រាជធានីភ្នំពេញ ៖ សហព័ន្ធកីឡាប្រដាល់គុនខ្មែរកាលពីពេល ថ្មីៗនេះ បានបើកកិច្ចប្រជុំមួយដើម្បីពិភាក្សាលើការជ្រើសរើសអគ្គលេខាធិការថ្មីក្រោយពីលោកសៀន សុភក្ត្រ ដែលបានបម្រើការងារជាអគ្គលេខាធិការសហព័ន្ធកីឡាប្រដាល់គុនខ្មែរអស់រយៈពេលជិត១ឆ្នាំមកនេះបានប្រកាសលាលែងចេញពីតំណែង។
បើគិតរហូតមកទល់ពេលនេះមានរយៈពេល៦០ថ្ងៃហើយដែលលោកសៀន សុភក្ត្រ បានដាក់សំណើទៅសហព័ន្ធកីឡាប្រដាល់គុនខ្មែរដើម្បីលាឈប់ពីតំណែងអគ្គលេខាធិការសហព័ន្ធកីឡាប្រដាល់គុនខ្មែរ បន្ទាប់ពីលោកត្រូវបានសហព័ន្ធជួលឱ្យមកកាន់តំណែងនេះកាលពីថ្ងៃទី១៤ ខែកុម្ភះ ឆ្នាំ២០២៥ ជាថ្នូរនឹងការទទួលបានប្រាក់បៀវត្សប្រចាំខែ ។
នៅក្នុងសំណើលាឈប់ដែលបានធ្វើឡើងកាលពីថ្ងៃទី១៩ ខែកញ្ញានោះ លោកសៀន សុភក្ត្រ
បានជម្រាបជូនឯកឧត្តមខូវ ឆាយ ប្រធានសហព័ន្ធថា ដោយលោកមានភារកិច្ចផ្សេងជាច្រើនទៀត
ត្រូវធ្វើ លោកពុំមានពេលវេលាគ្រប់គ្រាន់បំពេញការងារជូនសហព័ន្ធ ។ ដូច្នេះសូមស្នើសុំឯកឧត្តមប្រធានអនុញ្ញាតលាឈប់ពីតួនាទីអគ្គលេខាធិការសព័ន្ធកីឡាប្រដាល់គុនខ្មែរចាប់ពីថ្ងៃចុះហត្ថ
លេខានេះតទៅ។
ទោះបីជាយ៉ាងណា សំណើលាឈប់របស់លោក សៀន សុភក្ត្រ មិនបានបែកធ្លាយជាសាធាណៈនោះទេ ហើយគិតរហូតមកទល់ពេលនេះសហព័ន្ធកីឡាប្រដាល់គុនខ្មែរនៅមិនទាន់ប្រកាសអ្នកថ្មីមកជំនួសតំណែងលោកសៀន សុភក្ត្រ នៅឡើយនោះទេ បើទោះជាគេដឹងថា សហព័ន្ធបានតែងតាំងលោកនិន វណ្ណដា ជាអគ្គលេខាធិការស្ដីទីរួចមកហើយក្ដី។
ឯកឧត្តមខូវ ឆាយ បានបញ្ជាក់ឱ្យដឹងបន្ថែមទៀតថា យើងមិនទាន់ជ្រើសរើសអគ្គលេខាធិការថ្មីនោះទេ យើងនឹងបើកកិច្ចប្រជុំគណៈអចិន្ត្រៃយ៍ ដើម្បីសម្រេចជ្រើសរើសអគ្គលេខាធិការស្ដីទី
ដើម្បីដឹកនាំអគ្គលេខាធិការដ្ឋានជាបណ្ដោះអាសន្នរហូតដល់មានការបោះឆ្នោតជ្រើសរើសអគ្គលេខាធិការថ្មីនៅក្នុងមហាសន្និបាតប្រចាំឆ្នាំឬសន្និបាតវិសាមញ្ញ។
នៅក្នុងការជ្រើសរើសអគ្គលេខាធិការសហព័ន្ធកីឡាប្រដាល់គុនខ្មែរថ្មី តាមការឱ្យដឹង ឯក
ឧត្តមខូវ ឆាយ នៅតែមានបំណងជួលអ្នកនៅក្រៅពីជួរគណៈកម្មាធិការប្រតិបត្តិរបស់សហព័ន្ធឱ្យមកកាន់តួនាទីនេះ ដែលស្របទៅនឹងលក្ខន្តិកៈរបស់សហព័ន្ធដែលបានកំណត់នៅក្នុងអាណត្តិថ្មីរបស់ខ្លួន។
នៅក្នុងមហាសន្និបាតបញ្ចប់អាណត្តិចាស់កាលពីថ្ងៃទី២២ ខែមករា ឆ្នាំ២០២៥ និងការបោះឆ្នោតជ្រើសរើសគណៈកម្មាធិការប្រតិបត្តិអាណត្តិថ្មី បានឯកភាពគ្នាទៅលើគោលការណ៍ថា មិនរើសអគ្គលេខាធិការនៅក្នុងជួរគណៈកម្មាធិការប្រតិបត្តិទេ ៕
ចែករំលែកព័តមាននេះ