៈ និងថវិកា ដើម្បីរួមចំណែកអភិវឌ្ឍវិស័យអប់រំកាយ និងកីឡាជាតិ។
បើតាមរបាយការណ៍ឯកឧត្ដម ប៉ុន សុខ អគ្គនាយកនៃអគ្គនាយកដ្ឋានកីឡា ជាលទ្ធផលនៃការប្រកួតពីថ្ងៃទី១ដល់ថ្ងៃចុងក្រោយនេះ រាជធានីភ្នំពេញដណ្ដើមបានមេដាយច្រើនជាងគេ មានមេដាយមាស១២ ប្រាក់៧ និងសំរឹទ្ធ៤ សរុប២៣គ្រឿង ។ ខេត្តរតនគិរី រកបានមេដាយមាស៧ ប្រាក់១ និងសំរឹទ្ធ១ សរុប៩គ្រឿង។ ខេត្តព្រៃវែង ទទួលបានមេដាយមាស៦ ប្រាក់៥ និងសំរឹទ្ធ៦ សរុប១៧គ្រឿង។
គួរឱ្យដឹងផងដែរថា ព្រឹត្តិការណ៍ប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ ប្រព្រឹត្តទៅចាប់ពីថ្ងៃទី១ ដល់ថ្ងៃទី៩ ខែឧសភា ឆ្នាំ២០២៦ នៅរាជធានីភ្នំពេញ ក្រោមប្រធានបទ “កីឡាដើម្បីសុខភាពកុមារ” និងមានប្រតិភូ គ្រូបង្វឹក កីឡាករ កីឡាការិនី ចុះឈ្មោះចូលរួម មកពី២៥រាជធានី ខេត្ត សរុបចំនួន២៦៨៩នាក់។
សម្រាប់កីឡាដែលឱ្យប្រកួតមានចំនួន១២ប្រភេទ
រួមមាន បាល់ទាត់ បាល់ទះ បាល់បោះ អត្តពលកម្ម វាយកូនឃ្លីលើតុ វាយសី តេក្វាន់ដូWT ប៊ូល និងប៉េតង់ ល្បុក្កតោ ហែលទឹក គុនដាវ និងចំបាប់ ប្រព្រឹត្តទៅនៅលើទីតាំងចំនួន១០៕
ចែករំលែកព័តមាននេះ